Mbukonzya Kumvwanana Abamumpuli Abamwi Bantu
Bantu biingi kulabayumina kuti bakkale kabamvwanana abamumpuli naakuti abamwi bantu. Bona zimwi njiisyo zyamuBbayibbele zikonzya kukugwasya kuti umvwanane abamwi.
BAANDABA ABAMWI
NZILYAAMBA BBAYIBBELE: “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:4.
CHAAMBAANZI?: Tulakonzya kumvwanana abamwi kuti twayandisya kuchitila bamwi zibotu kutali kuyanda kuchitilwa luzutu. Kutabaandaba abamwi kulakonzya kupa kuti bantu bakutantamuke naakuti batayandi kuba beenzinyokwe. Muchikozyano, kuti umwi mulukwatano katakwe ndaba aziyandwa amweenzinyina, zilakonzya kupa kuti azoochite bwaamu. Kuyungizya waawo, bantu biingi tabayandi pe kumvwanana amuntu uukkala kalisumpula akaambo kazintu nzyalaazyo naakuti nzyazi. Limwi bbuku litegwa The Road to Character lyakati, “muntu uutakwe ndaba abamwi chiindi chiingi ngawalinjizya mumapenzi.”
NZUKONZYA KUCHITA:
Gwasya bamwi. Kugwasya bamwi akubasyoma kulakonzya kupa kuti bayande kuba beenzinyokwe. Kumwi kuyanduulisisya kwakatondeezya kuti bantu bayandisya kugwasya bamwi tabakataazikani mumizeezo alubo tabalilangililaansi pe.
Bafwide luzyalo bamwi. Kuba aluzyalo chaamba kulibikka muchiimo chawumwi muntu akumvwisisisya chiimo chakwe. Kuba aluzyalo kuyoopa kuti utabakalalili bamwi chiindi nwaambuulaabo akuti utaambuuli majwi akonzya kubachisa.
Kuba aluzyalo kuyoopa kuti utalangilili kuti bantu kabachita nzuyanda luzutu. Alubo kuyookugwasya kuti utasaluuli akuti umvwanane abantu bamisyobo yoonse.
Jana chiindi chakubaamwi abamwi. Kujana chiindi chakubaamwi abamwi kulakugwasya kuti ubazibe kabotu. Alubo kuti bamwi babe beenzinyokwe, weelede kwaambuula zintu nzibayanda alubo zibayaka. Baswiilisisye chiindi nibalikwaambuula. Libikke muchiimo chabo. Kumwi kuyanduulisisya kwakatondeezya kuti “kujana chiindi chakwaambuula abamwi kulakonzya kupa kuti ubotelwe.”
SALA BEENZINYOKWE BALIKABOTU
NZILYAAMBA BBAYIBBELE: “Kumvwana abantu babyaabi kupa kuti muntu aleke kulilemeka kabotu.”—1 Bakorinto 15:33, makani aamunsi.
CHAAMBAANZI?: Bantu mbukkalaabo kwachiindi chilamfu balakonzya kupa kuti ube muntu uulikabotu naakuti uutalikabotu. Basikulanga-langa makkalilo aabantu bakaamba kuti beenzuma balaamanguzu akuchincha buumi bwesu munzila iigambya. Muchikozyano, bakaamba kuti muntu uukkala kaliswaanizya abantu bafwepa naakuti bakalekana ulakonzya kusaanguna kufwepa naakuti kuyanda kulekana angwakwetenaawe.
NZUKONZYA KUCHITA: Sala bantu bali abuntu bulikabotu kuti babe beenzinyokwe. Muchikozyano ulakonzya kumvwanana abantu basala kabotu, balemeka bamwi, bayandisya kupa bamwi abasangalizya.
ZIMWI NJIISYO ZYAMUBBAYIBBELE
Yebela mavidiyo aawambuula zyaBbayibbele agwasya bakwetene, bachikula abana kuti bapone buumi bulikabotu
UTAAMBUULI MAJWI ACHISA BAMWI.
“Majwi aambwa cakutayeeya alayasa mbuli panga.”—TUSIMPI 12:18.
BA MUNTU UUPA.
“Mwaabi uyoozwidilila.”—TUSIMPI 11:25.
CHITILA BAMWI ZINTU NZUYANDA KUTI BAKUCHITILE.
“Zintu zyoonse nzyomuyanda kuti bantu bamucitile, anywebo nzyomweelede kubacitila.”—MATAYO 7:12.