Zakkariya
2 Ndakabusya mutwe, mpawo ndakabona mwaalumi wakajisi ntambo yakupimya mukuboko kwakwe. 2 Mpawo ndakabuzya kuti: “Uya kuli?”
Wakasandula kuti: “Ndiya kukupima Jerusalema, kuti ndibone kuti nindamfu biyeni, mubusasa amubulamfu.”
3 Lino bona! ngilozi yakali kwaambuula aandime yakeenda, mpawo kwakaza imwi ngilozi kuti izooswaanane aanjiyo. 4 Mpawo yakati kulinjiyo: “Chijaana ukabuzye mulombe uulya kuti, ‘“Jerusalema izookkalwa mbuli myuunzi iitakwe miduli,* akaambo kabantu boonse azivuubwa zili mulinjiyo. 5 Mpawo ime,” mbaamba Jehova, “ndizooba muduli wayo wamulilo uuyizyungulukide koonse-koonse, alubo ndizooba bulemu mulinjiyo.”’”
6 “Amuze! Amuze! Amuchije muzwe munyika iili kubbazu lyakunyika,” mbaamba Jehova.
“Nkaambo ndamumwayila kumyuuwo iine yakujulu,” mbaamba Jehova.
7 “Kuza, Ziyoni! Chija, iwe nuukkede aamwi amwana musimbi waBbabbiloni. 8 Nkaambo nzezi nzyaamba Jehova wamakamu, ooyo naazwa aakulemekwa iwandituma kuzisi zyakali kukunyanga zintu, kuti ndaambe kuti: ‘Kufumbwa muntu uuguma ndinywe, uguma mboni* yaliso lyangu. 9 Nkaambo lino ndilavukuuzya kuboko kwangu kuti ndibalwane, mpawo bazike babo bazoobanyanga zintu zyabo.’ Mpawo bazooziba choonzyo kuti Jehova wamakamu nguwe wandituma.
10 “Wompolola chakukondwa, iwe numwana musimbi waZiyoni; nkaambo ndilikuza, alubo ndizookkala mulinduwe,” mbaamba Jehova. 11 “Bantu bazisi zyiingi bazooliswaanizya aaJehova mubuzuba oobo, mpawo bazooba bantu bangu; alubo andime ndizookkala mulinduwe.” Alubo uzooziba kuti Jehova wamakamu wandituma kulinduwe. 12 Jehova uzoobweza Juda kuti abe chaabilo chakwe aanyika iisalala, alubo uzooyisala lubo Jerusalema. 13 Inywe nibantu moonse, amuumune kunembo lyaJehova, nkaambo ulikubweza ntaamu kuzwa mundawu yakwe iisalala mwakkala.