Leza Ngwani?

Bantu biingi baamba kuti balimwizi Leza. Pesi kuti wababuzya kuti Leza ngwani, bapa nsandulo zisiyene-siyene. Bamwi baamba kuti Leza ulangisisya zintu zibi nzibachita bantu kuchitila kuti abapaniche. Bamwi baamba kuti Leza ulaaluyando alubo ulalekelela kufumbwa kuti wabisya. Alubo bamwi baamba kuti Leza takwe ndaba pe andiswe. Nsandulo eezi zisiyene-siyene zipa kuti bantu biingi baambe kuti tazichiti pe kuti bantu bamuzibe Leza.

Zilagwasya na kuziba kuti Leza ngwani? Iiyi zilagwasya. Kuziba Leza kukugwasya kuti uzibe nchuponena. (Incito 17:26-28) Kuswena afwiifwi aLeza kuyoopa kuti akuyande akuti akugwasye. (Jakobo 4:8) Kuziba Leza kuyoopa kuti ukajane buumi butamani.—Johane 17:3.

Kujana wamuziba biyeni Leza? Yeeya atala amweenzinyokwe nguzi loko. Wakamuziba biyeni? Amwi wakatalika aakuziba zina lyakwe, buntu bwakwe, nzyayanda anzyatayandi, nzyaakachita anzyayanda kuchita azimwi. Kuziba zyiingi atala amuntu ooyu kwakapa kuti ube mweenzinyina.

Andiswe tulakonzya kuziba Leza kuti twaziba nsandulo zyamibuzyo iitobela:

• ZINA LYALEZA NGWANI?

• LEZA ULAABUNTU BULIBIYENI?

• NZIIZILI ZINTU LEZA NZYAAKACHITA?

• NZIIZILI ZINTU LEZA NZYAYOOCHITA?

• KUZIBA LEZA KUJANA KWAKUGWASYA BIYENI?

Magazini eeyi iyookugwasya kujana nsandulo zizwa muBbayibbele zyamibuzyo eeyi. Zyiiyo zitobela ziyookugwasya kuti uzibe kuti Leza ngwani akuti uyookuchitilaanzi kuti waba mweenzinyina.