Layibbulali Njukonzya Kujata Mukuboko

“Kuzwa chiindi, teetwakali kuziyeeyela pe kuti tuzoojana chakulya chamubukombi katubelesya mafooni.” Muchayeeyede na majwi aaya? Majwi aaya akaambwa aaMukwesu Geoffrey Jackson muLipoti Iiza kuKabunga Keendelezya Namba 6. Wakayungizya kuti: “Pesi lino tulakonzya kulibuzya kuti chakulya chamubukombi twayinoochijana biyeni muCorona kaansinga tatukwe JW Library. Jehova wakali kutuyiisya kuti tulibambile penzi lili mbuli eeli.”

Jehova wakali kutugwasya biyeni kuti tulibambile? Niinzi zyakali kuchitwa chiindi nikwakali kupangwa JW Library alubo niinzi ziyandikana kuti ikkale kayibambululwa akuti ibikkwe zimwi zibelesyo zipya?

Takuna Kwaba Chibelesyo Chili Boobu Pe

MuMay 2013, bamuKabunga Keendelezya bakakumbila bakwesu balikumawofesi mapati balimudipatimenti yaMEPS Programming kuti bapange JW Library iili aaBbaibbele lya Busanduluzi Bwanyika Mpya lyakabambululwa. Paul Willies uubeleka kuMEPS Programming wakaamba kuti: “Kuzwa chiindi kusikila aachiindi eecho, teetwakalinapanga JW Library pe. Pesi twakachita timu yabantu bayipange, twakayimikizya iimwi milimu njitwakali kuchita mpawo twakabelekelaamwi amadipatimenti asiyene-siyene kuti tupange JW Library. Twakali kukkala katukomba kuli Jehova alubo Jehova wakatugwasya zyakuti JW Library eeyi yakazoogwisigwa aamuswaangano uuchitwa munyaka amunyaka, kakuli kwayinda myeezi iili 5 luzutu kuzwa nitwakasaanguna.”

Lino buyumu-yumu bwakatobela bwakali bwakuchita kuti JW Library ibe aamabbuku miingi alubo kaajanika mumilaka myiingi. muJanuary 2015, mabbuku myiingi aajanika muChikuwa kuswaanizya ayimwi milaka akali abawo aaW Library. Nikwakazooyinda myeezi iili 6, bantu bakali babukonzya kudawuniloda mabbuku aaya mumilaka myiingi.

Kuzwa aachiindi eecho, bakwesu bali kuchita zintu zisiyene-siyene aaJW Library. Bali kubikka mavidiyo, kuchita kuti mabbuku woonse amavidiyo azimwi zibelesegwa kumiswaangano yambungano zibe aazyo azikke alubo bakachita kuti basikubala kabakonzya kubala mabbuku aali muBbuku Ligwasya Kuvwuntauzya kuti batyanka vesi imwi ayimwi yamuBbayibbele.

Kubambulula Layibbulali

JW Library ilajulwa mumafoni asika ku8 miliyoni buzuba abuzuba alubo ilajulwa mumafooni ayinda ku15 miliyoni mweezi amweezi. Niinzi zichitwa kuti JW Library ikkale kayibeleka kabotu mumafooni aayo? Mukwesu Willies wakaamba kuti: “Taakwe nukonzya kwaamba kuti JW Library yamana kupangwa. Tuli kubikka zintu zipya alubo tulikwiibambulula kuchitila kuti ibeleke kabotu. Mbukunga mapulogilamu aali mumafooni akkala kaabambululwa chiindi achiindi, andiswe tweelede kuchita kuti JW Library yesu yeendelane amapulogilamu aayo. Alubo kuyandikana kuti katubambulula software yesu nkaambo mabbuku azimwi zyakalekkoodwa zili kuya buvula aaJW Library.” Lino aaJW Library kuli mabbuku asika ku200 000 alubo zyakuswiilizya amavidiyo zisika ku600 000. Zyoonse eezi zilajanika mumilaka iisiyene-siyene.

Kuti JW Library ikonzye kubeleka, kuyandikana zintu zyiingi kutali makkompiyuta luzutu. Kuyandikana amwi mapulogilamu amukkompiyuta alubo mapulogilamu aayo awulwa biya. Pulogilamu iimwi iyanda mali iisika ku$1 500 (U.S.) munyaka amunyaka. Kuyungizya aali zeezi, bakwesu bali kuMEPS Programming babelesya mali iisika ku$10 000 (U.S.) munyaka amunyaka kuti bawule imwi minchina kuzwa kuli basikupanga basiyene-siyene kuchitila kuti JW Library kayibeleka aamakkompiyuta mapya, matebbuleti amafooni mapya.

Zyakudawuniloda Zigwasya Kuti Kutabelesegwi Mali Nyiingi

JW Library yakagwasya loko kuti kutabelesegwi mali nyiingi kukupulinta mabbuku, kwaajatanizya akwaatumizya. Muchikozyano, mu2013 twakapulinta tubbuku tusika ku12 miliyoni twakabbuku kategwa Kulingaula Magwalo Abuzuba pesi mu2020 twakapulinta tubbuku tusika ku5 miliyoni nikuba kuti kwakaba bamwi basikupupulula basika 700 000 munyika yoonse. Nkamboonzi nikwakaba kuchincha ooku? Nkaambo bakwesu abachizi biingi lino babubala lugwalo lwabuzuba kababelesya JW Library.a

“Igwasya Loko”

JW Library ilikubagwasya loko bantu munzila zisiyene-siyene. Geneviève uukkala kuCanada wakaamba kuti JW Library ilikumugwasya loko kuti abe aapulogilamu yakwiiya Bbayibbele. Wakati: “Kwaamba choonzyo, kaansinga ndakali kubunganizya mabbuku myiingi kuti ndikonzye kwiiya, nikuli teendayinookonzya pe buzuba abuzuba kuseeni. Pesi lino kuti ndabweza tebbuleti yangu, ngandaba aazyoonse nzindiyanda. Kukkala kandiiya buzuba abuzuba kuli kusimya lusyomo lwangu alubo zilikupa kuti ndisime mubukombi.”

JW Library yagwasya loko muchiindi eechino chaCorona. Charlyn uukkala kuUnited States wakaamba kuti: “Kuzwa nikwaba Corona munyika yoonse, tandina ndabona mabbuku eesu pe aakapulintwa. Pesi JW Library iilikutugwasya kuti tujane zintu zyamubukombi chiindi choonse. Ndilamulumba Jehova akaambo kachipo eechi.”

Faye uukkala kuPhilippines wakaamba atala ambubalimvwa bantu boonse. Wakati: “Ndibelesya JW Library kuti ndikkale kandili aabweenzuma aJehova. Njiyo njindibelesya kukubala kuseeni. Ndilizya miimbo aajanika aaJW Library. Njiyo njindibelesya kulibambila miswaangano. Njiyo njindibelesya kulibambila zyiiyo zyaBbayibbele. Ndeebela mavidiyo aajanika mpawo kuti kanditakwe zyiingi zyakuchita. Ngandabala zimwi zyiiyo naakuti Bbayibbele chiindi nindilinda chimwi chintu. Igwasya loko.”

JW Library ilikugwasya loko mumulimu wakukambawuka. Muchikozyano, umwi muchizi wakuCameroon naakali kukambawuka, wakali kuyanda kubelesya lumwi lugwalo ndwakabona umwi muchizi kalubelesya nibakali kukambawuka mviki yakali yayinda. Muchizi ooyu takachililuyeeyede pe lugwalo oolo. Wakati: “Ndakayeeya amwi mabala aajanika muvesi eeyo. Ndakajula Bbayibbele muJW Library mpawo ndakayanduula mabala aayo ngindakachiyeeyede. Ndakazooyibona vesi eeyo. Ndabukonzya kujana mavesi miingi ngindinga ndaluba kandibelesya JW Library.”

Zintu nzimusanga kamubelesya donate.jw.org zyakagwasya loko kuti tupange JW Library alubo ziligwasya loko kuti tukkale katuyibambulula akubikka zimwi zipya kuchitila kuti bakwesu abachizi bagwasigwe. Tulamulumba akaambo kazipo zyanu.

Zyakachitwa aaJW Library

1. 

   October 2013—JW Library yakagwisigwa kayili aaBbaibbele lya Busanduluzi Bwanyika Mpya

2. 

   January 2015—Amwi mabbuku akasaanguna kujanika aaJW Library muChikuwa mpawo akazoojanika muli iimwi milaka

3. 

   November 2015—Kwakabikkwa chimwi chibelesyo chigwasya kumaka

4. 

   May 2016—Kwakabikkwa chipanzi chamiswaangano yambungano

5. 

   May 2017—Kwakabikwa chibelesyo chigwasya kuti bantu kabalemba zintu nzibayanda kuzoobelesya

6. 

   December 2017—Kwakabikkwa Bbayibbele lyaKwiiya (Study Bible)

7. 

   March 2019—Kwakachitwa kuti bantu bakonzye kudawuniloda zyakuswiilizya zyakalekkoodwa, bakonzye kweebela mavidiyo kabatadawunilodede pe alubo kwakabikkwa Bbuku Ligwasya Kuvwuntauzya

8. 

   January 2021—Kwakabikkwa zibelesyo zigwasya kuti bbuku lyaMbukonzya Kubotelwa Mubuumi Kukabe Kutamani libeleke kabotu.