Joshuwa
13 Lino Joshuwa wakali wachembaala, wakali wapona minyaka myiingi. Nkinkaako, Jehova wakati kulinguwe: “Wachembaala, wapona minyaka myiingi; pesi kuchili nyika mpati yeelede kubwezegwa.* 2 Eeyi njiinyika yasyaala: chilawu choonse chamaFilisiti achamaGeshuri 3 (kuzwa kukalonga kazwa muli Nayile* kubuzwezuba* aa-Ijipita kuyoosika kumugaano wa-Ekkironi nyika yakali kwaambwa kuti nchilawu chamaKkenani) kuswaanizya azilawu zyabaami bali musanu bamaFilisiti—maGaza, ma-Ashidodi, ma-Ashikkeloni, maGati, ma-Ekkironi; achilawu chama-Avimu 4 kumusanza; nyika yoonse yamaKkenani; Miyara nyika yamaSidoni, mane kuyoosika ku-Afekki, kumugaano wama-Amori; 5 nyika yamaGebbali aLebbanoni yoonse kuya kubuzwezuba, kuzwa kuBbaala-gadi munsi aaChilundu chaHemoni kuyoosika kuLebbo-hamati;* 6 bantu boonse bakkede muchilawu chili aazilundu kuzwa kuLebbanoni kuyoosika kuMisirefoti-mayimu; amaSidoni boonse. Ndizoobatanda kunembo lyama-Israyeli. Nyika eeyi weelede kwiipa ma-Israyeli kuti ibe lukono lwabo mbuli mbundakakulayilila. 7 Weelede kwaabanisya nyika eeyi kumisyobo iili musanu ayine akuhafu yamusyobo waManase kuti ibe lukono lwabo.”
8 Imwi hafu yamusyobo waManase, amusyobo waRubbeni amusyobo waGadi, bakabweza lukono lwabo Mozesi ndwaakabapa kubuzwezuba aaJodani, mbuli mbaakabapa Mozesi mubelesi waJehova: 9 kuzwa ku-Arowa iili kumbali aaKalonga ka-Anoni amuunzi uuli aakati kakkuti,* antandabale yoonse yamaMedebba kuyoosika kuDibboni; 10 amyuunzi yoonse yaMwaami Sihoni wama-Amori, ooyo wakali kweendelezya muHeshibboni kuyoosika kumugaano wama-Amoni; 11 aGiliyadi achilawu chamaGeshuri achamaMaakkati aChilundu choonse chaHemoni aBbashani yoonse kuyoosika kuSalekka; 12 andawu yoonse yakali kweendelezegwa aa-Ogi muBbashani, ooyo wakali kweendelezya mu-Ashitaroti amu-Edireyi. (Wakali umwi wamaRefayimu aakumamanino.) Mozesi wakabazunda akubatanda. 13 Pesi ma-Israyeli teebakabatanda pe maGeshuri amaMaakkati nkaambo maGeshuri amaMaakkati bachikkala aakati kama-Israyeli kusika sunu.
14 Musyobo waLevi nguwo awulikke uutapedwe lukono. Zipo zitentwa kuli Jehova Leza wa-Israyeli nduulukono lwabo, mbuli mbaakasyomezya.
15 Mpawo Mozesi wakapa musyobo waRubbeni lukono lwabo kweendelana ampuli zyabo. 16 Chilawu chabo chakali kuzwa ku-Arowa iili kumbali aaKalonga ka-Anoni, amuunzi uuli aakati kakkuti,* antandabale yoonse iili kumbali aaMedebba. 17 Heshibboni atuunzi twayo toonse tuli muntandabale, Dibboni, Bbamoti-bbaala, Bbeti-bbaala-meyoni, 18 Jahazi, Kkedemoti, Mefaati, 19 Kkiriyatayimu, Sibbima aZereti-shabbari iili muchilundu chili mukkuti.* 20 Bbeti-peyori, minkunu yaPisiga, Bbeti-jeshimoti, 21 myuunzi yoonse iili muntandabale andawu yoonse yakali kweendelezegwa aaMwaami Sihoni, ooyo wakali kweendelezya muHeshibboni. Mozesi wakamuzunda kuswaanizya abasilutwe baMidiyani aaba: Evi, Rekkemu, Zuri, Huri, aRebba, ibaami bakali kweendelezegwa aaSihoni bakali kukkala munyika eeyo. 22 Bbalamu mwana waBbewori musondi wakali aakati kabantu bakajayigwa aapanga ama-Israyeli. 23 Jodani nguwo wakali mugaano wamusyobo waRubbeni alubo chilawu eechi kuswaanizya amyuunzi atuunzi twayo nduulwakali lukono lwamusyobo waRubbeni kweendelana ampuli zyabo.
24 Mukuyungizya, Mozesi wakabapa lukono bamusyobo waGadi kweendelana ampuli zyabo, 25 chilawu chabo chakali kuswaanizya Jazeri amyuunzi yoonse yaGiliyadi ahafu yanyika yama-Amoni kuyoosika ku-Arowa iilangene aaRabba; 26 akuzwa kuHeshibboni kuyoosika kuRamati-mizipe akuBbetonimu, akuzwa kuMahanayimu kuyoosika kumugaano waDebbiri; 27 amukkuti,* Bbeti-harani, Bbeti-nimura, Sukkoti, aZafoni andawu yoonse yakali kweendelezegwa aaMwaami Sihoni waHeshibboni, mpawo Jodani wakali mugaano kuzwa kumagolelo aaLwizi lwaKkinereti* kubuzwezuba kwaJodani. 28 Oolu nduulwakali lukono lwamusyobo waGadi kweendelana ampuli zyabo aamwi amyuunzi atuunzi twayo.
29 Mozesi wakapa hafu yamusyobo waManase lukono kweendelana ampuli zyabo. 30 Chilawu chabo chakali kuzwa kuMahanayimu kachibweza Bbashani yoonse, andawu yoonse yakali kweendelezegwa aaMwaami Ogi waBbashani, atuunzi toonse twamatente twaJayiri tuli muBbashani, amyuunzi iili 60. 31 Ahafu yaGiliyadi, a-Ashitaroti a-Edireyi, myuunzi yakali mundawu yakali kweendelezegwa aa-Ogi muBbashani yakapegwa bana baMakkiri mwana waManase, ahafu yabana baMakkiri kweendelana ampuli zyabo.
32 Oolu nduulukono Mozesi ndwaakabapa nibakali munkanda yaMowabbu mutaleeliya aaJodani, kubuzwezuba kwaJerikko.
33 Pesi Mozesi taakabapa lukono pe bamusyobo waLevi. Jehova Leza wa-Israyeli nduulukono lwabo, mbuli mbaakabasyomezya.