Hulda Wakazuzikizya Chipeekezyo Chakwe

KUTI kakuli wakaswayide kasuwa kaSangir Besar minyaka yayinda, kweelede kuti wakababona bachizi batatu bakkala kumbali aalwizi. Bachizi aaba, bazibikene aakukambawuka mukasuwa aaka kabagwasya bantu kuti bamvwisisisye Bbayibbili. Pesi aali chimwi chiindi, bakali kuchita umwi mulimu wakasiyene aawakukambawuka.

Bakali kunjila mulwizi kababweza mabwe mapati kabaatola kumbali aalwizi. Amwi mabwe aayo akali mapati mbuli bbola. Bakali kukkala aatuuno twazisamu akusaanguna kupwaya mabwe aayo ansando kusikila aba maniini mbuli mayi aankuku. Bakali kubweza mabwe aayo akwaabikka muzipeyili mpawo baatola nkubakali kukkala. Kuzwa waawo, mabwe aayo bakali kwaabikka mumasaka mapati kuchitila kuti abikkwe mumaloli kuti akabelesegwe kukulungisya migwagwa.

Umwi wabachizi aabo nguHulda. Zyiimo zyakwe zyakali kumuzumizya kuti ajane chiindi chiingi chakuchita mulimu ooyu. Hulda wakali kusanina bamumpuli yakwe amali njaakali kujana kumulimu ooyu. Nikuba oobo, wakabeleka kali aachimwi chintu nchaakali kuyanda mumizeezo yakwe. Wakali kuyanda kuula tebbuleti kuchitila kuti adawunilode JW Library^®. Hulda wakalizi kuti mavidiyo azimwi zijanika aaJW Library zyakali kunoomugwasya mumulimu wakukambawuka akuti alimvwisisisye kabotu Bbayibbili.

Kwamweezi ahafu, Hulda wakali kubeleka kwama-awa aabili buzuba abuzuba kuseeni, kapwaya mabwe kuti akonzye kuzuzya kaloli amabwe aayo. Kumamanino, mali yakuti awule tebbuleti yakakkwana.

Hulda wakaamba kuti, “Nikuba kuti ndakali kuzakala akukatala akuti ndakali ndaba aazisutukila mumaboko akaambo kakupwaya mabwe, tandichiziyeeyi pe zyoonse eezyo akaambo kakuti ndakaba aatebbuleti iindigwasya mumulimu wakukambawuka anindilibambila miswaangano yachiKkristu.” Alubo wakaamba kuti tebbuleti yakamugwasya loko niyakasaanguna kkorona nkaambo miswaangano yoonse yakali kuchitwa kakubelesegwa mafooni. Tulikubotelwaamwi aHulda akaambo kakuti wakazuzikizya chipeekezyo chakwe.