Baami Wakusaanguna
22 Kwaminyaka iitatu, teekwakali nkondo pe aakati kaSiriya a-Israyeli. 2 Mumunyaka wachitatu, Mwaami Jehoshafati waJuda wakakunuka waya kumwaami wa-Israyeli. 3 Mpawo mwaami wa-Israyeli wakabuzya babelesi bakwe kuti: “Mulizizi na kuti Ramoti-giliyadi njiyesu? Pesi ambulisunu tatunayibweza pe kumwaami waSiriya.” 4 Mpawo wakabuzya Jehoshafati kuti: “Ulandisindikila na kunkondo kuRamoti-giliyadi?” Jehoshafati wakasandula mwaami wa-Israyeli kuti: “Ime anduwe tuli bantu bamwi. Bantu bangu abantu bako mbamwi. Mabbiza aangu amabbiza aako ngamwi.”
5 Pesi Jehoshafati wakabuzya mwaami wa-Israyeli kuti: “Ikaka, saanguna kubuzya makani kuli Jehova.” 6 Nkinkaako, mwaami wa-Israyeli wakabunganizya bapolofita, baalumi basika ku 400 mpawo wakati kulimbabo: “Ndiinke na ndikalwane Ramoti-giliyadi, naakuti ndileke?” Bakati: “Yinka, Jehova ulayibikka mukuboko kwamwaami.”
7 Mpawo Jehoshafati wakati: “Taakwe mupolofita waJehova na ookuno? Atubuzye akulinguwe.” 8 Mpawo mwaami wa-Israyeli wakati kuli Jehoshafati: “Kuchili mwaalumi uumwi ngutukonzya kubuzya, tumvwe kuti Jehova utyeni, pesi ime ndilamuzonda, nkaambo taakwe napolofita zibotu pe atala andime, upolofita zibi kupela. NguMikkaya mwana wa-Imula.” Pesi Jehoshafati wakati: “Mwaami tayelede kwaamba oobo pe.”
9 Nkinkaako, mwaami wa-Israyeli wakayita walupati-pati mung’anda yamwaami, mpawo wakati: “Fwambaana yita Mikkaya mwana wa-Imula.” 10 Mwaami wa-Israyeli aJehoshafati mwaami waJuda bakalikkede aazyuuno zyabo zyabwaami, kabazwete zigogo zyabwaami, kabali kulubuwa lwakupolela kugeedi lyaSamariya, alubo bapolofita boonse bakali kupolofita kunembo lyabo. 11 Mpawo Zedekkiya mwana waKkenana wakalipangila meja aansimbi mpawo wakati: “Nzezi nzyaamba Jehova, ‘Uyoodinka maSiriya ameja aaya kusikila ubalobye.’” 12 Bamwi bapolofita boonse bakali kupolofita majwi aakozyenie kabati: “Yinka kuRamoti-giliyadi, uyoozunda. Jehova uyooyibikka mukuboko kwamwaami.”
13 Nkinkaako, mutumwa ooyo wakali wayinka kuyooyita Mikkaya wakamubuzya kuti: “Mvwa! Bapolofita boonse baamba majwi mabotu kumwaami. Anduwe kaka majwi aako aabe mbuli majwi aabo, waambe zibotu.” 14 Pesi Mikkaya wakati: “AJehova muumi, kufumbwa Jehova nzyatandibuzye nzizyo nzinditaambe.” 15 Mikkaya wakasika kumwaami mpawo mwaami wakamubuzya kuti: “Mikkaya, twiinke na tukalwane Ramoti-giliyadi, naakuti tuleke?” Mikkaya wakati: “Yinka, uyoozunda. Jehova uyooyibikka mukuboko kwamwaami.” 16 Mwaami wakati kulinguwe: “Ndikupe kuti ukonke kwaziindi zingane, kuchitila kuti undibuzye kasimpe kupela muzina lyaJehova?” 17 Mikkaya wakati: “Ndibwene ma-Israyeli boonse kabamwayikizyenie muzilundu mbuli mbelele zitakwe mweembeli. Jehova wati: ‘Aaba tabakwe simalelo pe. Umwi awumwi abweede kung’anda yakwe muluumuno.’”
18 Mpawo mwaami wa-Israyeli wakabuzya Jehoshafati kuti: “Teendakubuzya na kuti, ‘Takoopolofita zibotu pe atala andime, ulapolofita zibi kupela’?”
19 Mpawo Mikkaya wakati: “Mvwa jwi lyaJehova: Ndabona Jehova kakkede aachuuno chakwe chabwaami, makamu aakwe woonse aakujulu kaayimvwi kumbali lyakwe, kuchilisyo chakwe akuchimweensi chakwe. 20 Mpawo Jehova wati, ‘Ngwani uutayunge Ahabbu kuchitila kuti ayinke akaakufwide kuRamoti-giliyadi?’ Umwi wali kwaamba eezi, umwi kaamba eezi. 21 Mpawo umwi muuya* waza wayimikila kunembo lyaJehova, wati, ‘Ime ndilamuyunga.’ Jehova wamubuzya kuti, ‘Ulazichita biyeni?’ 22 Wasandula kuti, ‘Ndilayinka ndikabe muuya walweeno mumilomo yabapolofita bakwe boonse.’ Leza wati, ‘Ulamuyunga, alubo ulazwidilila choonzyo. Yinka ukachite mbuboobo.’ 23 Lino Jehova wabikka muuya walweeno mumilomo yabapolofita bako boonse aaba, pesi Jehova waamba kuti ulasikilwa mapenzi.”
24 Zedekkiya mwana waKkenana wakaswena aafwiifwi wawuma Mikkaya lubayi mpawo wakati: “Muuya waJehova wayinda aanzila iili kawuzwa kulindime kuti uwambuule aanduwe?” 25 Mikkaya wakasandula kuti: “Uzooyibona nzila eeyo mubuzuba nutazoonjile mukaanda kamukati kuti uyube.” 26 Mpawo mwaami wa-Israyeli wakati: “Amubweze Mikkaya mukamusiye kuli Amoni silutwe wamuunzi akuli Jowashi mwana wamwaami. 27 Mubabuzye kuti, ‘Mwaami waamba kuti: “Amumubikke mujele mwaalumi ooyu, kamumupa chakulya chiche amaanzi mache kusikila ndizooboole muluumuno.”’” 28 Pesi Mikkaya wakati: “Kuti ukaboole muluumuno, nkukwaamba kuti Jehova taambuula aandime pe.” Mpawo wakayungizya kuti: “Mwaayeeye majwi aaya inywe nibantu moonse.”
29 Nkinkaako, mwaami wa-Israyeli aJehoshafati mwaami waJuda bakayinka kuRamoti-giliyadi. 30 Mwaami wa-Israyeli wakabuzya Jehoshafati kuti: “Ndilalisisa kuchitila kuti nditazibikani mpawo ndinjile munkondo, pesi iwe uzwaate chigogo chako chabwaami.” Nkinkaako, mwaami wa-Israyeli wakalisisa kuti atazibikani mpawo wakanjila munkondo. 31 Lino mwaami waSiriya wakali walayilila basilutwe bangolo zyakwe bali 32 kuti: “Mutalwani aamuntu woonse pe, abe mupati naakuti muniini, kunze kwamwaami wa-Israyeli kupela.” 32 Basilutwe bangolo mbukamubona biyo Jehoshafati, bakalibuzya kuti: “Ooyu biya mwaami wa-Israyeli.” Nkinkaako, bakakkona baya kulinguwe kuti bamulwane. Mpawo Jehoshafati wakasaanguna kulila kuti agwasigwe. 33 Basilutwe bangolo nibakabona kuti teemwaami wa-Israyeli pe, bakakkona mpawaawo baleka kumutobela.
34 Pesi umwi mwaalumi wakawaala kaanta kakwe mumoya, mpawo wakayasa mwaami wa-Israyeli aanswaanganino zyakabaki kakwe kansimbi kakunkondo. Nkinkaako, mwaami wakabuzya sikweenzya ngolo wakwe kuti: “Kkona undigwisye munkondo,* nkaambo bandichisa loko.” 35 Mubuzuba oobo, nkondo yakali njumu loko, mpawo mwaami bakamujatilana bamwiimikizya mungolo kalangide maSiriya. Ganzi lyakali kuzwa mpaakayaswa, lyakali kweenda mungolo yankondo mpawo goko wakafwa. 36 Nilyakaamba kubbila zuba, kwakamvwika loompololo mukkeempu, lwakuti: “Umwi awumwi ayinke kumuunzi wakwe! Umwi awumwi ayinke kunyika yakwe!” 37 Nkinkaako, mwaami wakafwa, alubo wakeetwa kuSamariya. Mpawo bakamuzikka muSamariya. 38 Nibakasanzya ngolo yankondo kudambwa lyakuSamariya, bankala bakanyankuta ganzi lyakwe alubo mawuule akasambila nkukooko,* kweendelana ajwi ndyaakali waamba Jehova.
39 Makani aachiindi woonse aali atala a-Ahabbu, azintu zyoonse nzyaakachita ang’anda yameja aanzovu njaakayaka* amyuunzi yoonse njaakayaka, taalembedwe na mubbuku lyamakani aachiindi aaziindi zyabaami ba-Israyeli? 40 Kuzwa waawo, Ahabbu wakalazikwaamwi amasianyinakulu. Mwanaakwe Ahaziya wakaba mwaami mundawu yakwe.
41 Jehoshafati mwana wa-Asa wakali waba mwaami waJuda mumunyaka wachine wabweendelezi bwaMwaami Ahabbu wa-Israyeli. 42 Jehoshafati wakali aaminyaka iili 35 naakaba mwaami, wakeendelezya kwaminyaka iili 25 muJerusalema. Banyina bakali kutegwa Azubba mwana waShilihi. 43 Wakaliswini kweenda munzila zyoonse zya-Asa wisi. Taakwe naakaleya pe mulinzizyo, alubo wakachita ziluleme mumeso aaJehova. Nikuba oobo, ndawu zyakukombela teezyakagwisigwa pe, alubo bantu bakachili kupa zipayizyo akuuntumuna busi bwazipayizyo mundawu zyakukombela. 44 Jehoshafati wakayinkilila kunembo kuba aaluumuno amwaami wa-Israyeli. 45 Makani aachiindi woonse aali atala aJehoshafati amilimu yakwe mipati ambaakalwana nkondo, taalembedwe na mubbuku lyamakani aachiindi aaziindi zyabaami baJuda? 46 Alubo munyika eeyo, wakagwisya mawuule baatempele bachaalumi boonse, aabo bakasyeede mumazuba aa-Asa wisi.
47 Teemwakachili mwaami pe mu-Edomu. Mweendelezi nguwe wakali kweendelezya kayiminina mwaami.
48 Alubo Jehoshafati wakapanga maato aakuTashishi* kuti akeete ngolida ku-Ofiri, pesi maato aayo taakayinka pe, nkaambo akanyonyooka ku-Eziyoni-gebberi. 49 Aachiindi eecho, mpimpawo Ahaziya mwana wa-Ahabbu mpaakabuzya Jehoshafati kuti: “Babelesi bangu abayinkaamwi ababelesi bako mumaato,” pesi Jehoshafati taakazumina pe.
50 Mpawo Jehoshafati wakalazikwaamwi amasianyinakulu alubo wakazikkwaamwi amasianyinakulu muMuunzi waDavida sianyinakulu. Mwanaakwe Jehoramu wakaba mwaami mundawu yakwe.
51 Ahaziya mwana wa-Ahabbu wakaba mwaami wa-Israyeli muSamariya mumunyaka wachi 17 wabweendelezi bwaMwaami Jehoshafati waJuda, alubo wakeendelezya Israyeli kwaminyaka iibili. 52 Wakaliswini kuchita zibi mumeso aaJehova, kayenda munzila yawisi ayabanyina amunzila yaJerobbowamu mwana waNebbati, ooyo wakapa kuti Israyeli abisye. 53 Taakaleka pe kukomba Bbaala akumufugamina, alubo wakaliswini kunyemya Jehova Leza wa-Israyeli, mbuli mbaakachita wisi.