Kasimpe Kali Atala Amazuba Aalikunembo
Nga walikataazya na atala alyajuunza? Bbayibbele lyakaamba atala azintu zyakali kuyoochitika kumazuba aalikunembo.
Jesu wakapandulula zintu zyakali kuyootuzibya kuti “Bwami bwa Leza bulaafwaafwi.” (Luka 21:31) Wakaamba kuti kuyooba nkondo, mizuzumo yanyika, nzala amalwazi. Zintu eezi tulikuzibona kazilikuchitika mazubaano.—Luka 21:10-17.
Alubo Bbayibbele litondeezya kuti “kumazuba aamamanino” bantu kabali kulyeendelezya, bantu bakali kuyooyindilila kubisya. Zintu zichitwa aabantu bapona mazubaano zilembedwe muli 2 Timoteyo 3:1-5. Chiindi nubona zintu eezi kazilikuchitika, zilikukutondeezya aantanganana kuti zintu zyaambidwe muBbayibbele zilikuzuzikizigwa mazubaano.
Eezi zitondeezyaanzi? Zitondeezya kuti Bwaami bwaLeza bwaba aafwiifwi kuti buzoochinche nyika eeyi kuti izoobote. (Luka 21:36) MuBbayibbele mulembedwe zintu zibotu Leza nzyayoochita aanyika anzyayoochitila bantu batakakkale munyika. Nzezi zikozyano.
BWEENDELEZI BULIKABOTU
“Mpoonya [Jesu] wakapegwa bweendelezi, bulemu, alimwi abwami, kuti bantu boonse, zisi zyoonse alimwi abantu bamyaambo yoonse bamubelekele. Bweendelezi bwakwe mbweendelezi bwalyoonse alyoonse oobo ibutakamani, abwalo bwami bwakwe mbwami butakanyonyoonwi.”—DANIELE 7:14.
Eezi zyaamba kuti: Tuyoopona buumi bubotezya loko mfulumende yaLeza yaakweendelezya nyika alubo Jesu kali Mwaami wamfulumende eeyo.
TATUKACHISWI PE
“Taakwe muntu naba omwe uukkala munyika uuyakwaamba kuti: ‘Ndaciswa.’”—ISAYA 33:24.
Eezi zyaamba kuti: Tochikachiswi pe naakuti kulemana; uyoopona kukabe kutamani.
TUNOOLI MULUUMUNO
“Ulamanizya nkondo munyika yoonse mboizulwa.”—INTEMBAUZYO 46:9.
Eezi zyaamba kuti: Takuchikabi nkondo amapenzi aaba akaambo kankondo.
MUNYIKA MUYOOKKALA BANTU BALIKABOTU
“Ibantu babi tabakabi limbi pe . . . Babombe myoyo bayookona nyika.”—INTEMBAUZYO 37:10, 11.
Eezi zyaamba kuti: Bantu bataswiilili Leza banooli bagwisigwa alubo baswiilila Leza mbabo abalikke batakakkale aanyika.
NYIKA IZOOBA PARADAYIZI
“Bayooyaka maanda akukkala mulingawo, bayoosyanga myuunda yamisaansa akulya micelo yanjiyo.”—ISAYA 65:21, 22.
Eezi zyaamba kuti: Nyika yoonse iyoobota. Leza uyoozuzikizya majwi ngitukombela aakuti kuchitwe kuyanda kwakwe “ansi aano.”—Matayo 6:10.