Ajanika Makani aKabbuku Kamuswaangano waBuumi Amulimu Wesu
AUGUST 6-12
LUBONO LUZWA MUJWI LYALEZA | LUKA 17-18
“Amutondeezye Kulumba”
nwtsty makani aakwiiya ajanika muli Lk 17:12, 14
basichinsenda bali kkumi: Chiindi, basichinsenda naakuti bantu bakali azipele, bakali kukkala aamwi naakuti kabali biingi kuchitila kuti bagwasyanie. (2Bam 7:3-5) Kweendelana aMulawu waLeza, bantu bakali azipele bakeelede kukkala abalikke aanze aamuunzi. Muntu wakali azipele wakeelede koompolola katii: “Ndilisofweede, Ndilisofweede!” (Lev 13:45, 46) Kweendelana aMulawu, basichinseda bakayimvwi kule aJesu.—Langa makani aakwiiya ajanika muli Mt 8:2 aBupanduluzi Bwamabala, “Chinsenda; Sichinsenda.”
kamuya mukalitondezye kubapayizi: Jesu Kristu kachili aanyika, wakali munsi aMulawu alubo wakali kubalemeka bapayizi baluzubo lwaAroni, nkinkaako wakabuzya bantu bakali aazipele mbaakaponia kuti bakalitondeezye kubapayizi. (Mt 8:4; Mk 1:44) Kweendelana aMulawu waMusa, bapayizi mbabo bakali kubona kuti bantu bakali aazipele bapona chachoonzyo. Kuzwa waawo, muntu wakali achipele wakeelede kuya kutempele akutola zipo ziswaanizya bayuni babili basalala, kasamu kakkedari, katambo kasalala ahisopo.—Lev 14:2-32.
w08 8/1 14-15 ¶8-9
Nkamboonzi Kulumba Nikuyandikana?
Jesu taakakubikkila maanu na kutalumba ooko? Lugwalo oolu luyungizya kuti: “Jesu wakavuwa kuti, Sena tabasalede abali kumi? Ino bali kuli abali musanu mubane? Sena taakwe waboola kulumbaizya Leza, pele oyo uwamasi?”—Lk. 17:17, 18.
Baalumi bali 9 bakali aazipele teebakali basizibi. Baalumi aaba bakatondeezya lusyomo kwiinda mukuswiilila Jesu akwiinka kuJerusalemu kuti bakalitondeezye kubapayizi. Nikuba kuti baalumi aaba bakabotelwa azintu nzyaakabachitila Jesu pesi bakakachilwa kumulumba. Nzibakachita teezyakamubotezya pe Kristu. Twiiyaanzi kunkani eeyi? Kuti umwi muntu watuchitila chimwi chintu, tulamulumba na naakuti kumulembela kagwalo kakulumba?
Kuyanduula Lubono muJwi lyaLeza
nwtsty makani aakwiiya ajanika muli Lk 17:10
tuli bazike buyo: Naakuti bazike “batakwe mulimu.” Muchikozyano eechi, Jesu taakali kwaamba kuti bazike beelede kulibona kuti tabagwasyi. Kweendelana ambaabelesedwe majwi aaya, kutondeezya kuti bazike bakeelede kulibombya kutali kulisumpula. Bamwi basikulanga-langa makani amuBbayibbele bakaamba kuti majwi aaya alakonzya kusandululwa kuti “tuli bazike biyo bateeleli kulumbayizigwa.”
nwtsty makani aakwiiya ajanika muli Lk 18:8
lusyomo oolu: Naakuti “lusyomo luli boobu.” Majwi aakuti “lusyomo oolu” atondeezya kuti Jesu wakali kwaambuula atala alusyomo lukozyenie alwamukamufu ngwakaamba muchikozyano chakwe. (Lk 18:1-8) Eezi zyakali kuswaanizya kusyoma kuti Jehova ulaswiilila nkombyo akuti uyoopa kuti bakombi bakwe bachitilwe chabululami. Jesu wakabuzya basikwiiya bakwe mubuzyo wakali kuyoobagwasya kuti balange-lange lusyomo lwabo. Chikozyano chili atala akukomba akuba alusyomo chakali kuyandikana loko nkaambo Jesu wakali wababuzya atala abuyumu-yumu mbubakali kuyooswaana.—Lk 17:22-37.
AUGUST 13-19
LUBONO LUZWA MUJWI LYALEZA | LUKA 19-20
“Zyiiyo Nzitujana Muchikozyano Chamamayina Aali Kkumi”
jy 232 ¶2-4
Chikozyano Chakwe Chamamayina Aali Kkumi
Jesu wakati: “Umwi muntu, mwana amwami, wakainka kucisi cimwi icakali kule kuti akalitambwide bwami, akaboole.” (Luka 19:12) Lweendo lwakwe lwakali lulamfu. Zilaantanganana kuti Jesu nguwe “mwana amwami” wakayinka “kucisi cimwi icakali kule” chaamba kujulu, nkwaakali kuyoopegwa bwaami aWisi.
‘Mwana wamwaami’ waambidwe muchikozyano kataniinka, wakiita bazike bakwe bali 10 akubapa mamayina mpawo wakababuzya kuti: ‘amukachite makwebo kusikila ndikaboole.’ (Luka 19:13) Mamayina yakali mali yansiliva. Mayina yomwe yakali kufozegwa muntu wabeleka kumuunda kwamyeezi iitatu.
Basikwiiya bakwe bakamvwisisisya kuti mbabo bakali kukozyanisigwa abazike bali kkumi bakapegwa mamayina nkaambo Jesu wakali wabakozyanisya abasikutebula. (Matayo 9:35-38) Taakali kwaambuula atala akutebulwa kwazilyo, pesi wakali kwaamba kuti basikwiiya bakali kuyooyanduula basikwiiya bambi bakali kuyoonjila muBwaami bwaLeza. Basikwiiya babelesya kufumbwa zintu nzibalaazyo kuti bajane bamwi basikukona Bwaami.
jy 232 ¶7
Chikozyano Chakwe Chamamayina Aali Kkumi
Kuti basikwiiya kabazi kuti mbabo bakozyanisigwa abazike babelesya zintu nzibalaazyo kuti bayanduule basikwiiya bapya, balizi kuti Jesu uyoobotelwa amulimu ngubachita. Bayooba achoonzyo chakuti uyoobalongezya akaambo kakubeleka changuzu. Basikwiiya baJesu balakonzya kubeleka munzila iisiyene-siyene nkaambo zyiimo zyabo zili siyene-siyene. Nkinkaako, Jesu ‘aakupegwa bwaami’ uyoolongezya bantu boonse bakatola lubazu mumulimu wakuchita basikwiiya.—Matayo 28:19, 20.
jy 233 ¶1
Chikozyano Chakwe Chamamayina Aali Kkumi
Muzike wakatabeleka changuzu kuti ayungizye lubono lwasimalelaakwe, wakasweekelwa. Baapostolo balangilila kuyooyendelezya aJesu muBwaami bwaLeza. Kweendelena azyakachitika kumuzike ooyu wakatabeleka changuzu, balizi kuti beelede kubeleka changuzu kuti bakajane bulumbu.
Kuyanduula Lubono muJwi lyaLeza
nwtsty makani aakwiiya ajanika muli Lk 19:43
lubaya lwazisamu zibosya. Mumagwalo achiKristu achiGrikki, bbala liti khaʹrax lijanika mulugwalo oolu luzutu. Bbala eeli lyaamba zisamu zibosya zibelesegwa kuyaka lubaya alubo basilumamba mbabo bakali kuyandisya kubelesya zisamu zili boobo. Majwi aaJesu akazuzikizigwa mu70 C.E., chiindi basilumamba bamaRoma kabazulwidwa aTitus nibakayaka lubaya luzyunguluka muunzi waJerusalemu. Titus wakali amakanze aakuti maJuda batachiji, bazumine kuti bazundwa akuti babapenzye. Kuti bajane zisamu zyakuyaka lubaya oolu, basilumamba bamaRoma bakagonka misamu yakali kuJerusalemu.
nwtsty makani aakwiiya ajanika muli Lk 20:38
nkaambo boonse mbawumi kulinguwe: Naakuti “boonse mbawumi kumeso aakwe.” Bbayibbele litondeezya kuti boonse bapona pesi kabatakwe bweenzinyina bulikabotu aLeza balifwide kulinguwe. (Ef 2:1; 1Tim 5:6) Mbukubede akubakombi baJehova basyomeka bakafwa, kuli mbuuli kuti mbawumi kuli nguwe nkaambo chisyomezyo chakwe chakuti uyoobabusya nchachoonzyo.—Rom 4:16, 17.
AUGUST 20-26
LUBONO LUZWA MUJWI LYALEZA | LUKA 21-22
“Kunununwa Kwanu Kuli Afwiifwi”
kr 226 ¶9
Bwaami BwaLeza Buyoogwisya Basinkondonyina
9 Zintu Ziyoosya Ziyoochitika Kujulu. Jesu wakaamba kuti: “Izuba liyoosizigwa, awalo mweezi uyooleka kupa mumuni wawo, azyalo nyeenyezi ziyooloka kuzwa kujulu.” Zili antanganana kuti bantu tabakalangilili kuti beendelezi bazikombelo babazulwide nkaambo tabachinoobaboni mbuuli bazulwidi. Jesu wakali kwaamba atala azintu ziyoochitika kujulu na? Zilakonzeka. (Is. 13:9-11; Joel. 2:1, 30, 31) Bantu bayoochita biyeni baakubona zintu eezi? ‘Bayooba mumapenzi akukataazigwa’ akaambo ‘kakubula zyakuchita.’ (Lk. 21:25; Zef. 1:17) Basinkondonyina baLeza kuswaanizya ‘baami baansi’ “bayooyoowa akulangila zintu iziciza” alubo bayooyanduula busena bwakuyuba. Pesi tabazoobujani pe busena mubakonzya kuyuba bukali bwaMwaami.—Lk. 21:26; 23:30; Ciy. 6:15-17.
w16.01 10-11 ¶17
Amuzumanane ‘Kuyanda Bakombinyokwe’
17 ‘Amube basichamba.’ (Bala BaHebrayo 13:6.) Kusyoma Jehova kupa kuti tutayoowi nikuba kuti twaswaana buyumu-yumu buli biyeni. Alubo kutayoowa kutugwasya kuti tube amaboneno aalikabotu. Kuyanda bakombima akuba amaboneno aalikabotu kuyoopa kuti tubasugwaazye. (1 Tes. 5:14, 15) Nikuba muchiindi chamapenzi mapati aawo bantu boonse nibanooyoowede, ‘tuyoolanga kujulu akulungumana mitwe yesu’ nkaambo kunununwa kwesu kunooli kwaba afwiifwi.—Lk. 21:25-28.
w15 7/15 17-18 ¶13
“Kunununwa Kwanu Kuli Afwiifwi”
13 Bantu bakozyanisigwa ampongo, bayoomvwa biyeni baakumvwa kuti beelede ‘kunjila mumapenzi atamani’? ‘Bayoolila.’ (Mt. 24:30) Pesi beenzinyina baJesu abakombi baLeza basyomeka bayoolimvwa biyeni muchiindi eecho? Kabasyomede chakumaninina kuli Jehova Leza akuMwanaakwe Jesu Kristu, bayootobela majwi aaJesu aakuti: “Pele zyatalika kucitika ezi zintu, amulange mujulu, mulungumike mitwe yanu, nkaambo kunununwa kwanu kuli afwaafwi.” (Lk. 21:28) Nisimpe tuyoobotelwa katuli achoonzyo chakuti tuyoofutulwa.
Kuyanduula Lubono muJwi lyaLeza
nwtsty makani aakwiiya ajanika muli Lk 21:33
Julu anyika ziyoomana: Amwi Magwalo atondeezya kuti julu aanyika zinooliwo lyoonse. (Matl 9:16; Int 104:5; Muk 1:4) Nkinkaako, majwi aaJesu aali mulugwalo oolu atondeezya kuti mbukunga tazichitiki kuti julu anyika zizoomane mbukubede amajwi aakwe, ayoozuzikizigwa nikuba kuti kwaba biyeni. (Kozyanisya Mt 5:18) Nikuba boobo, julu anyika zyaambidwe mulugwalo oolu nzyakukozyanisya alubo zyeendelana ‘julu lyakusaanguna anyika yakusaanguna’ zyaambwa muli Ciy 21:1.
majwi aangu taakamani pe: Bbala liti “taakamani” aliti “pe” atondeezya kuti Jesu wakali kuzikitizya kaambo kakuti majwi aakwe akali kuyoozuzikizigwa.
w14 10/15 16-17 ¶15-16
Muyoondibeda ‘Bwaami bwaBapayizi’
15 Naakachita Chilalilo chaMwaami chaGoko, Jesu wakachita chizuminano abasikwiiya bakwe basyomeka, chizuminano eecho chaambwa kuti nchizuminano chaBwaami. (Bala Luka 22:28-30.) Kusiyana azizuminano zimwi zyakachitwa aJehova, chizuminano eechi chakachitwa aJesu abatobeli bakwe bananikidwe amuuya. Majwi aaJesu aakuti “mbubonya Taata mbwakandibika,” atondeezya kuti Jesu wakali kwaambuula atala achizuminano chaJehova chakumubikka kuti abe “mupaizi walyoonse, mbubonya mbuli Melkisideke.”—Heb. 5:5, 6.
16 Baapostolo bali 11 basyomeka ‘bakakakatila kuli Jesu mumapenzi aakwe.’ Chizuminano chaBwaami chakabagwasya kubona kuti bakali kuyoojana bulumbu bwakukkala azyuuno zyaBwaami kabeendelezya akuba bapayizi. Baapostolo basyomeka bali 11 teembabo luzutu bali aachilongezyo chakweendelezya. Mwaapostolo Johane wakabona Jesu muchilengaano mpawo wakamubuzya kuti: “Oyo uuzunda njoomuzumina kukala ambe acuuno cangu, mbubonya mbundakazunda ambebo aboobo sunu ndikede a-Taata acuuno cakwe.” (Ciy. 3:21) Nkinkaako, chizuminano chaBwaami chiswaanizya maKristu bananikidwe bali 144 000. (Ciy. 5:9, 10; 7:4) Chizuminano eechi chitondeezya kuti baleelela kuyooyendelezya aJesu kujulu. Eezi zilikozyenie aamwana wamwaami wakwatwa amwaami mpawo wajana chilongezyo chakwendelezya amwaami. Magwalo atondeezya kuti maKristu bananikidwe bali mbuuli ‘mwanakazi’ waKristu naakuti “musimbi uusalala” wakasyomezegwa kukwatwa aKristu.—Ciy. 19:7, 8;21:9; 2 Kor. 11:2.
AUGUST 27–SEPTEMBER 2
LUBONO LUZWA MUJWI LYALEZA | LUKA 23-24
“Libambile Kulekelela Bamwi”
cl 297 ¶16
“Kuziba Luyando lwaKristu”
16 Jesu wakatondeezya luyando luli mbuuli lwaWisi nkaambo wakali ‘kufwambaana kulekelela.’ (Intembauzyo 86:5) Wakatondeezya kuti ulayanda kulekelela bamwi nikuba chiindi naakali achisamu chakupenzezya. Niinzi nchaakachita chiindi naakagankaminwa aachisamu chakupenzezya? Wakakumbila Wisi kuti asubule bantu bakali kumupenzya na? Peepe, pesi wakati: “Taata, ubajatile, nkaambo tabezi ncobacita.”—Luka 23:34.
g 2/08 11 ¶5-6
Leza Ulazilekelela Na Zibi Zipati?
Jehova talangi chibi pesi ulanga mbalimvwa muntu wabisya atala achibi nchaachita. (Isaya 1:16-19) Atulange-lange chikozyano chabasizibi babili bakajayigwa antoomwe aJesu. Zili antanganana kuti baalumi aaba bakachita zibi zipati nkaambo umwi wakati: “Swebo ncobeni kuliluleme nkaambo twatambuula iceelede milimo yesu, pele walo [Jesu] taakwe naabisya cintu.” Sizibi ooyu wakatondeezya kuti kuli nzyakazi atala aJesu. Eezi zyakapa kuti achinche. Majwi ngaakayungizya atondeezya kuti wakali wachincha. Wakabuzya Jesu kuti: “Ukandiyeeye, Mwami waakusika mubwami bwako.” Jesu wakamusandula biyeni? Wakati: ‘Nchobeni ndakwaambila sunu kuti, tunoli ayebo muParadayizi.’—Luka 23:41-43.
Yeeya atala azeezi: Jesu kali waba afwiifwi kufwa, wakamufwida luzyalo mwaalumi wakali wapegwa chisubulo chalufu. Makani aaya alawumbulizya. Tulaachoonzyo chakuti Jehova aJesu balabafwida luzyalo basizibi kuti bachincha.—BaRoma 4:7.
cl 297-298 ¶17-18
“Kuziba Luyando lwaKristu”
17 Jesu wakatondeezya kuti ulalekelela chachoonzyo chiindi naakalekelela mwaapostolo Petro. Petro wakali kumuyanda Jesu. MuNisani 14, buzuba Jesu naakafwa, Petro wakamubuzya kuti: “Omwami, ndilibambide kwiinka ayebo, nokuba kuntolongo, nokuba kulufu.” Pesi muma-awa mache akatobela, Petro wakamukaka Jesu kwaziindi zitatu. Bbayibbele litubuzya kuti chiindi Petro naakakaka Jesu kachitatu, “Mwami wakacebuka wamulanga Petro.” Petro wakakataazikana atala azeezi nkinkaako “wakazwa waakulila akulila.” Mbukunga Jesu wakafwa mubuzuba oobo, kulakonzeka kuti mwaapostolo Petro wakali kulibuzya kuti, ‘Mwaami wandilekelela na?’—Luka 22:33, 61, 62.
18 Mubuzyo waPetro wakasandulwa chakufwambaana. MuNisani 16 Jesu wakabusigwa alubo wakabonana aPetro mubuzuba oobo. (Luka 24:34; 1 BaKorinto 15:4-8) Nkamboonzi Jesu naakasala kubonana aPetro nikuba kuti wakali mukakide? Kulakonzeka kuti Jesu wakali kuyanda kugwasya Petro kuti azibe kuti wakachili kumuyanda. Alubo Jesu wakamubuzya majwi atondeezya kuti wakachili kumuyanda.
Kuyanduula Lubono muJwi lyaLeza
nwtsty makani aakwiiya ajanika muli Lk 23:31
chisamu nochichili chitete, . . . chaakuyuma: Jesu wakali kwaamba chisi chamaJuda. MaJuda bakali mbuuli chisamu chitete nkaambo Jesu wakachiliwo alubo bamwi bakali kumusyoma. Mukuya kwachiindi, Jesu wakali kuyoojayigwa alubo maJuda basyomeka bakali kuyoonanikwa amuuya uusalala kuti babe maIsrayeli bakumuuya. (Rom 2:28, 29; Gal 6:16) Muchiindi eecho, chisi chamaIsrayeli chakali kuyooba mbuuli musamu wayuma nkaambo bakali kuyoofwa mubukombi.—Mt 21:43.
nwtsty makani aakwiiya aachifanikisyo
Chipikili Muchifuwa Chakukasindi
Chifanikisyo chitondeezya chifuwa chakukasindi kamuntu chigankamidwe chipikili chilampa masentimita aali 11, 5. Chifuwa eechi chakajanika mu1968 kuJerusalemu nkwiili kumusanza, chiindi nibakali kusya akuyanduula zintu zyachiindi. Alubo chakalembedwe minyaka iitondeezya chiindi nikwakali kweendelezya chisi chaRoma. Eezi zitondeezya kuti chiindi zipikili zyakalikubelesegwa kukugankamina bantu azisamu. Kulakonzeka kuti zipikili eezi zileelene azyabakabelesegwa abasilumamba bamaRoma nibakali kugankamina Jesu Kristu aachisamu. Chifuwa eechi chakajanika mubbokesi lyakapangidwe amabwe lyakali kubikkilwa zifuwa zyamuntu wakafwa. Alubo eezi zitondeezya kuti muntu wagankaminwa aachisamu wakali kuvwikkwa.