Kuziba Leza Kujana Kwakugwasya Biyeni?

Zyiiyo zyayinda zyatugwasya kuti tumvwisisisye kuti Leza ngwani. Kumasaangunino, Bbayibbele lyatutondeezya kuti zina lyaLeza nguJehova akuti buntu bwakwe bupati bwiinda boonse nduyando. Zimwi nzitwayiya nzyakuti kuli zimwi zintu Leza nzyaakachita anzyayoochita kunembo zigwasya ndiswe. Nikuba boobo, kuchili zyiingi nzitweelede kwiiya atala aLeza pesi ulakonzya kulibuzya kuti, kwiiya atala aLeza kujana kwandigwasya biyeni?

Jehova ukusyomezya kuti, kuti ‘wamuyanduula ulamujana.’ (1 Makani 28:9) Kuti wamuziba Leza, uyoojana chimwi chintu chiyandikana loko, ‘kumvwanana aJehova’ naakuti kuba mweenzinyina. (Intembauzyo 25:14) Kuba mweenzinyina waLeza kujana kwakugwasya biyeni?

Uyoobotelwa chachoonzyo. Jehova upandululwa kuti ‘nguLeza [“uukkomene,” NW]’ naakuti uubotelwa. (1 Timoteo 1:11) Kuti waba mweenzinyina waLeza akutobela milawu yakwe uyoobotelwa alubo tukalikataazyi azintu zyiingi. (Intembauzyo 33:12, NW) Eezi ziyookugwasya kuti upone buumi bulikabotu kwiinda mukuba abuntu buli kabotu, kukkala kabotu abamwi akutantamuka zintu zikonzya kukunjizya mumapenzi. Uzoobona majwi aasintembawuzyo kazuzikizigwa kulinduwe aakuti: “Kulandibotela kuswena kuli-Leza.”—Intembauzyo 73:28.

Uyoobona kuti Leza ulakuyanda lwako. Jehova wakasyomezya bakombi bakwe kuti: ‘Njookweenzya akubikka liso lyangu alinduwe.’ (Intembauzyo 32:8) Majwi aaya atondeezya kuti Jehova ulaandaba amuntu umwi awumwi akuti utupa zintu nzituyandikana. (Intembauzyo 139:1, 2) Kuti waba abweenzinyina bulikabotu aJehova, uyoobona kuti ulakugwasya chiindi nuli mumapenzi.

Buumi bwakunembo bulikabotu. Jehova uyanda kukugwasya kuti ubotelwe akuti ukkutisikane lino alubo uyanda kukugwasya kuti ukajane buumi bulikabotu kunembo. (Isaya 48:17, 18) Bbayibbele lyaamba kuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Mumazubaano akataazya, bulangilizi mbutulaabo buli mbuuli enka iitugwasya kuti ‘tuyume nta tutazungaani.’—BaHebrayo 6:19.

Twabona twaambo tuche buyo tutupa kuti tuyande kuziba Leza akuti tube abweenzuma bulikabotu anguwe. Kuti ujane zyiingi, ulakonzya kwaambuula awumwi waBakamboni baJehova naakuti unjile awebbusayiti iitegwa jw.org.