Mibuzyo Yabasikubala
Bakamboni baJehova beelede kubelesya mawebbusayiti na chiindi nibayanduula bantu bakukwatanaabo?
Jehova uyanda kuti bantu babili bakwetene babotelwe akuti bakkale kabayandana kwabuumi bwabo boonse. (Mt. 19:4-6) Kuti kuyanda kukwata naakuti kukwatwa, nga ulamujana kuli muntu wakukwatanaawe? Mbukunga Jehova nguwe wakatulenga, ulizizi zintu nzweelede kuchita kuti uzoobe alukwatano lubotezya. Nkinkaako, kuti wabelesya malayilile aakwe uyoobotelwa chachoonzyo mubuumi bwako. Atulange-lange amwi malayilile ngaakatupa Jehova.
Chakusaanguna, weelede kuziba malayilile aaya aakuti: “Moyo uleena kwiinda cintu cimbi cili coonse alimwi ulapenzya kapati.” (Jer. 17:9) Kuti bantu babili bayandana basaanguna kutondeezyania luyando zyiindilide zilakonzya kupa kuti bataboni zintu mbuli mbuzibede alubo zilakonzya kupa kuti batasali kabotu. Kuti bantu basala kukwatana akaambo kambubalimvwa, zilakonzya kupa kuti bazoolisole kunembo. (Tus. 28:26) Nkinkaako, teebusongo pe kuti bantu babili batondeezyania luyando zyiindilide naakuti basyomezyania kuzookwatana kabatanazibana kabotu.
Lugwalo lwa Tusimpi 22:3 lwaamba kuti: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.” Ngaali mapenzi aakonzya kuba kuti wayanduula muntu wakukwatanaawe aamawebbusayiti? Zilawusisya kuti bamwi bakayiya munzila iichisa. Bakabona kuti muntu ngubayandanaawe aawebbusayiti wakababejela. Alubo mumawebbusayiti aaya kuli bantu batali kabotu balichitaanga balasyomeka kabayanda kubbida bantu mali zyabo. Bamwi bakachita oobo bakali kulyaamba kuti Mbaakamboni.
Limwi penzi liliwo ndyakuti, mawebbusayiti aayo abelesya mapulogilamu aamakkompiyuta kuti ayandwiide bantu aabo muntu ngubeendelana. Pesi takwe bumboni pe butondeezya kuti mapulogilamu aaya alakonzya kubasalila kabotu bantu aabo muntu ngubeendelanaawe. Teebusongo pe kusyoma mapulogilamu aamakkompiyuta akapangwa amuntu uulya mayila kuti atugwasye kusala chintu chiyandikana mbuli kusala muntu wakukwatanaawe. Tazikoofwa zyachitika pe kuti mapulogilamu aamakkompiyuta atugwasye mbuli mbutugwasigwa amalayilile aamuBbayibbele.—Tus. 1 :7; 3:5-7.
Tusimpi 14:15 yaamba kuti: “Muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.” Kutanayeeya kukwatana awumwi muntu weelede kusaanguna umuzibe. Pesi eezi tazikonzeki pe kuti kubelesya mawebbusayiti aaya. Nikuba kuti mubuzyania makani aali atala abuumi bwanu naakuti musendelana mameseji kwachiindi chilamfu, pesi tukonzyi pe kumuziba kabotu muntu ooyo. Bamwi bakali kuyeeya kuti bakamujana muntu wakukwatanaawe mumawebbusayiti aaya, bakazoolisola chiindi nibakazoobonana amuntu ooyo chantongola meso.
Sintembawuzyo wakaamba kuti: “Tandiyanzani abantu bampelenge, alimwi ndilabatantamuka basikuupaupa ameso.” (Int. 26:4) Bamwi bantu babonaanga zilikabotu kubikka makani aakubeja mumawebbusayiti kuchitila kuti bantu babonaanga mbantu balikabotu. Balakonzya kusisa buntu butalikabotu mbubalaabo alubo mameseji ngibasenda alakonzya kutatondeezya buntu butali kabotu mbubalaabo. Umwi muntu ulakonzya kwaamba kuti nguKamboni waJehova, pesi muKristu uubbabbatizidwe na? Ulaabweenzinyina busimide na aJehova? Bamumbungano yakwe bamubona biyeni? Bamubona kali chikozyano chilikabotu na naakuti ‘muntu mubyaabi?’ (1 Kor. 15:33; 2 Tim. 2:20, 21) Ulaangunukide na kukwatana awumwi muntu kweendelana amalayilile aamuBbayibbele? Weelede kuziba nsandulo zyamibuzyo eeyi. Pesi tukonzyi pe kuziziba kuti teewabuzya kuli bamwi Bakamboni bamuzi kabotu muntu ooyo. (Tus. 15:22) Alubo kamwi kasimpe nkituzi nkakuti, mukombi waJehova tayelede kunjila “mujoko lyomwe” amuntu utakombi.—2 Kor. 6:14; 1 Kor. 7:39.
Twabona mapenzi aakonzya kuba kuti wayanduula muntu wakukwatanaawe aawebbusayiti, pesi kuli nzila zilikabotu zyakuyanduula muntu wakukwatanaawe. Nkuukuli nkukonzya kujana muntu uulikabotu wakuzookwatanaawe? Bakamboni baJehova bajana mweenya wakuzibana kabotu chiindi nibali kumiswaangano yambungano, yamabazu, yabbooma ayimwi.
Kuti wajana chiindi chakubaamwi amuntu nguyandanaawe ziyoopa kuti umuzibe kabotu muntu ooyo akuti ubone kuti zintu nzimuyanda mubuumi zileendelana na
Pesi kuti kubunganaamwi kakutachizumizigwi mbuli muchiindi chaCorona, nga twanjila miswaangano yambungano katubelesya mafooni. Kumiswaangano eeyi ulakonzya kuzibana abakwesu batakwete naakuti abachizi batakwetwe. Ulakonzya kubona mbubasimide mubukombi kwiinda munsandulo ankani nzibapa kumiswaangano. (1 Tim. 6:11, 12) Kuti kamuchita miswaangano kamubelesya Zoom, niyamana miswaangano ulakonzya kwaambuula amuchizi uutakwetwe naakuti mukwesu uutakwete kamubelesya mabreakout room. Chiindi nimuli kulyookezya kamulaamwi abamwi Bakamboni kamubelesya Zoom, ulakonzya kubona kuti muntu nguyanda ubajata biyeni bamwi bantu. Alubo eezi zilakugwasya kuti umuzibe kabotu muntu ooyo. (1 Pet. 3:4) Chiindi nimuyabuzibana kabotu amuntu ooyo ulasaanguna kubona kuti nzimuyanda kuzoochita mubuumi bwanu zileendelana na naakuti pe akuti zilachita na kuti mukwatane.
Kuti bakwesu batakwete abachizi batakwetwe batobelezya malayilile aamuBbayibbele chiindi nibayanda kusala muntu wakukwatanaawe, balakonzya kubona kuti majwi aali muli Tusimpi ngachoonzyo aakuti: “Ooyo wajana mukaintu [naakuti mwaalumi] mubotu wajana cintu cibotu, alimwi ulakkomaninwa kuli Jehova.”—Tus. 18:22.