Sumpula Zyeelelo zyaJehova Zyakulilemeka

Jehova Leza wakapa bantu malayilile ali atala ambubeelede kulijata. Muchikozyano, wakaamba kuti mwaalumi amukayintu bakwetene tabeelede kulekana. (Mt 19:4-6, 9) Takuzumizyi pe kuchita bwaamu. (1Kor 6:9, 10) Alubo wakatupa malayilile ali atala ambubeelede kuzwaata bakombi bakwe kuchitila kuti basiyane abantu bali munyika.​—Dt 22:5; 1Tim 2:9, 10.

Bantu biingi mazubaano, tabaziyandi pe zyeelelo zyaJehova zyakulilameka. (Rom 1:18-32) Batobela nzila bantu biingi mbuzwataayo ambubalijataayo. Alubo bantu biingi balawalumbayizya maponeno aabo asesemya pesi babalangilaansi aabo batatobelezyi michito yabo.​—1Pet 4:3, 4.

Mbutuli Bakamboni baJehova, tweelede kusumpula zyeelelo zyaLeza zyakulilemeka chakutayoowa. (Rom 12:9) Munzilaanzi? Kwiinda mukubuzya bamwi bantu zintu nzyayanda Leza chabupampu. Pesi andiswe tweelede kupona azyeelelo zisumpukide. Muchikozyano, chiindi nitusala nzituyanda kuzwaata, tweelede kulibuzya kuti: ‘Nzila njindizwataayo itondeezya kuti nditobelezya zyeelelo zyaJehova na, naa nzyanyika? Nzila njindizwataayo itondeezya kuti ndilamuleka na Leza?’ Alubo chiindi nitusala pulogilamu yaTV naa muvi, tweelede kulibuzya kuti: ‘Jehova uzibona biyeni nzindiyebela? Isumpula zyeelelo zyani? Zintu nzindilikondelezya azyo zipa kuti zindiyumine na kulijata kabotu? (Int 101:3) Zilabanyongania na bamumpuli naa bamwi bantu?’​—1Kor 10:31-33.

Nkamboonzi nitweelede kusumpula zyeelelo zyaJehova zyakulilemeka? Nkaambo lino-lino Kristu Jesu uyoonyonyoona nyika eeyi mbi. (Ezk 9:4-7) Pesi kuyoosyaala bantu bachita kuyanda kwaLeza. (1Joh 2:15-17) Nkinkaako, atulwanine zyeelelo zyaJehova zisumpukide kuchitila kuti bantu babona kulijata kwesu kubotu balumbayizye Leza.​—1Pet 2:11, 12.

AMWEEBELE KAVIDIYO KATI, BA MWEENZINYINA WAJEHOVA​—MWAALUMI OMWE AMWANAKAZI OMWE, MPAWO MUSANDULE MIBUZYO ITOBELA:

• Nkamboonzi nikugwasya kupona kweendelana azyeelelo zyaJehova?

• Nkamboonzi bazyali nibeelede kuyiisya bana babo zyeelelo zyaJehova kabachili baniini?

• Bapati abaniini kujana babagwasya biyeni bantu kuti bagwasigwe azyeelelo zyaJehova?