“Abuze Bwami Bwako”

Jehova wakasyomezya kuti: ‘Kulila, machise, kuchiswa naa kufwa tazikoyoobako pe. Ndiyoosindula misozi yoonse kumeso aabo. Zintu zibi zyachiindi tazikayeeyegwi lubo.’

Jehova wakabikka Adamu aEva mumuunda waEdeni kuti bakkale kabali aluumuno kababotelwa. Bakeelede kukomba Wisi wabo wakujulu akuba abana biingi munyika. Adamu aEva teebakaswiilila Jehova pesi makanze aakwe taakachincha pe. Mubbuku eeli, twayiya kuti zisyomezyo zyaJehova zyoonse zilazuzikizigwa. Bwaami bwakwe buyooyeta zilongezyo zyiingi mbuli mbaakasyomezegwa Abrahamu.

Lino-lino, Saatani, madimoni aakwe abantu boonse bachita zibi bayoonyonyoonwa. Bantu boonse banookomba Jehova. Tatuchikachiswi naa kufwa. Pesi, mazuba woonse tunoobuka katusimide akubotelwa kuti tulibawumi. Nyika iyooba paradayizi. Bantu boonse bayooba azyakulya zyiingi amyuunzi iili kabotu. Kunooli bantu bali kabotu batayandi zyakulwana abatakwe lunya. Tatuchikayoowi banyama bamulusaka, abalabo tabakatuyoowi pe.

Tuyoobotelwa Jehova aakubusya bantu bakafwa. Tuyootambula bantu bachiindi bali mbuli Abbelo, Nowa, Abrahamu, Sara, Musa, Rute, Esita aDavida. Tuyoobelekaabo mukuchincha nyika kuti ibe paradayizi. Kunooli mulimu mwiingi unonezya wakubeleka.

Jehova uyanda kuti ayebo ukajanike. Uyooziba nzyayanda kwiinda nzuzi lino. Atuswene afwiifwi aJehova mazuba woonse mane kukabe kutamani!