Aajanika Makani aaKabbuku Kamuswaangano waBuumi Amulimu Wesu
MARCH 4-10
LUBONO LUZWA MUJWI LYALEZA | BAROMA 12-14
“Mbutukonzya Kutondeezya Luyando lwachiKristu”
it-1 55
Kuyandana
MaKristu beelede kubatondeezya luyando lwabunyina boonse bali mumbungano (Bbala lyachiGrikki litii, phi·la·del·phiʹa, lyakasandululwa kuti, “kuyanda mweenzinyokwe”). (Rom 12:10; Heb 13:1; langa 1Pet 3:8.) Nkinkaako, maKristu beelede kuyandana mbuuli mbubachita bantu bamumpuli iimwi. Nikuba kuti maKristu balakonzya kutondeezyania luyando lwabunyina pesi basungwaazigwa kuti bazichite chakumaninina.—1Tes 4:9, 10.
Bbala lyachiGrikki liti phi·loʹstor·gos, lyakasandululwa kuti “kuba aaluyando,” libelesegwa kumuntu nguzi kabotu. Bbala eeli lizwa mubbala lyachiGrikki liti sterʹgo, chiindi chiingi libelesegwa kupandulula luyando ndubatondeezyania bantu bamumpuli iimwi. Mwaapostolo Pawulu wakasungwaazya maKristu kuti batondeezyanie luyando luli boobu. (Rom 12:10) Pawulu wakaamba kuti mazuba aakumamanino ayooboneka aabantu ‘batakwe luyando lwakuzyalwa aandulo’ (MuchiGrikki, aʹstor·goi) alubo wakayungizya kuti bantu bali boobu beelede kunyonyoonwa.—2Tim 3:3; Rom 1:31, 32.
w09 10/15 8 ¶3
‘Amube Aaluumuno Abantu Boonse’
3 Bala BaRoma 12:17. Pawulu wakatondeezya kuti tatweelede kubweedezya pe kuti teetwajatwa kabotu. Bantu bali mumpuli zilaabamwi batali Bakamboni balakonzya kugwasigwa kuti baswiilila malayilile aaya. MuKristu uukwetene amuntu uutakombi teelede kusandula bubi naakuti kuchita chintu chibi kuti ngwakwetenaawe wamubisizya. ‘Kubweedezya chibi kuchibi’ takugwasyi pe pesi kulakonzya kupa kuti zintu zyiindilile kubija.
w07 7/1 24-25 ¶12-13
‘Mutabweedezyi Chibi Kuchibi’
12 Pawulu wakalayilila atala ambutweelede kubajata bantu mbitukombaabo abatakombi naakati: ‘Mutabweedezyi chibi kuchibi.’ Majwi aaya aleendelana amajwi ngaakasaanguna kwaamba atii: “Amusesemwe kububi.” Pesi zilachita na kuti muntu aambe kuti ulabusesemwa bubi kuti kabweedezya chibi kuchibi? Kuchita oobo kutondeezya kuti muntu ooyo ulaaluyando “lwakuupaupa ameso.” Kuzwa waawo, Pawulu wakati: ‘Amuchite zibotu kuti bantu boonse bazibone.’ (BaRoma 12:9, 17) Kujana twaabelesya biyeni malayilile aaya?
13 Kumasaangunino aalugwalo ndwaakalembela maKristu bakuKkorinto, Pawulu wakalemba atala akupenzegwa kwabaapostolo. Wakati: ‘Twaba cheebelo kumeso aanyika yoonse, nibaba bangelo nibaba bantu. . . . Chiindi nitwaambilwa chisapi tulalumba, achiindi nitupenzegwa tulawumuna, achiindi nitutukilwa tulakombelezya.’ (1 BaKorinto 4:9-13) Nikuba mazubaano, bantu bali munyika balalangisisya nzila maKristu njibachitaayo. Kuti bantu babona kuti tulazumanana kuchita zintu zilikabotu nikuba katutajatwi kabotu, balakonzya kuyanda kuswiilila mulumbe ngutukambawuka.—1 Petro 2:12.
w12 11/15 29 ¶13
Amulekelelane Amoyo Woonse
13 Chimwi chiindi tulakonzya kugwasya muntu watubisizya kuti abelesye malayilile aachiKristu. Mwaapostolo Pawulu wakati: ‘Kuti sinkondonyoko wafwa nzala, mupe chakulya, kuti wafwa nyota, mupe maanzi, nkaambo kuti wachita oobo unoolundika makala aamulilo aamutwe wakwe. Utazundwi kububi pe, uzunde bubi kukuchita bubotu.’ (Rom. 12:20, 21) Kuti twabachitila zintu zilikabotu bantu batatujati kabotu, tulakonzya kupa kuti myoyo yabo ichinche. Kuba aamaboneno aalikabotu akubafwida luzyalo aabo batubisizya, kulakonzya kupa kuti bayande kwiiya kasimpe. Kufumbwa kuti bayoochincha naakuti tabakachinchi, kusandula munzila iilikabotu kulakonzya kutondeezya kuti tuli bantu balikabotu.—1 Pet. 2:12; 3:16.
Kuyanduula Lubono muJwi lyaLeza
Mbotukonzya Kusala Zyakulikondelezya Zili Kabotu
5 Zintu zyoonse nzuchita mubuumi zilajatikizigwa mukukomba Jehova. Mulugwalo ndwakalembela bantu bakuRoma, Paulo wakasimya kasimpe aako kubakombinyina. Wakabasungwaazya kuti: “Mutuule mibili yanu, ibe cipaizyo cuumi, cisalala ciyandisi kuli-Leza, mbubonya bukombi bwanu bwakumoyo.” (BaRoma 12:1) Mubili wako uswaanizya miyeeyo, moyo amanguzu aako. Zintu zyoonse eezi ulazibelesya kukubelekela Leza. (Marko 12:30) Paulo wakaamba kuti kubeleka chamoyo woonse kuli mbuli chipayizyo. Majwi aakuti “cipaizyo” alaancheenjezyo itali antanganana. Mumulawu waMusa, chipayizyo chakalaa kampenda teechakali kutambulika pe kuli Leza. (Levitiko 22:18-20) Mbumbubo, ikuti chipayizyo chamuKristu kachilaa kampenda tachikoyootambulika pe kuli Leza. Kujana eezi zyachitika biyeni?
6 Paulo wakasungwaazya maKristu akuRoma kuti: “Mutaabili zibi zizo zyanu mbuli zicityo zyakutalulama.” Alubo, Paulo wakababuzya kuti bakeelede ‘kujaya milimo yanyama.’ (BaRoma 6:12-14; 8:13) Kumatalikilo aalugwalo lwakwe, Paulo, wakapa zikozyano ‘zyamilimo yanyama.’ Kujatikizya bantu balaa chibi, wakati: “Mukanwa lyabo mulizwide matusi.” “Maulu abo ali aluno lwakutila bulowa.” “Taakwe buyoowi bwaLeza kumeso aabo.” (BaRoma 3:13-18) MuKristu ulakonzya kusofwaazya mubili wakwe ikuti wabelesya “zizo” zyakwe kukuchita michito mibi. Muchikozyano, ikuti muKristu kalikweebela zintu zisesemya zili mbuli ponogilafu naa zyakulwana, unooli ulii ‘kwaabila [meso aakwe] muzichityo zyakutalulama,’ alimwi unooli uliikusofwaazya mubili wakwe woonse. Kufumbwa chintu nchachita mubukombi bwakwe chinooli chaba chipayizyo chitasalali pe alimwi chitatambuliki pe kuli Leza. (Deuteronomo 15:21; 1 Petro 1:14-16; 2 Petro 3:11) Kusala zyakulikondelezya zitali kabotu nkulyuuma nkoli mumazwi!
w08 6/15 31 ¶4
Makani Aazwa Mubbuku lyaBaRoma
13:1—Nkamboonzi nikutegwa beendelezi ‘babikkidwe aaLeza’? Beendelezi ‘babikkidwe aaLeza’ mukuti Leza nguwe uubazumizya kuti beendelezye alubo bumwi bweendelezi bwakasinsimwa aLeza. Eezi zilaantanganana mubusinsimi buli muBbayibbele buli atala abeendelezi bamwi.
MARCH 11-17
LUBONO LUZWA MUJWI LYALEZA | BAROMA 15-16
“Tweelede Kulangila Kuli Jehova Kuti Atusimye Akuti Atuumbulizye”
w17.07 14 ¶11
‘Amulile Abalila’
11 MuBbayibbele kuli makani aakonzya kutuumbulizya, muchikozyano Jesu wakalila Lazaro naakafwa. Nisimpe kuti, ‘makani aakalembwa chiindi akalembelwa kuti twiiye kuchitila kuti tulisimye, tuumbulizigwe akuti tube aabulangilizi.’ (Rom. 15:4) Kuti kuli mubuumba, magwalo aatobela alakonzya kukuumbulizya:
▪ “Jehova uli afwaafwi kubawizukide mumoyo, ulafutula batete myuuya.”—Int. 34:18, 19.
▪ “Miyeeyo minji iikataazya na yaata mumoyo wangu, kuumbulizya kwako [Jehova] nkokundikondezya.”—Int. 94:19.
▪ “Elyo walo Mwami wesu Jesu Kristo, a-Leza Taateesu, uwakatuyanda akutupa luumbulizyo lutamani abulangizi bubotu, aumbulizye myoyo yanu caluzyalo akumuyumya.”—2 Tes. 2:16, 17.
w16.04 14 ¶5
‘Amulekele Kulisimya Kuti Kumaninsye Mulimu Wako’
5 Kumbila Jehova kuti akusimye. Jehova Leza ‘ulatusimya akutuumbulizya.’ (Rom. 15:5) Leza nguwe alikke uukonzya kwaaziba kabotu mapenzi ngituswaana alubo ulakonzya kuziba zyiimo zyesu, mbutulimvwa ambutulengedwe. Nkinkaako, nguwe uukonzya kutusimya. Bbayibbele lyaamba kuti: ‘Bamuyoowa, ulabachitila mbubayanda, ulamvwa kulila kwabo akubafutula.’ (Int. 145:19) Leza utusandula biyeni chiindi nitukumbila kuti atusimye?
w14 6/15 14 ¶11
Weelede ‘Kuyanda Jehova Leza Wako’
11 Jehova ‘utupa bulangilizi butugwasya kuti tubotelwe akuti tube aaluumuno.’ (Rom. 15:13) Bulangilizi mbwatupa Leza butugwasya kuti tulisimye chiindi nituli mumapenzi. MaKristu bananikidwe aamuuya kuti ‘basyomeka mane do kusikila kulufu, bayoopegwa musini wabuumi bwakujulu.’ (Ciy. 2:10) Bantu bali aabulangilizi bwakupona aanyika kuti bazumanana kusyomeka, bayoopona kukabe kutamani muParadiyizi. (Lk. 23:43) Bulangilizi oobu bupa kuti tulimvwe biyeni? Bweelede kupa kuti tukkale katubotelwa, katulaaluumuno alubo katuyanda Sikutupa ‘zipo zibotu zimaninide.’—Jak. 1:17.
Kuyanduula Lubono muJwi lyaLeza
w89 12/1 24 ¶3
‘Luyando Lwanu Ndwachoonzyo’ Na?
Nisimpe kuti maKristu bakatali maJuda bakeelede kugwasya bakombinyina bakali mubuyumu-yumu. MaKristu bakatali maJuda bakali ‘aachikwelete’ kumaKristu bakali kukkala kuJerusalemu. Bantu bakatali maJuda teebakakambawukilwa makani mabotu na amaKristu bakali kuzwa kuJerusalemu? Pawulu wakabuzya maKristu bakatali maJuda kuti: ‘Mbukunga mwakatambula chaabilo chazintu zyamuuya zyamaKristu maJuda, andinywe mweelede kubapa chaabilo chazintu zyanu zyanyama.’—BaRoma 15:27.
it-1 858 ¶5
Kuziba Zilikunembo, Kubambilwa Zilikunembo
Mesiya naakuti Kristu nguwe wakasyomezedwe kuti wakali kuyoopa kuti bantu boonse baluleme bakalongezegwe. (Gal 3:8, 14) “Lunyungu” oolu lwakasaanguna kwaambwa chiindi Adamu aEva nibakapapila, Abbelo katanazyalwa. (Matl 3:15) Kwakatola minyaka iisika ku4 000 kuti kuzibwe kuti lunyungu lwaambidwe ‘mumakani aasisidwe’ wakali Mesiya. Zilaantanganana kuti makani aaya akatola ‘chiindi chilamfu’ kuti ayubununwe.—Rom 16:25-27; Ef 1:8-10; 3: 4-11.
MARCH 18-24
LUBONO LUZWA MUJWI LYALEZA | 1 BAKORINTO 1-3
“Uli Muntu Uuzulwidwa Amuuya Na Naakuti Uuzulwidwa Azisusi Zyanyama?”
Chambaanzi Kubikkila Maanu Muzintu Zyabukombi?
4 Atusaangune kulanga-langa mbabede muntu uuzulwidwa azisusi zyanyama. Bantu beendelezegwa aaSaatani, babikkila maanu kuzintu zyakumubili. Pawulu wakapandulula kuti bantu aaba bazulwidwa ‘amuuya uubeleka sunu mumyoyo yabana bakasampusampu.’ (Ef. 2:2) Muuya ooyu usungwaazya bantu kuti batobelezye zichitwa aabamwi. Eezi zyapa kuti bantu bachite zintu ziyandwa amyoyo yabo, kabataponi kweendelana azyeelelo zyaLeza. Muntu uuzulwidwa azisusi zyanyama ubikkila maanu kapati kuzintu zikonzya kupa kuti abe ampuwo naakuti uchita zintu ziyandwa amoyo wakwe.
5 Niinzi chimwi chikonzya kutondeezya mbabede muntu uuzulwidwa azisusi zyanyama? Nkuchita “milimo yanyama.” (Gal. 5:19-21) Mulugwalo lwakusaanguna ndwaakalembela mbungano yakuKkorinto, Pawulu wakaamba zintu zitondeezya milimu yanyama. Zintu eezi ziswaanizya kutamvwanana, kusalulana, kusungwaazya muuya wakupapila, kutolana kunkuta, kutalibombya kubusilutwe akuba bayindilizya kulya akunywa. Muntu uuzulwidwa azisusi zyanyama ulafwambaana kuzundwa amasunko. (Tus. 7:21,22) Juda wakati kumamanino bantu baliboobo ‘ngabazooleka kubikkila maanu muzintu zyabukombi.’—Jud. 18, 19.
Chambaanzi Kubikkila Maanu Muzintu Zyabukombi?
6 Ulibiyeni “muntu uusololelwa amuuya”? Ubikkila maanu muzintu zyabukombi. Bantu bazulwidwa amuuya ‘batobelezya Leza.’ (Ef. 5:1) Eezi zyaamba kuti babeleka changuzu kuti babone zintu mbuuli mbazibona Jehova. Basyoma kuti Leza mpali chachoonzyo. Kusiyana abantu bazulwidwa azisusi zyanyama, bapona kweendelana azyeelelo zyaJehova. (Int. 119:33; 143:10) Muntu uzulwidwa amuuya tabikkili maanu kuzisusi zyanyama pesi ubeleka changuzu kuti abe ‘amichelo yamuuya.’ (Gal. 5:22, 23) Kuti tumvwisisisye mbabede “muntu uusololelwa amuuya” atuyeeye chikozyano chitobela: Muntu uuyandisya zyabbizinesi waambwa kuti ubikkila maanu kuli zyabbizinesi. Nkinkaako muntu uuyandisya zintu zyabukombi waambwa kuti ubikkila maanu kulinzizyo.
Chambaanzi Kubikkila Maanu Muzintu Zyabukombi?
15 Kujana twamutobelezya biyeni Kristu? Lugwalo lwa1 BaKorinto 2:16 lwaambuula atala akuba ‘amiyeeyo yaKristu.’ Alubo lugwalo lwaBaRoma 15: 5 lutondeezya kuti tweelede kuba ‘amizeezo njakalaayo Kristu Jesu.’ Kuti tutobelezye Kristu tweelede kuziba mbaakali kuyeeya abube bwakwe. Mpawo tweelede kutobelezya mikondo yakwe. Jesu wakali kubikkila maanu kubweenzinyina mbwalaabo aWisi. Nkinkaako, kutobelezya chikozyano chaJesu kulikozyenie akutobelezya Jehova. Eezi zitondeezya kuti kulayandikana kutobelezya chikozyano chaJesu.
Kuyanduula Lubono muJwi lyaLeza
it-2 1193 ¶1
Busongo
Mubusongo bwayo nyika yakakaka Kristu, chipo Leza nchaakapa. Nikuba kuti beendelezi bakali aamanguzu aakubeteka pesi ‘bakajaya Mwaami uulemekwa.’ (1Kor 1:18; 2:7, 8, NW) Pesi Leza wakatondeezya kuti busongo bwanyika mbufuba-fuba. Wakafubaazya baalumi basongo kwiinda mukubelesya zintu nzibakali kwaamba kuti ‘mbufuba-fuba bwaLeza’ kuswaanizya abantu mbibakali kulangilaansi ambibakali kwaamba kuti ‘mbafuba-fuba, tabakwe manguzu’ kuti azuzikizye makanze aakwe. (1Kor 1:19-28) Pawulu wakagwasya maKristu bakuKkorinto kuti bayeeye kuti ‘busongo bwanyika abusongo bwabeendelezi’ bali munyika buyoomana. Baapostolo teebakali kubelesya busongo bwanyika nibakali kukambawuka. (1Kor 2:6, 13) Alubo Pawulu wakachenjezya maKristu bakuKkolose kuti bateenwi ‘kwiinda mubusongo bwabantu akukwaamba makani aatawo aazwa kutunsiya-nsiya twabantu.’—Kol 2: 8; kozyanisya avesi 20-23.
w08 7/15 27 ¶6
Makani Aazwa Mubbuku lyaBaKorinto
2:3-5. Kulakonzeka kuti Pawulu wakali kukataazikana kuti wakali kuyookonzya na kubakambawukila munzila iibasika aamoyo bantu bakuKkorinto bakali kuyandisya zyabusongo bwamaGrikki. Nikuba boobo, Pawulu taakazumizya kuyoowa kuti kupe kuti aleke kuchita mulimu ngwaakapedwe aaLeza. Andiswe mazubaano tatweelede kuzumizya zyiimo ziyumu nzituswaana mumulimu wakukambawuka kuti zitukachizye kukambawuka makani mabotu aaBwaami bwaLeza. Tweelede kusyoma kuti Jehova uyootugwasya mbuuli mbaakagwasya Pawulu.
MARCH 25-31
LUBONO LUZWA MUJWI LYALEZA | 1 BAKORINTO 4-6
“Bumena Buche Bupa Kuti Fulawa Yoonse Ifufumuke”
it-2 230
Bumena
Mwaapostolo Pawulu wakabelesya chikozyano chabumena naakali kulayilila maKristu bakuKkorinto kuti bagwisye muntu wakali kuchita bwaamu mumbungano. Wakati: ‘Tamuzi na kuti bumena buche bufufumusya mulwi woonse? Amugwisye bumena bwachiindi, kuti mube mulwi mupya. Inywe tamujisi bumena, nkaambo chipayizyo chesu chaPasika chakajayigwa kale, nguKristu.’ Pawulu wakazoopandulula nchaakali kwaamba achikozyano ‘chabumena.’ Wakati: ‘Atusekelele pobwe, pesi kusekelela kwesu kutabi aabumena bwachiindi abumena bwachibi abubi pe, kube kwachinkwa chitakwe bumena chichitwa aamoyo woonse amukasimpe.’ (1Kor 5:6-8) Pawulu wakabelesya chikozyano chaPobwe Lyazinkwa Zitakwe Bumena lyakali kuchitwa amaJuda kwayinda Pobwe lyaPasika. Mbukunga bumena buche bupa kuti fulawa iikkovedwe ifufumuke naakuti ibile, mbukubede mbungano yoonse yakali kuyoosofwaala mumeso aaJehova kuti baleka kugwisya muntu wakali kuchita bwaamu. Nkinkaako, mbungano yakeelede kugwisya “bumena” aakati kayo mbuuli mbubakali kuchita maIsrayeli nkaambo bakali kugwisya bumena mumaanda aabo chiindi chapobwe.
it-2 869-870
Saatani
Chaambaanzi ‘kwaaba sikubisya kuli Saatani kuti nyama inyonyoonwe’?
Chiindi Pawulu naakali kulayilila mbungano yakuKkorinto atala akugwisya muntu wakali kuchita zintu zitondwa amwanakazi wawisi wakati: ‘Amwaabe muntu ooyo kuli Saatani kuti nyama inyonyoonwe.’ (1Kor 5:5) Malayilile aaya akatondeezya kuti bamumbungano bakeelede kugwisya muntu ooyu aakati kabo akutaliswaanizya anguwe. (1Kor 5:13) Kwaaba sikubisya kuli Saatani kwakali kutondeezya kuti muntu ooyo tachikwe bulyidilano abamumbungano pesi waba kubbazu lyabantu beendelezegwa aaSaatani. Muntu wabisya wakali mbuuli ‘bumena buche’ bubikkwa ‘mumulwi wafulawa’ nkaambo wakali kuchita ziyandwa ‘aanyama’ zyakali kusofwaazya mbungano. Nkinkaako, kugwisya sikubisya mumbungano kwakali mbuuli kuti banyonyoona michito ‘yanyama’ aakati kabo. (1Kor 5:6, 7) Pawulu wakatobelezya bubambe oobu kwiinda mukwaaba Hameniyasi a-Alekizanda kuli Saatani nkaambo lusyomo lwabaalumi aaba lwakali lwanyonyooka mbuuli bwaato.—1Tim 1:20.
lv 207-209, makani aakuyungizya
Mbotukonzya Kukkalaa Muntu Wakagwisigwa Mumbungano
Kulachisa kubona nzubo yako naa mweenzinyokwe kagwisigwa mumbungano akaambo kakuteempwa kuzibi zyakwe. Nzila njitubonaayo malayilile aazwa muBbayibbele atalaa nkani eeyi, iyootondeezya kuti tulamuyanda Leza akuti tulasyomeka kumabambe aakwe. Atulange-lange mibuzyo njitukonzya kulibuzya kujatikizya nkani eeyi.
Kujana twakkala biyeni amuntu wakagwisigwa mumbungano? Bbayibbele lyaamba kuti: “Kuti kuli muntu naba umwi uuambwa kuti sibunyina bwa-Kristo, pele uli sibwaamu na sikulikumbuzya na sikukomba mituni na simatusi na mukolwi na silunyanzyo, mutavwelani ayooyo pe nikuba kulya awe.” (1 BaKorinto 5:11) Kujatikizya muntu ‘uutakkali mulwiisyo lwa-Kristu,’ tubala kuti: “Mutamutambuli mun’anda yanu, mutamujuzyi, nkaambo oyu uumujuzya ulaabilwa milimo yakwe mibi.” (2 Johane 9-11) Tatweelede kwaambulaa bantu bakagwisigwa mumbungano nikuba kubajatikizya mubukombi bwesu. Ngaziyakulinda yachikuwa yamu September 15, 1981, aapeji 25, yakaamba kuti: “Kumujuzya ninzila yakutalika kwaambuzyania alimwi kulakonzya kupa kuti mube beenzinyina. Kujana twayanda kuchita oobo na kumuntu wakagwisigwa mumbungano?”
Nchachoonzyo na kuti tweelede kutantamuka naa kulekela limwi kwaambulaa muntu wakagwisigwa mumbungano? Masimpe, kuleelela. Chakusaanguna, kuchita oobo kutondeezya kusyomeka kuli Leza akuJwi lyakwe. Tuswiilila Leza kutali kuchiindi zintu nozili kabotu luzutu pesi nikuba nokuli kuyumu kuchita oobo. Kuyanda Leza kupa kuti tuswiilile milawu yakwe yoonse katuzi kuti uliluleme, ulatuyanda akuti milawu yakwe ilagwasya chiindi choonse. (Isaya 48:17; 1 Johane 5:3) Chabili, kutaambulaa sizibi uuteempwi kulatukwabilila. Alubo, kukwabilila bantu bali mumbungano kuti batasofwaazigwi mubukombi amukulijata kwabo alimwi kupa kuti mbungano yesu ibaa mpuwo mbotu. (1 BaKorinto 5:6, 7) Chatatu, kukakatila kumalayilile aazwa muBbayibbele kulakonzya kugwasya muntu wakagwisigwa mumbungano. Kwiinda mukutobela zyakasalwaa bakkomiti yalubeta, tulakonzya kugwasya sikubisya wakakaka kutambula lulayo ndwakapegwaa baalu. Kusweekelwaa choolwe chakuyanzanaa beenzinyina bamuyanda kulakonzya kumugwasya kuti ‘ayeeye’ akubona kuti wakachita chibi alimwi ziyoopa kuti abweze ntaamu kuti abweede kuli Jehova.—Luka 15:17.
Ani kuti nzubo yako yagwisigwa mumbungano? Ikuti kakuli boobo bamumpuli yako balakonzya kubaa penzi lyakusyomeka kuli Jehova. Kujana twakkala biyeni anzubo yakagwisigwa mumbungano? Mubbuku eeli, tatukonzyi kwaambuula zintu zyoonse zikonzya kuchitika kujatikizya nkani eeyi, pesi atwaambuule atalaa twaambo tubili tuyandikana.
Chimwi chiindi, muntu wakagwisigwa mumbungano ulakonzya kuti uchikkalaa bazyali bakwe. Mbukunga kugwisigwa kwakwe takumani luzubo, nkinkaako ulakonzya kujatikizigwa mukuchita imwi milimu yamumpuli. Nikuba boobo, nzyaakachita zitondeezya kuti wakalisalila kuti tanooyanzanaa bamwi kuzintu zyabukombi. Nkinkaako bamwi bamumpuli basyomeka tabamuswaanizyi pe muzintu zyabukombi. Muchikozyano, chiindi mpuli nilikuchita kukomba kwampuli, ooyo wakagwisigwa mumbungano tajatikizigwi pe muchiiyo chabo. Nikuba boobo, ikuti wakagwisigwa mumbungano kali mwana, bazyali bachilaa mukuli wakumuyiisya akumulaya. Aboobo, bazyali bakwe balakonzya kuchita mabambe aakuti bayiye Bbayibbele anguwe.—Tusimpi 6:20-22; 29:17.
Chimwi chiindi zilakonzya kuti wamumpuli wagwisigwa mumbungano takkali aabazyali naa bamwi baluzubo lwakwe. Nikuba kuti chimwi chiindi mulakonzya kwaambulaawe atalaa twaambo twamumpuli pesi tamweelede kwiindilizya. MaKristu aasyomeka aamumpuli yamuntu wakagwisigwa mumbungano tayelede kulyeena kuti aambuulaa muntu utachikkalaa bazyali naa baluzubo lwakwe. Nikuba boobo, kusyomeka kuli Jehova akumbungano yakwe kuyoopa kuti batobele mabambe aaya aazwa muMagwalo alaatalaa kugwisigwa kwamuntu mumbungano. Kuswiilila kwabo kutondeezya kuti balamuyanda sikubisya alimwi bayanda kuti agwasigwe aalulayo ndwaakapegwa.—BaHebrayo 12:11.
Kuyanduula Lubono muJwi lyaLeza
w09 5/15 24 ¶16
Bangelo—“Myuuya Iimubelekela”
16 MaKristu nibali mumapenzi ngababa ‘chintu cheebelwa kumeso aabangelo.’ (1 Kor. 4:9) Kusyomeka kwabantu kulabagwasya bangelo alubo balabotelwa kuti sikubisya wachincha. (Lk. 15:10) Bangelo balakubona kulijata kabotu nkubachita banakazi bachiKristu. Bbayibbele lyaamba kuti: “Mwanakazi uleelede kuba acitondezyo cakulibombya kumutwe wakwe nkaambo kabaangelo.” (1 Kor. 11:3, 10) Bangelo balabotelwa chiindi nibabona banakazi abamwi maKristu kabalikuswiilila zintu zyaambwa aambunga yaLeza akulemeka aabo Leza mbabalayilila kuti babalemeke. Kuswiilila ooku ninzila mbotu loko yakugwasya bangelo kuti babone kuti beelede kuswiilila.
it-2 211
Mulawu
Mulawu wakapegwa bangelo. Nikuba kuti bangelo balisumpukide kwiinda bantu, Leza wakabapa milawu njibeelede kuswiilila. (Heb 1:7, 14; Int 104:4) Muchikozyano, Jehova wakabuzya Saatani zintu nzyakeelede kuchita anzyakateelede kuchita. (Job 1:12; 2:6) Mikkayeli mungelo mupati naakali kukazyania aSaatani wakati: ‘Jehova akukalalile.’ Eezi zitondeezya kuti Jesu wakali kulemeka chuuno chaLeza chakuba Mubetesi Mupati. (Ju 9; kozyanisya a Zek 3:2.) Jehova Leza wakabikka bangelo boonse kuti babe aansi aaJesu Kristu uulemekwa. (Heb 1:6; 1Pet 3:22; Mt 13:41; 25:31; Flp 2:9-11) Muchikozyano, Jesu wakalayilila mungelo kuti atole mulumbe wakwe kuli Johane. (Ciy 1:1) Mulugwalo lwa 1 BaKorinto 6:3, Pawulu wakaamba kuti maKristu bananikidwe bayoobeteka bangelo nkaambo bayoobelekaamwi aJesu mukubeteka myuuya mibi.