Joshuwa
14 Eeyi njiinyika ma-Israyeli njibakabweza kuti ibe lukono lwabo munyika yaKkenani, njibakapegwa aa-Eliyezari mupayizi aJoshuwa mwana waNuni abasilutwe bamisyobo yabo kuti ibe lukono lwabo. 2 Misyobo iili musanu ayine ahafu yakapegwa lukono lwayo kwiinda mukuuma chisale* mbuli Jehova mbaakalayilila Mozesi. 3 Mozesi wakali wayipa kale lukono lwayo misyobo iibili ahafu mutala aaJodani, pesi maLevi taakabapa lukono aakati kabo. 4 Bana baJosefa bakali kubonwa kuti misyobo iibili, Manase a-Efremu pesi maLevi teebakapegwa chaabilo pe, kunze kwamyuunzi yakuti bakkale mulinjiyo amachezezyo aalubono lwabo azintu zyabo. 5 Nkinkaako, ma-Israyeli bakaabana nyika mbuli Jehova mbaakalayilila Mozesi.
6 Mpawo baalumi baJuda bakasika kuli Joshuwa kuGiligali aamwi aKkalebbu mwana waJefune muKkenizi mpawo wakati kulinguwe: “Uzizi kabotu nzyaakaamba Jehova kuli Mozesi muntu waLeza wakasimpe atala anduwe andime kuKkadeshi-bbaneya. 7 Ndakali aaminyaka iili 40 Mozesi mubelesi waJehova naakandituma kuKkadeshi-bbaneya kuti ndikalange-lange nyika. Ndakaza aamulumbe uulikabotu.* 8 Nikuba kuti beenzuma mbindakayinkide aabo bakapa kuti bantu bayoowe,* ime ndakatobela Jehova Leza wangu amoyo woonse. 9 Mubuzuba oobo, Mozesi wakakonka kati: ‘Nyika njwaalyata izooba lukono lwako alwabana bako do kukabe kutamani, nkaambo wakatobela Jehova Leza wangu amoyo woonse.’ 10 Mbuli mbaakasyomezya, Jehova wandibamba kandili muumi kwaminyaka eeyi iili 45 kuzwa Jehova naakasyomezya majwi aaya kuli Mozesi, ma-Israyeli nibakali kweenda munkanda; asunu ndichili muumi, ndaba aaminyaka iili 85. 11 Asunu ndichisimide mbuli mbundakabede buzuba oobuya Mozesi naakandituma. Ndichili aamanguzu mbuli chiindi, aakulwana nkondo akuchita imwi milimu. 12 Nkinkaako, ndipe chilawu eechi chili aazilundu nchaakasyomezya Jehova mubuzuba oobuya. Nikuba kuti mubuzuba oobuya wakamvwa kuti kuli ma-Anakki bali aamyuunzi mipati iikwabilidwe, Jehova unooli aandime, ndizoobatanda mbuli Jehova mbaakasyomezya.”
13 Joshuwa wakamulongezya* mpawo Hebburoni wakayipa Kkalebbu mwana waJefune kuti ibe lukono lwakwe. 14 Hebburoni nchiili lukono lwaKkalebbu mwana waJefune muKkenizi kusikila sunu, nkaambo wakatobela Jehova Leza wa-Israyeli amoyo woonse. 15 Chiindi, Hebburoni yakali kwiitwa kuti Kkiriyati-abba (Abba wakali muntu uulemekwa aakati kama-Anakki). Nyika yakapumuna kuzwa kunkondo.