Mwalizi Na?

Mumwaanda wamunyaka wakusaanguna, bapayizi bakali kulitola kuli ganzi lyabanyama bakali kupayizigwa kutempele aachipayililo?

MUNYAKA amunyaka, bapayizi bachiindi baku-Israyeli bakali kupayizya banyama biingi aachipayililo mutempele. Umwi sikulanga-langa makani aachiindi wachiJuda uutegwa Josephus wakaamba kuti chiindi chapobwe lyaPasika kwakali kujeegwa mbelele zyiinda ku 250 000 kuti zipegwe kazili zipayizyo alubo eezi zyakali kupa kuti kutilwe ganzi jingi loko. (Lev. 1:​10, 11; My. 28:​16, 19) Lyakali kutolwa kuli ganzi eelyo?

Basayensi bakasya aaliimwi ndawu yakali aafwiifwi atempele lyaHerodi lyakali kubelesegwa muchiindi chakapona Jesu. Nibakasya, bakabona kagelo kwakali kwiinda ganzi lyakalikuzwa kuchipayililo chakali mutempele.

Atubone zintu zibili zyakali kupa kuti chipayililo chikkale kachili kkilini:

• Aansi aachipayililo kwakali mpako: Bupanduluzi bwakagelo kakali kuzwa kuchipayililo bulajanika mulilimwi bbuku lyamaJuda lyamilawu yabo aziyanza zyabo lyachiindi lyakalembwa nikwakayinda munyaka wa 200. Lyaamba kuti kwakali mpako zibili aakkona iimwi yachipayililo. Ganzi lyakali kuzwa kwakali kujeeyelwa banyama amaanzi aakali kubelesegwa kukkilina chipayililo zyakali kwiinda mumpako eezyo alubo kazinjila mukagelo kakalikutila mukalonga kaKkidroni.

  Basayensi balazuminana azilembedwe mubbuku eeli lyachiindi. Bbukku lyalwaano lwamaJuda lipandulula kuti basayensi bakabona migelo aafwiifwi atempele iiyeeyelwa kuti njiyo yakali kugwisya ganzi lyabanyama bakali kupayizigwa amaanzi akali kubelesegwa aachipayililo.

• Maanzi miingi: Kwakali kuyandikana maanzi miingi aakuti bapayizi bakkiline aansi aachipayililo akuti ganzi lyeende mukagelo. Kuti bachite mulimu ooyu uuyandikana loko, bapayizi bakali kujana maanzi aakali kuyandikana mumuunzi. Maanzi aakali kubelesegwa kuchipayililo aakali kuzwa mumuunzi, akali kuzwa mumigodi amuzikala kaayinda mumigelo. Umwi wazyasayensi uutegwa Joseph Patrich wakaamba kuti, taakwe tempele pe lyakali mbuli eeli muchiindi eecho lyakali aanzila mbotu yakutola maanzi kutempele akugwisya maanzi aali aadoti.