Nzibasyoma Bamwi

MaHindu

basyoma kuti mapenzi ngaswaana muntu nkupanichwa akaambo kazibi nzyachita lino naakuti nzyaakachita naakali kupona chiindi katanazyalwa lubo. Alubo basyoma kuti muntu nga wasika amoksha, chaamba chiimo mpanga tacheeleli kuzyalwa lubo nkaambo nga waleka kubikkila maanu kuzintu zyakunyama.

MaMozilemu

basyoma kuti mapenzi ngibaswaana bantu nkupanichwa akaambo kazibi zyabo akusunkwa kuti lusyomo lwabo lulisimide na. Dr. Sayyid Syeed, mupati waIslamic Society of North America wakati, Mapenzi ngituswaana atuyeezya kuti “tulumbe Leza akaambo kazintu nzyatuchitila akuti tugwasye bamwi.”

MaJuda

basyoma kuti muntu uswaanana amapenzi akaambo kazintu nzyachita. Bamwi maJuda basyoma kuti bantu baswaanana amapenzi nikuba kuti bachita zintu zibotu bazoobusigwa. Alubo bali aanjiisyo iitegwa Kabbalah yakuti, muntu uunga wafwa nga wazyalwa lubo kuchitila kuti abbadale zibi zyakwe.

MaBbuda

basyoma kuti muntu unooswaanana amapenzi nikuba chiindi naanga wazyalwa lubo kusikila akasike achiimo chakuchita, kulombozya akuyeeya zintu zilikabotu. Alubo basyoma kuti, kuti muntu waba abusongo, wachita zintu zibotu akuyeeya zintu zilikabotu nga wasika achiimo chitegwa nirvana chaamba kuti nga tachiswaanani amapenzi pe.

MaConfucian

Dictionary lyaComparative Religion lyakaamba kuti maConfucian basyoma kuti bantu baswaanana amapenzi akaambo “kakukachilwa kuchita zimwi zintu naakuti kubisya.” Alubo basyoma kuti mapenzi alakonzya kuchesegwa kwiinda mukuchita zintu zilikabotu pesi basyoma kuti miingi ayetwa “azilenge zyamuuya zilaamanguzu kwiinda bantu. Eezi zipa kuti basyome kuti amwi mapenzi ngibaswaana bantu akapulanidwe kale.”

Basyoma mizimu

basyoma kuti mapenzi ayeetwa aabalozi. Basyoma kuti balozi balakonzya kupa kuti muntu abe achoolwe naakuti anjile mumapenzi alubo mapenzi ngibeeta alakonzya kuchesegwa kwiinda mukuchita tunsiya-nsiya tusiyene-siyene. Alubo basyoma kuti bang’anza mbabo luzutu bakonzya kusilika muntu ulookuswaanana amapenzi akaambo kakulowegwa.

MaKristu

basyoma zintu zipandululwa mubbuku lyaMatalikilo zyakuti mapenzi akeetwa aabantu babili bakusaanguna. Pesi maKristu biingi bakaba aamaboneno aabo kunjiisyo eeyo. Muchikozyano, maKatolika aamba kuti muntu ulakonzya kulipeda kuswaanana amapenzi kuchitila kuti Leza alongezye chikombelo chabo naakuti umwi muntu.