Umwi Awumwi Weelede Kusala Aakati Kachibotu Achibi
Zintu nzitusala mubuumi zilakonzya kutugwasya naakuti kupambanisya buumi bwesu kunembo. Jehova ulizizi eezi. Alubo aaka nkako kaambo apa kuti ayande kuti tupone kweendelana azyeelelo zyakwe.
Jehova Uyanda Kuti Tubotelwe Mubuumi Akuti Tube Aaluumuno.
“Mebo, nde Jehova ndime Leza wako, ndime ndikuyiisya kuti ugwasyigwe, uukusololela munzila moyelede kweendela. Eelo kaka inga cabota kuti waiswiilila milawo yangu! Aboobo luumuno lwako inga lwaba mbuli mulonga abululami bwako mbuli mayuwe aamulwizi.”—Isaya 48:17, 18.
Mbukunga Mulengi wesu, Leza ulizi kuti tweelede kupona biyeni kuti tubotelwe mubuumi. Uyanda kuti tuswiilile malayilile aakwe nkaambo ulizi kuti kuchita oobo kupa kuti tugwasigwe. Kuti twasala kutobelezya milawu yaLeza zilaantanganana kuti tuyoozwidilila mubuumi. Tuyookkala katusala zintu zipa kuti tubotelwe akuti tube aaluumuno.
Jehova Talangilili Kuti Tuchite Zintu Nzitutakonzyi Kuchita.
“Mulawo ooyu ngondimulailila sunu tauli muyumu kutobela, alimwi tauli kule.”—Deuteronomo 30:11.
Kuti katuyanda kupona kweendelana azyeelelo zyaJehova kulayandikana kuti tuchinche mizeezo yesu azintu nzituchita. Jehova talikutubuzya kuti tuchite zintu nzitutakonzyi kuchita pe. Akaambo kakuti Mulengi wesu, ulizi mputugolela. Kuti twamuziba kabotu Jehova, tulabona kuti “milawu yakwe tayimizyi pe.”—1 Johane 5:3.
Jehova Usyomezya Kubagwasya Aabo Basala Kupona Kweendelana Azyeelelo Zyakwe.
“Mebo nde Jehova Leza wako, ndilikujatide kujanza lyako lyalulyo, Ndendime Yooyo uukwaambila kuti, ‘Utayoowi pe. Mebo ndilakugwasya.’”—Isaya 41:13.
Tulakonzya kupona kweendelana azyeelelo zyaLeza akaambo kakuti zilatugwasya. Leza ubelesya Jwi lyakwe Bbayibbili kuti atusungwaazye akutupa bulangilizi.
Bantu biingi munyika balikubona kuti kupona kweendelana amalayilile aazwa muBbayibbili kulikuchincha buumi bwabo. Ulayanda na kwiiya zyiingi atala amalayilile aazwa muBbayibbili? Ulakonzya kuchita oobo kwiinda mukwiiya kabbuku kategwa Mbukonzya Kubotelwa Mubuumi Kukabe Kutamani! kajanika aajw.org alubo takabbadalisigwi pe. Kali aazyiiyo eezi:
Kujana Bbayibbele Lyakugwasya Biyeni?
Bbayibbele Litupa Bulangilizi
Ulazisyoma Na Zyaambwa aaBbayibbele?
Nwanoobala Jwi lyaLeza Bbayibbili, ulabona kuti lichibeleka nikuba mazubaano akuti “[lilasyomeka] ciindi coonse, lino mane kukabe kutamani.” (Intembauzyo 111:8) Kutobelezya malayilile aajanika muBbayibbili nkusala kuyandikana loko nkutweelede kuchita mubuumi bwesu. Nikuba oobo, Leza tatusungilizyi pe kuti tuchite oobo. (Deuteronomo 30:19, 20; Joshua 24:15) Umwi awumwi weelede kulisalila.