Ndakabona Bakombi baLeza Basyomeka Kabali Kuzwidilila

Ndakaseka nkaambo ndakali kubonaanga taakwe nchazi pe atala aBbayibbili. Ndakamubuzya kuti: “Niinzi nchuzi we atala aBbayibbili?” Taakafwambaana kundisandula pe. Naakazoondisandula, wakandibuzya kuti banyina bakali Kamboni akuti bakamuyiisya zintu zyiingi. Akaambo kakuti ndakali kuyanda kuziba zyiingi, ndakamukumbila kuti andipandulwide zyiingi.

Twakaambuula kusikila aakati kabo. Mweenzuma wakandibuzya kuti Bbayibbili lyaamba kuti, muntu uuli kweendelezya nyika nguSaatani. (Joh. 14:30) Amwi webo waba aachiindi kuzizi zintu eezi, pesi zyakali zipya kulindime. Ndakali kumvwa bantu kabati Leza nguwe wakali kweendelezya nyika. Pesi eezi teezyakali kweendelana pe anzindakali kubona. Nikuba kuti ndakali ndaba aaminyaka iili 26 kupela, ndakali ndabona zintu zyiingi loko zyakali kundikataazya.

Ndeende wakali kweenzya ndeke zyamasoja aaku-United States. Nindakachili muniini, ndakalizi kuti kwakali kukonzya kuzooba nkondo yamabbomba aanyukkiliya nkaambo masoja bakalilibambilide kwaabbolosya. Minyaka yoonse nindakali kukkoleji kuCalifornia, ntobolo zyakali kukwasuuka kuVietnam. Mukuya kwachiindi ndakazooliswaanizya aakabunga kabasichikolo bakali kupapila. Mapulisa nibakali kutwaandilila aankoli, twakali kuchija katuli kukola kumwi katutakubwene nkutwakali kuya akaambo kakukolwa amatear gas. Eecho chakali chiindi chalupyopyongano achakubukila mfulumende. Beendelezi bazyapolitikisi bakali kujayigwa. Bantu biingi bakali aamizeezo iisiyene-siyene alubo teebakachizi pe kuti bachite kutyeni.

Mu1970 ndakajana mulimu uubbadala kunkomwe yalwizi iili kunyika aadolopo lya-Alaska. Mukuya kwachiindi ndakazooya kuLondon, ndaakuula mudududu. Ndakatozya kumusanza anguwo, pesi teendakakuzi pe nkundakali kuya. Nikwakiinda myeezi, ndakazoosika ku-Africa. Munzila ndakali kuswaana bantu bakali kulombozya kulonga kuchitila kuti bachije mapenzi aabo.

Zintu nzindakali kubona anzindakali kumvwa, zyakapa kuti ndisyome kuti nziliyiisya Bbayibbili kuti chilenge chamuuya chibi nchicho chili kweendelezya, nzyachoonzyo. Ndakali kuyanda kuziba kuti we Leza wakali kuchitaanzi mbukunga teenguwe pe wakali kweendelezya nyika.

Nsandulo ndakazooyijana mumyeezi yakazootobela. Alubo mukuya kwachiindi ndakazoozibana aabantu bakatondeezya kuti balasyomeka kuli Leza uumwi wakasimpe muzyiimo zisiyene-siyene.

CHISI CHA-IRELAND NKUCHILI KUNYIKA YAKALI “NDAWU YAMABBOMBA AMABBULETI”

Nindakabweeda kuLondon, ndakaswaana umwi mwanakazi wakali kumvwanana aabaama alubo wakandipa Bbayibbili. Mpawo nindakazooya kudolopo lya-Amsterdam, kuNetherlands, umwi Kamboni wakandibona kandili kubala mansiku alubo wakandigwasya kuti ndiiye zyiingi. Mpawo ndakazooya kuwofesi yamutabi iili kuDublin iili mu-Ireland. Nindakasika, ndakakonkomona aamulyango. Mukwesu ulaaluzibo uutegwa Arthur Matthews wakanditambula. Ndakamukumbila kuti andiyiisye Bbayibbili alubo wakazumina.

Ndakabbila muzintu nzindakali kwiiya. Ndakaanjilila ndaamaninsya mabbuku amamagazini woonse aakali kupupulwa aaBakamboni. Teendakaluba pe kubala Bbayibbili. Zyiiyo eezi zyakali kundinoneezya. Kumiswaangano yambungano ndakali kubona twana katuli kusandula mibuzyo yaba aachiindi kayili kukataazya bantu bayiide, iili mbuli yakuti: ‘Nkamboonzi munyika nikuli mapenzi? Leza ngwani? Niinzi chichitika kuti muntu wafwa?’ Chiindi choonse ndakali kuliswaanizya aBakamboni, nkaambo taakwe umwi muntu ngundakazi pe muchisi eecho. Bakwesu bakandigwasya kuti ndiyande Jehova akuti ndichite kuyanda kwakwe.

Mu1972 ndakabbabbatizigwa. Mpo mumunyaka wakatobela, ndakasaanguna kupayona ambungano yakachili niini iili ku-Newry kubbazu lyakunyika lyachisi cha-Ireland. Ndakalenta kamwi kaanda kakali muchilundu. Munsi kwakali kuvuzya kuba aamatanga ang’ombe, nkinkaako ndakali kupa nkani zyangu kunembo lyang’ombe eezi. Ng’ombe eezi zyakali kuboneka mbuli kuti zili kuswiilila chiindi nizyakalede kazili kuseluula. Nikuba kuti taakwe nchizyakali kukonzya kwaamba, pesi zyakandigwasya kuti ndikonzye kulanga baswiilizi chiindi nindipa nkani. Mu1974, ndakasalwa kuba payona uuyandikana alubo ndakabelekaamwi aNigel Pitt, ooyo wakazooba mweezuma kwachiindi chilamfu.

Bbazu lyakunyika lyachisi cha-Ireland lyakazengeledwe aamapenzi kuchiindi eecho. Bamwi bakali kwaamba kuti bbazu eelyo, yakali “ndawu yamabbomba amabbuleti.” Bantu bakali kuyandisya kulwana mumigwagwa, bamwi bakali kudubulana alubo bamwi bakali kuteya mabbomba. Zikombelo zyakali aabulidilano apolitikisi. Nikuba oobo, zimwi zikombelo zilyaamba kuti nzyachiKkristu achikombelo chaKkatolika zyakalizi kuti Bakamboni tabatoli lubazu mulizyapolitikisi. Eezi zyakapa kuti tukambawuke katwaangunukide. Bantu mbitwakali kukambawukila bakalichizi chiindi andawu kwakali kukonzya kuba aamusindo, nkinkaako bakali kutuchenjezya kakuchili chiindi.

Nikuba oobo, chimwi chiindi twakali kuswaana mapenzi katutalibambilide pe. Bumwi buzuba nitwakali kukukambawuka kuliimwi ndawu yakatali kuvuzya kukambawukwa kandilaamwi apayona uutegwa Denis Carrigan, umwi mwanakazi wakatutamikizya kuti twakali basikufeya-feya bamasoja akuBritain nkaambo teetwakali kukonzya kwaambuula mbuli bantu baku-Ireland. Zyakatuloka nkumba! Kumvwanana aamasoja kwakali kukonzya kupa kuti tujayigwe naakuti tudubulwe kumazwi. Twakayimikila aanze katunjidwe mpeyo katuli kulinda bbaasi. Mpawo twakabona imwi moota kayili kuya kwakali mwanakazi wakali watutamikizya. Mwanakazi ooyo wakazwaanze waambuula abaalumi babili bakali mumoota eeyo, kali kutondeeka-tondeeka nkutwakabede kaboteledwe. Mpo baalumi aabo bakeenzya moota yabo, balulama nkutwakabede mpo bakatubuzya mibuzyo miche biyo atala akuti bbaasi yakali kuzoosika chiindiinzi. Bbaasi niyakasika, bakaambuula aadilayiva. Teetwakazimvwa pe nzibakali kwaambuula. Mubbaasi oomo teemwakali bantu pe, nkinkaako twakayeeyela kuti bakali kuyanda kututola kunze aamuunzi kuchitila kuti bakatujayile nkuko. Pesi eezi teezyakachitika pe. Nitwakasika nkutwakali kuya alubo kandili ndaamba kuseluka, ndakabuzya dilayiva kuti: “Bantu mbitwasiya musule balikukataazikana na atala andiswe?” Mpo dilayiva wakati: “Inywe Ndilimuzi. Ndababuzya atala andinywe. Mutakataazikani pe. Mwafutuka!”

Kumuswaangano wabbooma wamu1976 wakachitilwa kuDublin, ndakaswaana umwi muchizi uutegwa Pauline Lomax. Muchizi ooyu wakali payona uuyandikana alubo wakali watuswaya kuzwa ku-England. Muchizi ooyu wakali kulibombya alubo wakali kuziyanda zintu zyabukombi. We amunyaandumaakwe Ray bakali baba aachiindi kabali mukasimpe. Nikwakayinda munyaka, ime aPauline twakachada alubo twakayinkilila kunembo akupayona kuBallymena iili kubbazu lili kunyika lyachisi cha-Ireland.

Twakazoomana imwi minyaka katuli mumulimu wakweendeenda. Twakaswaya bakwesu bakuBelfast, Londonderry aazimwi ndawu nkuyakali kuyaka nkondo. Lusyomo lwabakwesu abachizi bakali baleka kusaluulana akuzondana kuti bakombe Jehova lwakatusungwaazya loko. Jehova wakabalongezya akubakwabilila.

Ndakakkala ku-Ireland kwaminyaka iili 10. Mpawo mu 1981 twakatambwa kuti tukanjile kkilasi yachi72 yachikolo chaGiliyadi. Nitwakagilajuweta, twakasalwa kuti tukabelekele kuSierra Leone iili kububbila kwa-Africa.

LUSYOMO MUMAFWABI KUSIERRA LEONE

Twakaakukkala mumuunzi wamamishinali aabamwi bakwesu bali 11. Twakali kubelesya ng’anda yakujikila iimwi, zimbuzi zitatu, zisambilo zibili, fooni iimwi amunchina wakuwacha awakuyumya zigogo uumwi. Magesi akali kukkala kayeenda kufumbwa chiindi. Makoso akali azukizya kaluli naakali kusaana, nzoka zyakali kukkala kazinjila mung’anda.

Nikuba kuti buumi bwakali buyumu, pesi mulimu wakukambawuka wakali kunoneezya. Bantu bakali kulilemeka Bbayibbili alubo bakali kuswiilila chiindi nitwakali kubakambawukila. Bantu biingi bakatambula kasimpe. Akaambo kakubeleka changuzu nkutwakali kuchita mumulimu wakukambawuka, bantu bakundawu eeyo bakali kuti ndili mwaalumi wachoonzyo. Pesi mukuya kwachiindi teendakachili kuvuzya kujanika mumulimu wakukambawuka akaambo kakujatikana aamulimu wakumutabi, nkinkaako bantu bakasaanguna kwaamba kuti mwanakazi wangu nguwe wakali mwaalumi wachoonzyo, ime ndime sikutobela luzutu. Eezi zyakali kumukonda loko mwanakazi wangu.

Bakwesu biingi bakali kufwaba pesi Jehova wakali kubapa ziyandikana, alubo chimwi chiindi wakali kuzichita munzila yachigambyo. (Mt. 6:33) Ndichiyeeyede umwi muchizi wakali aamali nche yakuti awule chakulya chakuti alye abana bakwe buzuba oobo kupela. Chiindi naakamvwa kuti umwi mukwesu uuchisidwe wakali wabula mali yakuula mapilisi aabulwazi bwamalangazuba, wakabweza mali eeyo mpo wamupa. Kumagoko mubuzuba mbuboobo, muchizi ooyo kalyibide, umwi mwanakazi wakamubbadalila kuti akalungisigwe masusu. Kuli twaambo twiingi tukozyene atootu.

KWIIYA BUKKALE BUPYA KUNIGERIA

Twakakkala kuSierra Leone kwaminyaka iili 9. Mpawo twakazoolongela kuBbeteli yakuNigeria. Twakali twaabukkala kumutabi mupati. Ime ndakali kubeleka mulimu ngundakali kubeleka kale kuSierra Leone, pesi mwanakazaangu wakapegwa umwi mulimu ngwatakajayide pe. Wakali wazibila kumana ma-awa aali 130 mweezi amweezi kali mumulimu wakukambawuka alubo zyiiyo zyakwe zyakali kuchita kabotu. Lino wakeelede kuchita mulimu wakusuma zigogo zidelukide. Zyakatola chiindi kuti azibile kuchincha ooku. Naakabona kuti bakwesu abachizi bakali kuubona kawuyandikana mulimu ngwaakali kuchita, wakasaanguna kuyanduula myeenya yakuti asungwaazye bamwi mbaakali kubelekaabo.

Bukkale bwakuNigeria bwakali bupya kulindiswe, kwakali zyiingi nzitwakeelede kwiiya. Aali chimwi chiindi, umwi mukwesu wakaza ku-wofesi yangu kuti azoonditondeezye umwi muchizi wakachili mupya aaBbeteli. Nindakatandabika kuboko kuti ndimujuzye, muchizi ooyo wakavuntama kumawulu aangu. Ndakamaninwa! Ndakayeeya magwalo aabili, lugwalo lwa Milimu 10:25, 26 alwa Chiyubunuzyo 19:10. Ndakalibuzya kuti, ‘Ndimubuzye kuti aleke nzyali kuchita na?’ Pesi kumwi ndakali kuyeeya kuti, ‘Kweelede muchizi ooyu ulizizi nzilyaamba Bbayibbili, kujana bamutambula biyeni aBbeteli kuti katazizi?’

Twakayinkilila kunembo katuli kwaambuula pesi ndakali kataazikene loko. Ndakayanduulisisya mpawo ndakazoobona kuti muchizi wakali wachita kweendelana ambubakachili kuchita bamwi muli zimwi ndawu zyamuchisi eecho. Teebanakazi abalikke bachita oobo, ambabo baalumi balavuntama. Muchizi ooyo wakali kweezya kundilemeka. Taakali kundikomba biya pe, nzyaakachita bakali kuzichita bamwi muMagwalo. (1 Sam. 24:8) Ndilabotelwa kuti taakwe chintu nchindakaamba chakali kukonzya kumufwisya bweeme muchizi ooyu akaambo kakutaziba kwangu.

Twakaswaana bakwesu bakuNigeria bakatondeezya kusyomeka kwabo kuli Jehova kwaminyaka myiingi. Muchikozyano, mukwesu Isaiah Adagbonaa wakayiya kasimpe kachili muniini. Pesi wakazoojatwa bulwazi bwazipele, mpawo wakatolwa kundawu yakali kubambilwa basizipele. Nguwe aalikke wakali Kamboni mundawu eeyo. Nikuba kuti wakali kukazigwa, pesi wakagwasya basizipele bali 30 kuti babe Bakamboni alubo kundawu eeyo kwakajulwa mbungano.

BAKWESU BAKUKENYA BAKABA AAMOYO MULAMFU ANDIME

Mu1996 twakachinchwa kuti tukabelekele kumutabi wakuKenya. Aaka kakali kakusaanguna kubweeda lubo kuchisi eechi kuzwa nindakachiswayide mbuli mbundaamba kumatalikilo. Twakali kukkala aaBbeteli. Bamwi beenzu bakali kutuswaya mbaacheta. Bakali kuyandisya kubbida bachizi bakali kutweetela michelo. Bumwi buzuba umwi muchizi kuBbeteli wakaluba kujala windo lyang’anda yakwe. Chiindi naakaboola wakajana mung’anda kamuli tanga lyabacheta kabali kususula. Muchizi ooyo wakachija kali kukwiila, ambabo bacheta bakali kulwipuuka aamawindo kabali kukwiila.

Ime amwanakazi wangu twakali kubotelwa kunjilaamwi ambungano yachiSwahili. Muchiindi chifwiifwi biyo, ndakapegwa chilongezyo chakuti ndichitisye Chiiyo chaBbuku chaMbungano (lino chaabwiitwa kuti Chiiyo chaBbayibbili chaMbungano). Ndakazwa moyo nkaambo ndakachili kuyiila biya kwaambuula chiSwahili. Nindakali kulibambila ndakali kubeleka changuzu kuti kuchitila kuti ndizookonzye kubuzya mibuzyo. Chiindi basikusandula nibakali kwaamba zisiyene mbichaani azyakalembedwe mubbuku, ndakali kusweeka. Zyakali zimbi biya. Kuti ndaziyeeya, nga ndabeetelela bakwesu abachizi. Ndibalumba loko akaambo kakulibombya akuba aamoyo mulamfu kwiinda mukuzumina kuti ndichitisye zyiiyo eezyo.

LUSYOMO MUBUNOTI KU-UNITED STATES

Twakakkala myeezi miche kuKenya. Mu1997 twakatambwa kuti tukabelekele kuBbeteli yakuBrooklyn, kuNew York. Lino twakali twaba munyika ilaabunoti alubo ili aamasunko aayo. (Tus. 30:8, 9) Nikuba oobo, bakwesu abachizi bamunyika eeyi bali aalusyomo lusimide. Babelesya chiindi chabo abunoti bwabo kuti basumpule mulimu mubotu uuchitwa aambunga yaJehova.

Muminyaka yoonse njindakabelekela Jehova, ndakabona bakwesu abachizi kabali kutondeezya lusyomo muzyiimo zisiyene-siyene. Ku-Ireland, bakwesu bakatondeezya lusyomo muchiindi chankondo. Ku-Africa, bakwesu bakatondeezya lusyomo mumafwabi anibakaanzanisidwe. Ku-United States, bakwesu balikutondeezya lusyomo mubunoti. Jehova ulabotelwa chiindi nabona mbubamuyanda bakombi bakwe muzyiimo zisiyene-siyene.

Mazuba alachijaana, “kwiinda nyeleti yasikuluka.” (Job. 7:6) Lino tuli kubeleka kumawofesi mapati aakuWarwick kuNew York. Tuchibona kachili chilongezyo chipati kubelekaamwi abakwesu abachizi balaaluyando. Kutola lubazu mumulimu ooyu wakugwasilizya Mwaami wesu Jesu Kkristu, ooyo waba aafwiifwi kuti alongezye babelesi bakwe basyomeka, kupa kuti tubotelwe akuti tukkutisikane.—Mt. 25:34.