Lindila Jehova Kubotelwa
UCHILANGILA aameso aasalala na chiindi Jehova nazoogwisya bubi buli munyika akupa kuti zintu zyoonse zibe zipya? (Chi. 21:1-5) Nichoonzyo kuti uchilangililide aameso aasalala. Pesi chimwi chiindi teekuuba pe kulindila Jehova, kapati kuti katuli mubuyumu-yumu. Kuti twalindila chimwi chintu mpawo chanonoka, moyo wesu ulachisa.—Tus. 13:12.
Pesi Jehova ulangilila kuti tulindile katuli aamoyo mulamfu kusikila azoobweze ntaamu aachiindi chakwe nchaakasala. Nkamboonzi Jehova nalangilila kuti tulindile? Niinzi chikonzya kutugwasya kuti tulindile katubotelwa?
NKAMBOONZI JEHOVA NALANGILILA KUTI TULINDILE?
Bbayibbili lyaamba kuti: “Jehova ulalindila kakkazikide moyo kuti amufwide luzyalo, eelyo ulanyamuka kuti amufwide luse. Nkaambo Jehova ngu Leza uubeteka kabotu. Balikkomene boonse aabo bamulangila.” (Is. 30:18) Isaya wakali kubuzya maJuda bakali aamitwe miyumu majwi aaya. (Is. 30:1) Pesi majwi aaya akapa kuti maJuda basyomeka babe aabulangilizi. Majwi aaya abapa bulangilizi bakombi baJehova basyomeka mazubaano.
Nkinkaako, tweelede kulindila katuli aamoyo mulamfu akaambo kakuti anguwe Jehova ulikulindila. Wakasala chiindi natazoonyonyoone bwiime bwazintu oobu alubo ulikulindila buzuba a-awa eeyo kuti isike. (Mt. 24:36) Aachiindi eecho, zizooba aantanganana kuti zintu Dyabbulosi nzyabejelezya Jehova abakombi bakwe nzyamanwa. Kuzwa waawo, Jehova uzoogwisya Saatani abantu bali kubbazu lyakwe, pesi iswe ‘uzootufwida luse.’
Kwalino, Jehova uchaalekelede mapenzi pesi utusyomezya kuti tulakonzya kubotelwa kumwi katulindila kuti abweze ntaamu. Mbuli mbaakaamba Isaya, tulakonzya kubotelwa nikuba katuli kulindila chimwi chintu chibotu kuti chichitike. (Is. 30:18) Niinzi zikonzya kupa kuti tubotelwe? Atulange nzila zili 4 zikonzya kutugwasya kuti tubotelwe.
ZIKONZYA KUTUGWASYA KUTI TUBOTELWE NITULI KULINDILA JEHOVA
Bikkila maanu kuzintu zibotu. Mwaami Davida wakabona zintu zibi loko mubuumi bwakwe boonse. (Int. 37:35) Wakalemba kuti: “Koumuna kumbele lya Jehova akumulindila cakuyandisisya. Utacimwi akaambo kamuntu uuzwidilila kuzuzikizya makanze aakwe mabi.” (Int. 37:7) Davida lwakwe wakazichita eezi kwiinda mukubikkila maanu kubulangilizi bwakwe bwalufutuko. Alubo wakali kulumba Jehova akaambo kazintu zibotu nzyaakali kumuchitila. (Int. 40:5) Andiswe kuti twabikkila maanu kuzintu zibotu zichitika mubuumi bwesu kutali kubikkila maanu kuzintu zibi, kulakonzya kutuubila kuti tulindile Jehova.
Jana chiindi chakwaambuula zintu zibotu atala aJehova. Mulembi wa Intembauzyo 71, kuyeeyelwa kuti nguDavida, wakaamba kuti: “Ndilazumanana kulindila; ndinookutembaula kapati kwiinda kaindi.” (Int. 71:14) Davida wakali kumutembawula biyeni Jehova? Wakali kubuzya bamwi atala aJehova akwiimba nyimbo zyakumutembawula. (Int. 71:16, 23) Tulakonzya kubotelwa chiindi nitulindila Jehova mbuli mbaakachita Davida. Tulamutembawula Jehova mumulimu wakukambawuka, nitwiizya abamwi anitwiimba nyimbo zyaBwaami. Chiindi nwaanooyimba lwiimbo lwaBwaami, bikkila maanu kumajwi aalwiimbo oolo.
Sungwaazigwa aabakwesu abachizi. Chiindi Davida naakali kuswaana buyumu-yumu, wakabuzya Jehova kuti: “Kumbele lyabantu bako basyomeka, ndinoosyoma zina lyako.” (Int. 52:9) Andiswe tulakonzya kusungwaazigwa aabakombima chiindi nituli kumiswaangano, mukukambawuka anitulaamwi abakombima.—Rom. 1:11, 12.
Simya bulangilizi bwako. Intembauzyo 62:5 yaamba kuti: “Ndiluumwine kandilindila Leza nkaambo bulangizi bwangu buzwa kulinguwe.” Kulayandikana kuba aabulangilizi busimide kuti twabonaanga mamanino aanyika eeyi anonoka kwiinda mbutwali kulangilila. Tulakonzya kuba aachoonzyo chakuti zisyomezyo zyaJehova zizoozuzikizigwa nikuba kuti twalindila kwachiindi chilamfu. Tulakonzya kubala Jwi lyaLeza kuti tube aabulangilizi busimide. Muchikozyano, tulakonzya kuyeeyesesya atala azintu zyoonse zyakaambidwe chiindi zyakazuzikizigwa, balembi baBbayibbili mbubakazuminana akubona buntu mbwalaabo Jehova. (Int. 1:2, 3) Alubo tweelede kwiinkilila kunembo kukomba “mumuuya uusalala” kuchitila kuti tukkale katuli aabweenzuma busimide aJehova chiindi nitulindila kuti chisyomezyo chabuumi butamani chizoozuzikizigwe.—Jud. 20, 21.
Mbuli Mwaami Davida, ba aachoonzyo chakuti Jehova ulababona aabo bamulindila alubo ubatondeezya luyando lutamani. (Int. 33:18, 22) Kkala kulindila Jehova kwiinda mukuba aamaboneno aalikabotu, umutembawule, usungwaazigwe abakombinyokwe alubo ukkale kuli aabulangilizi busimide.