Myeelwe
14 Mpawo mbungano yoonse yakasaanguna koompolola alubo bantu bakayinkilila kunembo kulila kabalikukwiila mansiku woonse. 2 Ma-Israyeli boonse bakasaanguna kung’ung’unina Mozesi a-Aroni alubo mbungano yoonse yakasaanguna kwaambuula zintu zibi atala ambabo, kayiti: “Kaansinga twakafwida biyo munyika ya-Ijipita, nikuba kufwida munkanda eeyi! 3 Nkamboonzi Jehova naakatweeta munyika eeyi kuti tujayigwe aapanga? Banakazi besu abana besu bazoobwezegwa. Zilikabotu kuti tubweede ku-Ijipita.” 4 Alubo bakali kubuzyania kuti: “Atusale mweendelezi tubweede ku-Ijipita!”
5 Nibakamvwa oobo, Mozesi a-Aroni bakavuntama aansi kunembo lyambungano yoonse yama-Israyeli. 6 Joshuwa mwana waNuni aKkalebbu mwana waJefune, bakali aakati kabantu bakayinkide kuyoolanga-langa nyika, bakadelula zigogo zyabo 7 mpawo bakabuzya mbungano yoonse yama-Israyeli kuti: “Nyika njitwakayinka kuti tukayilange-lange, ninyika mbotu loko. 8 Kuti katubotezya mumeso aaJehova, kwaamba choonzyo, uzootunjizya munyika eeyo akutupa njiyo, nyika iikunka malili abuchi. 9 Pesi tamweelede kubukila Jehova pe alubo tamweelede kubayoowa pe bantu bakunyika eeyo, nkaambo tuzoobanyonyoona.* Tabachikwabilidwe pe alubo Jehova uuli aandiswe. Mutabayoowi pe.”
10 Nikuba oobo, mbungano yoonse yakaambuula atala akubatulula mabwe. Pesi bulemu bwaJehova bwakalibonia aajulu aatente lyakuswaanganina kubantu boonse bamu-Israyeli.
11 Mpawo Jehova wakati kuli Mozesi: “Kusika lili bantu aaba kabatandilemeki? Kusika lili bantu aaba kabatandisyomi, nikuba kuti ndakachita zitondeezyo zyoonse eezi aakati kabo?” 12 Ndilabajaya aachilwazi, ndibatande alubo ndilapa kuti iwe ube chisi chipati chili aamanguzu kwiinda mbabo.”
13 Mpawo Mozesi wakati kuli Jehova: “Ma-Ijipita, ooko nkwaakagwisya bantu bako amanguzu aako, bazoozimvwa eezi 14 alubo bazoowambuula atala anzizyo kumaKkenani. Bantu aaba bakamvwa kuti iwe Jehova uli aakati kabantu aaba akuti wakalibonia kulimbabo. Nduwe Jehova alubo joba lyako lyiimvwi aajulu aabo, weenda kunembo lyabo, sikati mumusumpuululu wajoba, mansiku mumusumpuululu wamulilo. 15 Kuti wajaya bantu aaba aachiindi chimwi, zisi zyakamvwa atala ampuwo yako zizoowamba kuti: 16 ‘Jehova wakakachilwa kunjizya bantu aaba munyika njaakabasyomezya kubapa. Nzizyo zyapa kuti abanyonyoone munkanda.’ 17 Ndakumbila kaka, Jehova, manguzu aako aaboneke kuti mapati mbuli mbwaakasyomezya nwaakati: 18 ‘Jehova, uutafwambaani kunyema alubo uuzwide luyando lutamani, uulekelela zibi akusotoka mulawu, pesi takoolekela basikubisya kabatapegwi chisubulo, uusubula bana akaambo kamulandu wamawisi kusikila kuzyalani lyachitatu alyachine.’ 19 Balekelele chibi chabo bantu aaba kweendelana aluyando lwako lutamani lupati, mbuli mbwaakabalekelela bantu aaba kuzwa ku-Ijipita kusika sunu.”
20 Mpawo Jehova wakati: “Ndabalekelela kweendelana ambwaawamba. 21 Pesi kubbazu limwi, mbuli mbundili muumi, nyika yoonse izoozuzigwa bulemu bwaJehova. 22 Nikuba oobo, taakwe nikuba umwi muntu wakabona bulemu bwangu azitondeezyo zyangu nzindakachita mu-Ijipita amunkanda, pesi wakandisunka kwaziindi eezi zili kkumi alubo wakataswiilila jwi lyangu, 23 uutazoobone nyika eeyo njindakakonkezya kumasianyinakulu. Taakwe nikuba muntu uumwi aakati kabantu aaba batali kundilemeka, uutazooyibone. 24 Pesi akaambo kakuti mubelesi wangu Kkalebbu wakaba aamaboneno aasiyene akwiinkilila kunembo kunditobela amoyo woonse, kwaamba choonzyo, ndizoomutola kunyika eeyo njaakayinka alubo bana bakwe bazooyikona. 25 Mbukunga ma-Amalekki amaKkenani bakkede mukkuti,* mweelede kubweeda juunza, muye munkanda kamubelesya nzila yakuLwizi Lusalala.”
26 Mpawo Jehova wakati kuli Mozesi a-Aroni: 27 “Kusika lili mbungano eeyi mbi kayili kung’ung’una atala andime? Ndakazimvwa ma-Israyeli nzibali kung’ung’una atala andime. 28 Babuzye kuti, ‘“Mbuli mbundili muumi,” mbaamba Jehova, “ndilamuchitila kweendelana anzindamvwa kamuli kwaamba! 29 Zidumbu zyanu zizoowida munkanda eeyi, moonse nimuli aaminyaka iili 20 kaziya kunembo nimwakalembwa, moonse nimwakanding’ung’unina. 30 Taakwe naba uumwi aakati kanu uutakanjile munyika njindakakonkezya* kuti muyookkala mulinjiyo kunze kwaKkalebbu mwana waJefune aJoshuwa mwana waNuni.
31 “‘“Bana banu mbimwakaamba kuti bazoobwezegwa, ndizoobanjizya mulinjiyo alubo ndizoopa kuti bayizibe nyika eeyi njimwakakaka. 32 Pesi zidumbu zyanu zizoowida munkanda eeyi. 33 Bana banu bazooba beembeli munkanda kwaminyaka iili 40 alubo bazoolisandwida akaambo kamichito yanu yakutasyomeka,* kusika chidumbu chanu chamamanino chizoowe munkanda. 34 Kweendelana amazuba ngimwakatola kuyoolanga-langa nyika, mazuba aali 40, zuba limwi kalyiiminina munyaka, zuba limwi kalyiiminina munyaka, muzoolisandwida akaambo kamilandu yanu kwaminyaka iili 40, nkaambo muzooziba nzikwaamba kukazyania aandime.*
35 “‘“Ime ndiJehova ndime ndaamba. Nzezi nzinditazoochitile mbungano yoonse eeyi mbi yakabungana kuti ikazyanie aandime: Bazoomanina munkanda eeyi alubo bazoofwida oomuno. 36 Baalumi Mozesi mbaakatuma kuti bakalange-lange nyika alubo bakapa kuti mbungano yoonse ing’ung’une atala andime nibakaboola amulumbe mubi atala anyika, 37 kwaamba choonzyo, baalumi bakeeta mulumbe mubi atala anyika bazoowumwa akufwa kunembo lyaJehova. 38 Pesi Joshuwa mwana waNuni aKkalebbu mwana waJefune, bali aakati kabaabo bakatumidwe kuyoolanga-langa nyika, bazooyinkilila kunembo kabapona.”’”
39 Mozesi naakaambuula majwi aaya kuma-Israyeli woonse, bantu bakasaanguna kulila zitaambiki. 40 Mukuyungizya, bakafuma kuseeni, beezya kutanta aajulu aachilundu kabati: “Lino twalibambila kwiinka kunyika Jehova njaakaamba atala anjiyo, nkaambo twabisya.” 41 Pesi Mozesi wakati: “Nkamboonzi nimuyanda kweenda kamutalayilidwe aaJehova? Tamukoozwidilila pe! 42 Mutayinki pe, nkaambo Jehova tali aakati kanu pe alubo muzoozundwa aabasinkondonyokwe. 43 Nkaambo ma-Amalekki amaKkenani bazoomulwana alubo muzoowisigwa aapanga. Jehova tanooli aakati kanu pe, nkaambo mwaleka kutobela Jehova.”
44 Nikuba oobo, bakalisumpula basaanguna kutanta kabaya aajulu aachilundu, pesi bbokesi lyachizuminano chaJehova teelyakazwa pe aakati kakkeempu kuswaanizya aMozesi. 45 Mpawo ma-Amalekki amaKkenani, bakali kukkala aachilundu eecho bakakunuka, babalwana mpawo bakapa kuti bamwayikizyanie kuyoosika kuHoma.