Baami Wachibili
7 Elisha wakati, “Amuswiilizye jwi lyaJehova. Nzezi nzyaamba Jehova: ‘Juunza aachiindi eechino kugeedi lyaSamariya,* siya* yafulawa nante izoowulwa aashekeli* limwi, alubo masiya aabili aabbali azoowulwa aashekeli limwi.’” 2 Mpawo mugwasilizi wamupati wamasooja, ooyo mwaami ngwaakali kusyoma wakati kumuntu waLeza wakasimpe: “Nikuba kuti Jehova wajula mageedi aamvula kujulu, eezi nga zilachitika* na?” Mpawo wakati: “Uzoozibona ameso aako, pesi tuzoozilyi pe.”
3 Kwakali basichipele bane kugeedi lyamuunzi, mpawo bakati kuli umwi awumwi: “Ani tukkalilaanzi aano, lumwi tufwe? 4 Kuti twati, ‘Atunjile mumuunzi,’ kakuli mumuunzi muli nzala, tulafwida mumoomo. Kuti twakkala aano, tulafwa kale. Atwiinke kukkeempu yamaSiriya. Kuti teebaakutujaya, tunooli bawumi, pesi kuti baakutujaya, tulafwa biyo.” 5 Bakanyampuka goko kakuli kwasiya mpawo bakeenda baakunjila mukkeempu yamaSiriya. Nibakasika kumasaangunino aakkeempu yamaSiriya, bakajana kakutakwe muntu pe.
6 Nkaambo Jehova wakali wapa kuti masooja aamaSiriya bamvwe musindo wangolo zyankondo amabbiza, musindo wankamu mpati yamasooja. Nkinkaako, bakati kuli umwi awumwi: “Mwaami wa-Israyeli wabbadala baami bamaHeti abaami ba-Ijipita kuti bazootulwane!” 7 Aachiindi nchicheecho, bakanyampuka goko kakuli kwasiya bachija basiya matente aabo, amabbiza, amadonki akkeempu yoonse mbuli mbuyakabede. Bakachija kuchitila kuti batajayigwi.
8 Basichipele aaba nibakasika kumasaangunino aakkeempu, bakanjila mulilimwi tente, mpawo bakasaanguna kulya akunywa. Bakabweza nsiliva, ngolida azigogo zyakali mumo mpawo bakazisisa. Bakaboola banjila mulilimwi tente, babweza zintu zyakali mumo mpawo bakazisisa.
9 Kumamanino, bakati kuli umwi awumwi: “Nzituli kuchita eezi tazili kabotu pe. Sunu mbuzuba bwamakani mabotu! Kuti twanonoka katulindila kuti kuche, tulapegwa chisubulo. Atwiinke lino tukaakwaambe makani aaya kung’anda yamwaami.” 10 Nkinkaako, bakayinka baakwiita balindi bamageedi aamuunzi bababuzya kuti: “Twayinka kukkeempu yamaSiriya, pesi teekwali bantu pe—taakwe ngutwamvwa pe. Kwali mabbiza amadonki aasungidwe kupela, amatente aasiigwa mbuboobo.” 11 Aachiindi eecho, balindi bamageedi bakoompolola, mpawo makani aaya akasika mung’anda yamwaami.
12 Mwaami wakabuka mpawaawo mansiku wabuzya babelesi bakwe kuti: “Ikaka amuswiilizye ndimubuzye nzibatuchita maSiriya. Balizi kuti tuli aanzala, nkinkaako, bazwa mukkeempu kuti bakayube musokwe kabati, ‘Balazwa mumuunzi mpawo tulabajata kabali bawumi, tunjile mumuunzi.’” 13 Mpawo umwi wababelesi bakwe wakati: “Ikaka, bamwi baalumi ababweze mabbiza aali musanu aasyaala mumuunzi. Balaba mbuli nkamu yabantu boonse ba-Israyeli basyeede oomuno. Balaba mbuli nkamu yabantu boonse ba-Israyeli bakafwa. Atubatume bakabone zyachitika.” 14 Nkinkaako, bakabweza ngolo zibili zyakali aamabbiza mpawo mwaami wakabatuma kukkeempu yamaSiriya kati: “Amwiinke mukabone.” 15 Bakabatobela kusika baakusika kuJodani alubo nzila yoonse yakazwide zigogo azibelesyo nzibakali kuyabusowa maSiriya nibakali kuchija akaambo kakuyoowa. Batumwa bakabweeda baakubuzya mwaami nzibakajana.
16 Mpawo bantu bakayinka baakubweza zintu mukkeempu yamaSiriya, zyakuti siya iimwi yafulawa nante yakali kuulwa aashekeli limwi, alubo masiya aabili aabbali akali kuulwa aashekeli limwi, kweendelana ajwi lyaJehova. 17 Mwaami wakali wabikka mugwasilizi wamupati wamasooja, ooyo ngwaakali kusyoma kuti kalinda kugeedi, pesi bantu bakamulyatuuka kusikila wafwa kugeedi, mbuli muntu waLeza wakasimpe mbaakali wabuzya mwaami naakayinka kulinguwe. 18 Zyakachitika mbuli muntu waLeza wakasimpe mbaakali wabuzya mwaami kuti: “Masiya aabili aabbali azoowulwa aashekeli limwi, alubo siya iimwi yafulawa nante izoowulwa aashekeli limwi juunza aachiindi eechino kugeedi lyaSamariya.” 19 Pesi mugwasilizi wamupati wamasooja wakali wati kumuntu waLeza wakasimpe: “Nikuba kuti Jehova wajula mageedi aamvula kujulu, chintu chiliboobu nga chilachitika* na?” Elisha wakali wati: “Uzoozibona ameso aako, pesi tuzoozilyi pe.” 20 Eezi nzizyo loko zyakachitika kulinguwe, nkaambo bantu bakamulyatuuka kugeedi kusikila wafwa.