CHIIYO 22
LWIIMBO 15 Atumutembaule Mwana wa Jehova Mutaanzi Kuzyalwa!
Nkamboonzi Zina lyaJehova Niliyandikana Loko Kuli Jesu?
“Ndapa kuti zina lyako lizibinkane kulimbabo alubo ndizoopa kuti lizibinkane.”—JOH. 17:26.
NZITUTAYIYE
Tulabona kuti Jesu wakalizibya biyeni zina lyaJehova, mbaakalisalazya ambaakatondeezya kuti Saatani wakali kwaamba manwa atala azina eelyo.
1-2. (a) Niinzi Jesu nzyaakachita mubusiku katanajayigwa? (b) Njiili mibuzyo njitutalange-lange muchiiyo eechi?
MULI BWANE goko, muNisani 14, 33 C.E., Jesu wakali waba aafwiifwi kuti awuzigwe, abetekwe, asolwe, apenzegwe akuti ajayigwe. Jesu abaapostoli bakwe, bakali bamaninsya kulya Chilalilo chaMwaami kabali mung’anda yamujulu. Nibakazwaakulya, Jesu wakabuzya baapostoli bakwe majwi aakumamanino aasungwaazya. Alubo kabatanazwa mung’anda yamujulu, Jesu wakaamba majwi aayandikana loko naakali kukomba. Majwi aankombyo eeyo, alembedwe muli Johane chaandaano 17.
2 Muchiiyo eechi, tulabona zimwi zintu nzitwiiya kunkombyo yaJesu. Jesu wakali kukataazikana atalaanzi katanafwa? Nkombyo eeyo, itondeezya kuti niinzi chakali kuyandikana loko kuli Jesu naakali aanyika? Atulange-lange nsandulo zyamibuzyo eeyi.
“NDAPA KUTI ZINA LYAKO LIZIBINKANE KULIMBABO”
3. Jesu wakatyeni atala azina lyaJehova alubo wakali kwaambaanzi? (Johane 17:6, 26)
3 Munkombyo yakwe, Jesu wakati: “Ndapa kuti zina lyako lizibinkane kulimbabo.” Jesu wakaamba majwi aaya kwaziindi zibili, zitondeezya kuti akali kuyandikana loko kulinguwe. (Bala Johane 17:6, 26.) Wakali kwaambaanzi? Jesu taakali kupandulwida basikwiiya bakwe pe kuti zina lyaLeza nguJehova. Akaambo kakuti basikwiiya baJesu bakali maJuda, nkinkaako, bakalizi kale zina lyaLeza kuti nguJehova. Zina eelyo lyakali kujanika kwaziindi zyiingi muMagwalo aachiHebberu. Nkinkaako, chiindi Jesu naakaamba atala azina lyaJehova wakali kwaamba nchilyiiminina. Jesu wakali kugwasya basikwiiya bakwe kuti bamuzibe kabotu Jehova, eezi zyakali kuswaanizya kuziba makanze ngalaawo Jehova atala anyika abantu, zintu nzyaakachita, zintu nzyayoochita abuntu mbwalaabo. Jesu nguwe alikke uumuzi kabotu loko Jehova.
4-5. (a) Niinzi chikonzya kupa kuti umuyande loko umwi muntu? Amba chikozyano. (b) Niinzi chakagwasya basikwiiya baJesu kuti bamuzibe kabotu Jehova?
4 Muchikozyano, atuteedi kuli uumwi mwaalu wamumbungano yanu uutegwa David alubo ngudokotela. Waba aaminyaka myiingi kumuzi mukwesu ooyo. Mpawo bumwi buzuba wachiswa zyakuti uyanda kuyoobona dokotela. Wayinka kuchibbadela alubo mukwesu ooyo wakusilika mpawo wapona. Ulamuyanda loko mukwesu ooyo alubo kufumbwa mpuwamvwa zina lyakwe kalili kwaambwa, unooyeeya atala anzyaakakuchitila naakakusilika. Alubo eezi zipa kuti umuzibe kabotu mwaalu ooyo.
5 Munzila iikozyenie, basikwiiya baJesu bakalizi kale zina lyaJehova pesi bakalibona kaliyandikana loko nkaambo Jesu wakabagwasya kuti bamuzibe kabotu Jehova. Nkamboonzi nitukonzya kwaamba oobo? Akaambo kakuti Jesu wakali kutondeezya buntu bwaWisi muzintu zyoonse nzyaakali kwaambuula anzyaakali kuchita. Nkinkaaako, baapostoli bakwe ‘bakamuziba’ kabotu Jehova kwiinda mukuswiilila Jesu naakali kuyiisya akubona mbaakali kubajata bantu.—Joh. 14:9; 17:3.
‘ZINA LYAKO NDWAAKANDIPA’
6. Jesu wakali kwaambaanzi naakali kwaamba kuti Jehova wakali wamupa zina lyakwe? (Joh. 17:11, 12)
6 Munkombyo yakwe, Jesu wakakombela basikwiiya bakwe kati: “Balange akaambo kazina lyako ndwaakandipa.” (Bala Johane 17:11, 12.) Eezi zyaamba kuti Jesu, nguuJehova na? Teembuzyaamba pe. Chiindi Jesu naakaambuula atala azina lyaJehova wakaamba kuti ‘zina lyako.’ Nkinkaako, zina lyakuti Jehova teezina lyaJesu pe. Jesu wakali kwaambaanzi naakaamba kuti wapegwa zina lyaJehova? Chakusaanguna, Jesu wakali mwiiminini waJehova. Wakasika muzina lyaWisi alubo wakachita milimu mipati muzina eelyo. (Joh. 5:43; 10:25) Mukuyungizya, zina lyakuti Jesu lyaamba kuti “Jehova Ndufutuko.” Nkinkaako, nzilyaamba zina lyaJesu ziswaanizya zina lyaJehova.
7. Nkamboonzi Jesu nategwa mwiiminini waJehova? Amba chikozyano.
7 Kuti tumvwisisisye kuti nkamboonzi Jesu naakeelede kwiiminina Jehova, atubelesye chikozyano eechi. Mwaami ulakonzya kutuma mupulisa wakwe kuti akabuzye bamwi nzyaawamba. Nzyaamba mupulisa ooyo balaziswiilila bamwi nkaambo banoolizi kuti zyazwa kumwaami. Munzila iikozyenie, Jesu wakali mwiiminini waJehova nkaambo zintu nzyaakali kwaambuula zyakali kuzwa kuli Wisi.—Mt. 21:9; Lk. 13:35.
8. Nkamboonzi Jehova naakaamba kuti zina lyakwe lyakali “muli” Jesu, Jesu katanaza aanyika? (Kulonga 23:20, 21)
8 Bbayibbili lyaamba Jesu kuti “Jwi” nkaambo wakaba Sikwaambuulila Jehova kwiinda mukupa ngilozi abantu malayilile. (Joh. 1:1-3) Kulakonzeka kuti Jesu nguwe ngilozi njaakalikutuma Jehova kuti ilanganie ma-Israyeli nibakali kulonga. Naakali kubuzya ma-Israyeli kuti bayiswiilile ngilozi eeyo, Jehova wakati: “Nkaambo zina lyangu lili mulinjiyo.”a (Bala Kulonga 23:20, 21.) Jehova wakaamba oobo akaambo kakuti Jesu nguwe uumwaambuulila akuti nguumuntu uutondeezya kuti zintu zyoonse nzyachita Jehova zilikabotu akuti Jehova ulasalala.
“TAATA, PA KUTI ZINA LYAKO LILEMEKWE”
9. Niinzi zitondeezya kuti zina lyaJehova lyakali kuyandikana loko kuli Jesu? Pandulula.
9 Mbuli mbutwabona, Jesu katanaza aanyika, wakali kulibona kaliyandikana loko zina lyaWisi lyakuti Jehova. Naakali aanyika, wakali kutondeezya muzintu zyoonse nzyaakali kuchita kuti zina lyaWisi lyakali kuyandikana loko kulinguwe. Kumamanino aamulimu wakwe waanyika, Jesu wakakumbila Wisi kati: “Taata, pa kuti zina lyako lilemekwe.” Muchiindi chifwiifwi, Wisi wakasandula kuzwa kujulu ajwi lilaajulu, wakati: “Ndapa kuti lilemekwe alubo ndizoopa kuti lilemekwe lubo.”—Joh. 12:28.
10-11. (a) Muunzilaanzi Jesu mwaakapa kuti zina lyaJehova lilemekwe? (Langa chifanikisyo.) (b) Nkamboonzi nikwakali kuyandikana kuti kutondeezegwe kuti zintu zyoonse nzyachita Jehova zilikabotu akuti zina lyakwe lilasalala?
10 Anguwe Jesu wakapa kuti zina lyaWisi lilemekwe. Wakazichita biyeni? Imwi nzila, nkwiinda mukubuzya bamwi atala abuntu bubotu mbwalaabo Jehova azintu nzyachita. Pesi kuli zintu zyiingi nzyaakachita kuti zina lyaJehova lilemekwe. Jesu wakeelede kutondeezya kuti zintu zyoonse nzyachita Jehova zilikabotu akuti zina lyaJehova lilasalala.b Jesu wakatondeezya mbulyakali kuyandikana zina lyaJehova chiindi naakayiisya batobeli bakwe mbubakeelede kukomba. Wakaamba kuti: “Taateesu uuli kujulu, alisalazigwe zina lyako.”—Mt. 6:9.
11 Nkamboonzi nikwakali kuyandikana kuti kutondeezegwe kuti zintu nzyachita Jehova zilikabotu akuti zina lyakwe lilasalala? Akaambo kakuti mumuunda wa-Edeni, Saatani Dyabbulosi wakabejelezya Jehova Leza. Wakaamba kuti Jehova ulabeja akuti wakali kubayima zintu zibotu ba-Adamu a-Eva. (Matl. 3:1-5) Mumajwi aaya, Saatani wakali kwaamba kuti bweendelezi bwaJehova tabulikabotu pe. Manwa ngaakaamba Saatani akapa kuti zina lyaJehova libe aampuwo mbi. Muchiindi chakapona Jobu, Saatani wakaamba kuti bantu bakali kukomba Jehova, bakali kumukomba akaambo kakuti wakali kubachitila zintu zibotu. Naakaamba manwa aaya, Saatani wakali kwaamba kuti bantu balakonzya kuleka kukomba Jehova kuti baswaana mapenzi akaambo kakuti tabamuyandi kazizwaansi aamoyo pe Jehova. (Job. 1:9-11; 2:4) Kwakali kuyandikana chiindi chilamfu kuti kuzooboneke kuti ngwani mubeji, Jehova naakuti Saatani.
Jesu wakayiisya batobeli bakwe mbukuyandikana kusalazya zina lyaLeza (Langa fuka 10)
“NDIPA BUUMI BWANGU”
12. Niinzi Jesu nzyaakalipeda kuchita akaambo kakuti wakali kuliyanda zina lyaJehova?
12 Akaambo kakuti ulamuyanda Jehova, Jesu wakali kuyanda kuchita zyoonse nzyakonzya kuti asalazye zina lyaWisi akuti atondeezye kuti zyoonse nzyachita Jehova zilikabotu. Jesu wakaamba kuti, “Ndipa buumi bwangu.” (Joh. 10:17, 18) Jesu wakalilipedelede kufwida zina lyaJehova.c Bantu bakusaanguna bakamaninide, Adamu a-Eva, bakamupapila Jehova alubo bakaba kubbazu lyaSaatani. Kusiyana a-Adamu a-Eva, Jesu wakalipeda kuti aze aanyika akutondeezya mbaakali kumuyanda Jehova. Jesu wakazitondeezya eezi kwiinda mukuswiilila Jehova muzintu zyoonse nzyaakali kuchita anzyaakali kwaambuula. (Heb. 4:15; 5:7-10) Jesu wakakkala kasyomeka kusikila naakajayigwa aachisamu chakupenzezya. (Heb. 12:2) Nzyaakachita, zyakatondeezya kuti ulamuyanda Jehova akuti ulaliyanda zina lyaJehova.
13. Jesu wakatondeezya biyeni kuti nzyaakali kwaamba Saatani akali manwa? (Langa chifanikisyo.)
13 Zintu zyoonse Jesu nzyaakachita zyakali kutondeezya kuti Saatani nguwe wakali kubeja kutali Jehova. (Joh. 8:44) Jesu wakamuzi kabotu Jehova kwiinda muntu woonse. Kaansinga nzyaakaamba Saatani zyakali zyachoonzyo, nikuli Jesu wakalizizi. Pesi Jesu wakakanzide kwiiminina zina lyaJehova kuti libe aampuwo mbotu. Nikuba chiindi Jehova naakali waleka kumukwabilila, Jesu wakalipeda kuti afwe akuti akkale kasyomeka kuli Jehova kwiinda kuti aleke kumuswiilila Wisi.—Mt. 27:46.d
Zintu zyoonse Jesu nzyaakachita zyakali kutondeezya kuti Saatani nguwe wakali kubeja kutali Jehova! (Langa fuka 13)
“NDAKAMANINSYA MULIMU NGWAAKANDIPA”
14. Jehova wakamulongezya biyeni Jesu akaambo kakusyomeka kwakwe?
14 Munkombyo yamamanino mubusiku katanafwa, Jesu wakali kukonzya kwaamba kuti: “Ndakamaninsya mulimu ngwaakandipa kuti ndichite.” Jesu wakali kusyoma kuti Jehova wakali kuyoomupa bulumbu akaambo kakusyomeka kwakwe. (Joh. 17:4, 5) Jesu wakasala munzila yabusongo kuti asyome Wisi. Jehova taakwe naakamulekelezya pe Jesu kuti akkale kali mukabanda. (Mil. 2:23, 24) Jehova wakamubuzya Jesu alubo wakamupa chuuno chisumpukide loko kujulu. (Flp. 2:8, 9) Kuzwa waawo, Jesu wakasaanguna kweendelezya kali Mwaami waBwaami bwaLeza. Bwaami oobo bwakali kuzoochitaanzi? Mubuzyo ooyu wakawusandula Jesu munkombyo njaakayiisya basikwiiya bakwe naakati: “Abuze Bwaami bwako. Akuchitwe kuyanda [kwaJehova] aanyika mbuli kujulu.”—Mt. 6:10.
15. Niinzi zimwi Jesu nzyatazoochite?
15 Muchiindi chilikunembo, Jesu uzoolwana basinkondonyina baLeza alubo uzoonyonyoona basizibi munkondo ya-Amagedoni. (Chi. 16:14, 16; 19:11-16) Kuzwa waawo, uzoowaala Saatani ‘mumulindi uutagoli’ akumwaanga alubo taakwe nchatanoochikonzye pe kuchita. (Chi. 20:1-3) Jesu uzoopa kuti bantu babe aaluumuno akuti bamaninine muBweendelezi bwakwe Bwaminyaka Iili 1 000. Uzoobusya bafwide. Uzoopa kuti nyika yoonse izoobe Paradayizi. Makanze aaJehova anooli azuzikizigwa!—Chi. 21:1-4.
16. Niinzi zitazoochitike kumamanino aaBweendelezi Bwaminyaka Iili 1 000?
16 Niinzi zitazoochitike kumamanino aaBweendelezi Bwaminyaka Iili 1 000? Bantu tabanoochilikwe chibi pe alubo kutamaninina kunooli kwamana. Bantu tabanooyandikani chinunuzyo pe kuti balekelelwe zibi zyabo alubo takunoochilikwe simwiimaakati pe naakuti mupayizi uupa kuti babe aabweenzinyina busimide aJehova. Alubo “sinkondoma wamamanino, lufu, uzoonyonyoonwa.” Bafwide banooli babusigwa. Bantu boonse batanooli aanyika banooli bamaninina.—1 Kor. 15:25, 26.
17-18. (a) Niinzi zitazoochitike kumamanino aaBweendelezi Bwaminyaka Iili 1 000? (b) Niinzi nzyatazoochite Jesu kumamanino aabweendelezi bwakwe? (1 Bakkorinte 15:24, 28) (Langa chifanikisyo.)
17 Niinzi zimwi zizoochitika kumamanino aaBweendelezi Bwaminyaka Iili 1 000? Aachiindi eecho, kuzoochitika chintu chiyandikana loko. Takuchinoolikwe muntu pe uuchinoozumbuuzya kuti Jehova ulasalala akuti nguLeza uululeme. Nkamboonzi? Mumuunda wa-Edeni, Saatani wakaamba kuti Jehova ulabeja akuti weendelezya bantu munzila yalunya. Kuzwa kuchiindi eecho, bantu bamuyanda akumulemeka Jehova, bakali kukkala kabalisalazya zina lwakwe. Nkinkaako, kumamanino aaBweendelezi Bwaminyaka Iili 1 000, zina lyaJehova lizoosalazigwa chakumaninina. Jehova unooli watondeezya kuti nguTaateesu wakujulu ulaaluyando.
18 Bweendelezi Bwaminyaka Iili 1 000 kabuli bwamana, bantu boonse bazooziba kuti nzyaakaamba Saatani atala aJehova manwa. Niinzi Jesu nzyatazoochite kumamanino aabweendelezi bwakwe? Uzootobelezya chikozyano chaSaatani na akupapila Jehova? Peepe! (Bala 1 Bakkorinte 15:24, 28.) Jesu uzoobweedezya Bwaami kuli Wisi. Uzoolibombya kubweendelezi bwaJehova. Kusiyana aSaatani, Jesu ulilibambilide kubweedezya zintu zyoonse akaambo kakuti ulamuyanda Jehova.
Jesu ulilipedelede kuzoobweedezya Bwaami kuli Jehova kumamanino aaBweendelezi bwakwe Bwaminyaka Iili 1 000 (Langa fuka 18)
19. Jesu ulibona biyeni zina lyaJehova?
19 Kuli twaambo twiingi twakapa kuti Jehova ape Jesu zina lyakwe. Jesu wakatondeezya mbabede Wisi munzila iimaninide. Nkinkaako, Jesu ulibona biyeni zina lyaJehova? Ulibona kaliyandikana loko. Wakalipeda kuti afwe akaambo kazina eelyo alubo ulilipedelede kuti azoobweedezye Bwaami kuli Jehova kumamanino aaBweendelezi Bwaminyaka Iili 1 000. Kujana twachitobelezya biyeni chikozyano chaJesu? Mubuzyo ooyu uzoosandulwa muchiiyo chitobela.
LWIIMBO 16 Atutembaule Ja Akaambo ka Mwanaakwe Uunanikidwe
a Chimwi chiindi anzizyo ngilozi zyakali kwiiminina Jehova chiindi nizyakali kutola milumbe muzina lyakwe. Eezi nzizyo zipa kuti mulaamwi mavesi ngilozi zyaambwe mbuli kuti nguJehova lwakwe. (Matl. 18:1-33) Nikuba kuti magwalo aamba kuti Mozesi wakatambula Mulawu kuzwa kuli Jehova, pesi amwi mavesi atondeezya kuti Jehova wakabelesya ngilozi kuti zibuzye Mozesi Mulawu ooyo.—Lev. 27:34; Mil. 7:38, 53; Gal. 3:19; Heb. 2:2-4.
b BUPANDULUZI BWAMABALA: Bbala lyakasandululwa kuti “kusalazya” lyaamba kulemeka. Majwi aakasandululwa kuti “kutondeezya kuti zintu nzyachita zilikabotu” muchiiyo eechi, aamba kusalazya muntu ooyo kumanwa ngangawabejelezegwa.
c Alubo lufu lwaJesu lwakapa kuti bantu bazookonzye kupona buumi butamani.
d Langa “Mibuzo Yabasikubala” muNgaziyakulinda yamu-April 2021, pp. 30-31.