Makani aakalembwa aaMakko
5 Mpawo bakasika mutaleeliya aalwizi, muchilawu chabantu bakuGerasa. 2 Jesu mbaakazwa biyo mubwaato, umwi mwaalumi wakali kweendelezegwa aamuuya mubi wakasika kulinguwe kazwa kutubanda.* 3 Mwaalumi ooyo wakali kukkala kutubanda alubo kusikila kuchiindi eechi, taakwe muntu wakali kukonzya kumusunga zisimide, nikuba ancheni. 4 Kwaziindi zyiingi, wakali kusungwa aansimbi ancheni pesi wakali kudunsula ncheni akutyola nsimbi alubo taakwe muntu wakali aamanguzu aakumuzunda. 5 Chiindi choonse sikati amansiku, wakali koompolola kutubanda akuzilundu kalinenguula aamabwe. 6 Pesi naakabona Jesu kachili kule-kule, wakachijaana mpawo wakamufugamina. 7 Mpawo wakoompolola ajwi pati kati: “Ndileenzi anduwe Jesu, Mwana waLeza Sijulu Lyamajulu? Ndikubuzya kuti ukonkezye aaLeza uupona kuti tukoondipenzya pe.” 8 Nkaambo Jesu wakali kuubuzya kuti: “Iwe numuuya mubi, zwa mumuntu ooyu.” 9 Pesi Jesu wakabuzya mwaalumi ooyo kuti: “Nduweni zina lyako?” Mpawo wakasandula kuti: “Ndime Ligiyoni nkaambo tuli biingi.” 10 Mwaalumi ooyo wakaliswini kukombelezya Jesu kuti atatandi myuuya eeyo kuti izwe munyika eeyo.
11 Kwakali tanga lyangulube zyakali kuchela aachilundu eecho. 12 Nkinkaako, myuuya yakamukombelezya kayiti: “Tutandile mungulube, kuchitila kuti tunjile mulinzizyo.” 13 Mpawo wakayizumizya. Mpawo myuuya mibi eeyo yakazwa yaakunjila mungulube, mpawo tanga lyoonse lyangulube zyakali kusika kuma 2 000 lyakalundumukila kujeleele* mpawo zyakawida mulwizi zyayinkila. 14 Pesi basikuzyeembela bakachija baakwaamba zintu eezi kubantu bamumuunzi abamutuunzi twakali aafwiifwi, mpawo bantu bakaza kuzoobona zintu zyakali zyachitika. 15 Nkinkaako, bakasika kuli Jesu mpawo bakabona mwaalumi wakali aadimoni, nkukwaamba uulya wakali aamadimoni miingi kakkede, kali wazwaata, kali waba kabotu mumizeezo mpawo bakayoowa loko. 16 Alubo aabo bakali babona zyakachitikide, bakabalungunwida zintu zyakachitikide kumwaalumi wakali aamadimoni akungulube. 17 Nkinkaako, bakasaanguna kukombelezya Jesu kuti azwe muchilawu chabo.
18 Naakali kutanta bwaato, mwaalumi wakali aadimoni wakamukombelezya kuti ayinkaawe. 19 Nikuba oobo, Jesu taakamuzumizya pe, pesi wakati kulinguwe: “Yinka kulindinywe kubabbululu bako, ukababuzye zintu zyoonse Jehova* nzyaakuchitila aluzyalo ndwaakutondeezya.” 20 Mwaalumi ooyo wakayinka mpawo wakasaanguna kwaambilizya zintu zyoonse muDekkapoli* nzyaakali wachitilwa aaJesu mpawo bantu boonse bakagamba.
21 Jesu naakazubuka lubo mutaleeliya abwaato, nkamu mpati yabantu yakabungana kulinguwe alubo we wakali kumbali aalwizi. 22 Umwi wabeendelezi bachikombelo uutegwa Jayirosi wakasika alubo naakamubona, wakawida kumawulu aakwe. 23 Mpawo wakamukombelezya kwaziindi zyiingi kati: “Kana kangu kasimbi kalikuchiswa loko. Inche kaka, sika uzookabikke maboko kuchitila kuti kapone.” 24 Mpawo Jesu wakayinka aanguwe alubo nkamu mpati yabantu yakali kumutobela kayilikumusyanikizya.
25 Kwakali umwi mwanakazi wakali waba aaminyaka iili 12 kali aabulwazi bwakuzwa ganzi.* 26 Mwanakazi ooyu wakali woomba loko mumaboko aabasilisi biingi alubo wakali wabelesya zintu zyakwe zyoonse, pesi bulwazi bwakwe teebwakali kumana pe, pesi bwakali kwiindilila biya. 27 Naakamvwa makani aali atala aJesu, wakazida kusulaakwe kali mubantu mpawo wakajata chigogo chaJesu chaajulu, 28 nkaambo wakaliswini kwaamba kuti: “Kuti ndajata zigogo zyakwe zyaajulu, ndilapona.” 29 Mpawo ganzi lyakwe lyakali kuzwa lyakaleka kuzwa mpawaawo alubo wakamvwa mumubili wakwe kuti wakali waponesegwa kubulwazi bwakwe bwakali kumukataazya.
30 Aachiindi nchicheecho, Jesu wakamvwa kuti kuli manguzu aakali azwa mulinguwe mpawo wakachengunuka mubantu mwaakabede mpawo wakabuzya kuti: “Ngwani wajata chigogo changu chaajulu?” 31 Pesi basikwiiya bakwe bakati kulinguwe: “Ulibwene kuti nkamu yabantu ilikukusyanikizya, mpawo kujana wabuzya kuti, ‘Ngwani wandijata?’” 32 Nikuba oobo, wakali kulanga-langa kuti abone kuti ngwani wakali wachita chintu eechi. 33 Mwanakazi ooyo kayoowede alubo kalikuzazama alubo kazi zyakali zyachitika kulinguwe, wakasika mpawo wakaliwaala kunembo lyaJesu, wamubuzya simpe lyoonse. 34 Mpawo wakati kulinguwe: “Mwanaangu, lusyomo lwako lwakuponia. Yinka muluumuno alubo upone kubulwazi bwako bukataazya.”
35 Naakachili kwaambuula, bamwi baalumi bakali kuzwa kumuunzi wamweendelezi wachikombelo bakasika, mpawo bakati: “Mwanaako wafwa! Uchimukataazizyaanzi Muyiisi?” 36 Pesi Jesu wakazimvwidikizya nzibakali kwaambuula, mpawo wakabuzya mweendelezi wachikombelo kuti: “Utayoowi pe, iwe syoma biyo.” 37 Taakwe ngwaakazumizya kuti amutobele kunze kwaPetro, Jakkobo aJohane mwanike waJakkobo.
38 Nkinkaako, bakasika aang’anda yamweendelezi wachikombelo, mpawo wakabona bantu bakali kuchita chiyoyooyo abaabo bakali kulila akoomoka. 39 Naakanjila, wakati kulimbabo: “Nkamboonzi nimulikulila kamulikupa kuti kube chiyoyooyo? Mwana tafwide pe pesi ulikoona.” 40 Mpawo bakasaanguna kumuseka kabali kumufubaazya. Pesi naakababuzya kuti bazwe aanze, wakabweza wisi abanyina aamwana abaabo mbaakali aabo mpawo wakanjila mwaakabede mwana. 41 Mpawo naakajata kuboko kwamwana, wakati kulinguwe: “Talita kkumi,” zyaamba kuti: “Kasimbi, ndikubuzya kuti, buka!” 42 Kasimbi aako kakabuka mpawaawo mpawo kakasaanguna kweenda. (Kakali aaminyaka iili 12.) Nibakabona zintu eezi, bakabotelwa loko. 43 Pesi wakabachenjezya kwaziindi zyiingi* kuti batabuzyi muntu pe alubo wakati mwana ooyo apegwe chakulya.