Mbutukonzya Kunyona Mbutulimvwa
Bbayibbele lituchenjezya kuti tutantamuke mizeezo iitali kabotu alubo litusungwaazya kuti tube amizeezo iilikabotu.
KUNYEMA
NZILYAAMBA BBAYIBBELE: “Muntu uumuka kunyema uli kabotu kwiinda muntu singuzu.”—Tusimpi 16:32.
CHAAMBAANZI?: Kutantamuka mizeezo iitali kabotu kulatugwasya. Nikuba kuti chimwi chiindi nga tulaatwaambo tuli kabotu tutupa kunyema pesi kufwambaana kunyema kulakonzya kutunjizya mumapenzi. Basikuyanduulisisya bakaamba kuti kunyema kulakonzya kupa kuti muntu achite zintu zipa kuti azoolisole mukuya kwachiindi.
NZUKONZYA KUCHITA: Weelede kulinyona kuti wanyema. Bantu biingi bayeeya kuti kufwambaana kunyema kutondeezya kuti muntu ulaamanguzu pesi oobu mbufuba-fuba. Bbayibbele lyaamba kuti: “Mbuli munzi wapwaigwa, uutajisi bwaanda, mbwabede muntu uutakonzyi kulijata kuti wanyema.” (Tusimpi 25:28) Nzila mpati iikonzya kutugwasya kuti twanyema nkuziba twaambo toonse tuswaanizidwe mukaambo katutanachita kufumbwa chintu. “Bupampu bwamuntu bulamulesya kufwambaana kunyema.” (Tusimpi 19:11) Tweelede kuziba zintu zyoonse zyachitika alubo eezi zilakonzya kutugwasya kuti tukkalikane mumizeezo.
KULUMBA
NZILYAAMBA BBAYIBBELE: “Amutondezye kuti mulalumba.”—Bakolose 3:15.
CHAAMBAANZI?: Bantu balumba mbabo babotelwa. Bamwi bantu bakaswaanana amapenzi bazuminanaawo muzeezo ooyu. Baamba kuti kuyeeya atala azintu nzibeelede kulumba kutali zintu nzibakasweekelwa kwakabagwasya kuzunda kukataazikana mumizeezo.
NZUKONZYA KUCHITA: Lemba zintu nzuyanda kulumba buzuba abuzuba. Ulakonzya kulemba nikuba tuntu tuniini. Yeeya atala atuntu tuniini mbuuli kubbila kwazuba, kwaambuuzyania amuntu nguyanda naakuti kulumba Leza akaambo kakuti wabuka kuli muumi. Zintu eezi zilakonzya kukugwasya kuti utakataazikani mumizeezo kuti wakkala kuziyeeyesesya.
Kuyeeya atala azintu zibotu nzibakuchitila beenzinyokwe naakuti bamumpuli kulakonzya kukugwasya. Kuti wabona zintu nzweelede kulumba bamwi, babuzye kwiinda mukwaambuula aabo mulomo mpande, kubelesya kagwalo, meseji naakuti kubafoonena. Eezi zilakonzya kupa kuti mumvwanane loko akuti ubotelwe akaambo kakuchitila bamwi zintu zibotu.—Milimo 20:35.
ZIMWI NJIISYO ZYAMUBBAYIBBELE
Ulakonzya kudawuniloda Bbayibbele lyakalekkoodwa mumulaka ngumvwisisisya. Lilajanika aajw.org mumilaka iisika ku40
UTAYANDISYI KUKAZYANIA.
“Kutalisya nkondo kuli mbuli kujalwida maanzi manji; kubwesyanya kakutanatalika, kozwa buyo aawo.”—TUSIMPI 17:14.
UTAKATAAZIKANI ATALA AZINTU ZILIKUNEMBO.
“Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.”—MATAYO 6:34.
KUTI WANYEMA, YEEYA SAANSI KUTANACHITA CHINTU.
“Kuyeeya kabotu kuyookulinda, abwalo bupampu buyookukwabilila.”—TUSIMPI 2:11.