NYIKA IZOONYONYOONWA NA?
MOYA
MOYA utugwasya kuti tuyooye. Alubo moya ulatukwabilila kukupya kwazuba. Kaansinga taakwe moya, nikuli munyika yoonse mutontola loko zyakuti kwayinooba zigodo zyamaanzi.
Zipa Kuti Moya Uutasofweede Ucheye
Kusofwaazigwa kwamoya kulakonzya kunyonyoona zintu zipona aanyika. Kweendelana azyakaambwa aamutabi waWorld Health Organization, mbantu bache loko aanyika bayooya moya uutasofwaazidwe.
Kusofwaazigwa kwamoya kulikupa kuti bantu bakachilwe kuyoya kabotu, babe aakkensa yamumapunga naakuti mapupwa akuti babe aabulwazi bwamoyo. Kuyeeyelwa kuti bantu basika ku7 000 000 balafwa munyaka amunyaka akaambo kakusofwaazigwa kwamoya.
Nyika Yakalengelwa Kuti Ikkale Kayiliwo
Nyika yesu yakalengwa munzila yakuti ipe kuti zintu zipona ziyoye moya uulikabotu. Pesi eezi zichitika kupela kuti bantu teebawusofwaazya pe. Bona zikozyano ziche zitobela.
Biingi balizi kuti lusaka lubweza carbon dioxide. Pesi mbache loko bazi kuti minsamu iitegwa mangrove iili kundawu zili aamanzi ibweza carbon dioxide nyingi. Minsamu eeyi ichita mulimu uuyandikana loko wakugwisya moya ngutuyoyela aanze kwaziindi zili 10 kwiinda zichitwa aayimwi minsamu iili mulusaka.
Kumwi kuyanduulisisya kwakachitwa kutondeezya kuti masokwe aali kumbali aalwizi mbuli masokwe aali aamatu mapati aategwa kelp agwisya carbon dioxide mumoya. Matu aamasokwe nga aali aatupako tuniini tuli mbuli tukwama tunga twazula moya mpawo eezi ngazyagwasya kuti ayende mumaanzi kayibeme kwamusinzo mulamfu. Chiindi naaba kule akumbali aalwizi, tukwama ooto nga twadubuka mpawo matu aanga ali aacarbon dioxide nga abbila ayinka aansi. Kuyeeyelwa kuti matu aayo nga akkala aansi aalwizi kwaminyaka myiingi.
Chiindi nikwakali kkorona kwakaboneka kuti mumulenga mulakonzya kuba moya muche uusofweede. Mu2020, kwakaba moya mwiingi uutasofweede akaambo kakuti makkampani miingi akalijalidwe alubo moota zyiingi zyakali zyayimikila kweenda. Kweendelana alipoti yamu2020 yakaambwa aakabunga kaWorld Air Quality, munyika zyiingi nzibakalanga-langa bakabona kuti mumulenga-lenga kwakali kwaba moya mwiingi uutasofweede nkaambo zintu zyiingi zyakali zyayimikila kubeleka akaambo kakkorona.
Nzibalikweezya Kuchita Bantu
Kweenda aamabbasikili kulakonzya kugwasya kuti kusofwaazigwa kwamoya kucheye
Mfulumende zilikwiinkilila kunembo kulayilila makkampani kuti bachesye kusofwaazya moya. Alubo basayensi balikujana nzila zipya zyakuti bachesye kusofwaazya moya. Muchikozyano, imwi nzila nzibakajana njakubelesya tuuka tuniini kuti tubweze zintu zisofwaazya moya. Alubo basyabusongo balikusungwaazya bantu kuti kabeenda aamawulu naakuti amabbasikili kwiinda kuti babelesye moota alubo balikusungwaazya bantu kuti babelesye minchina iitabelesyi magesi miingi mumaanda aabo.
Zimwi mfulumende zilikupa bantu zitofu zyamazubaano kuchitila kuti kusofwaazigwa kwamoya kucheye pesi bantu biingi tabanazijana pe
Pesi kweendelana alipoti yamu2022 yakaambwa aatumwi tubunga kuswaanizya akabunga kaWorld Health Organization aThe World Bank, kuli zyiingi zyeelede kuchitwa.
Kweendelana alipoti yamu2020, bantu biingi balikubelesya zintu zisofwaazya moya chiindi nibajika. Mundawu zyiingi, mbache bakonzya kujana zitofu zipya naakuti kujana zimwi zintu zyakujisya zitasofwaazyi moya.
Bbayibbili Litupa Bulangilizi
“Mboobu mbwaamba Leza mwini-mwini, Jehova, Mulengi wamajulu alimwi . . . Ooyo wakayala nyika azintu zizwa mulinjiyo, Ooyo uupa muya kubantu bakkala alinjiyo alimwi amuuya kulibaabo beendeenda alinjiyo.”—Isaya 42:5.
Leza wakalenga moya kuchitila kuti tukonzye kuyooya alubo wakalenga zilenge zisalazya moya. Ulaamanguzu miingi alubo ulabayanda bantu. Nkinkaako, zili aamutwe kusyoma kuti ulakonzya kugwisya zintu zisofwaazya moya. Langa chiiyo chitii, “Leza Usyomezya Kuti Nyika Tayizoonyonyoonwi Pe.”