Njiisyo Zitugwasya Kuti Tube Aaluumuno Abamwi

Lekelela Bamwi

‘Amuzumanane . . . kulekelelana camoyo woonse nokuba kuti umwi kajisi kaambo kakutongooka mweenzinyina.’—BAKOLOSE 3:13.

Toonse tulalubizya. Tulakonzya kuchita zintu zinyemya bamwi naakuti ambabo balakonzya kuchita zintu zitunyemya. Eezi zyaamba kuti toonse tweelede kulekelelana. Kuti walekelela umwi muntu wakakubisizya tukkali kumunyemenede pe muntu ooyo. Tatweelede kubweedezya muntu ooyo “bubi” naakuti kukkala katumuyeezya nzyaakatuchitila. (Baroma 12:17) Pesi kuti umwi muntu wakuchitila zintu zikuchisa loko, niinzi nzweelede kuchita kuti kakukuyumina kuluba nzyaakachita? Weelede kwaambuulaawe munzila yabulemu alubo kakutakwe bamwi bantu pe. Makanze aako ayelede kuba aakubamba luumuno amuntu ooyo kutali kuyanduula wakabisya.—Baroma 12:18.

Libombye Alubo Lemeka Bamwi

“Amucite zintu zyoonse cakulicesya akubona bamwi kuti balamwiinda.”—BAFILIPI 2:3.

Kuti katulibombya alubo katulemeka bamwi, bantu bayooyanda kumvwanana aandiswe. Banoozi kuti tulabafwida luzyalo, tulabajata kabotu akuti tatukachiti zintu zibachisa achaali. Pesi kuti twalisumpula katubonaanga tuyandikana loko kwiinda bamwi naakuti katuyanda kuti bamwi bachite zintu nzituyanda luzutu, tulakonzya kupa kuti kube kutamvwanana. Bantu bayootutantamuka alubo tulakonzya kubula beenzuma.

Utasaluuli

“Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—MILIMO 10:34, 35.

Mulengi wesu taboni bamwi bantu kuti balayandikana kwiinda bamwi akaambo kandawu njibakkala, zintu nzibalaazyo, mulaka ngubaambuula naakuti akaambo kakuti makuwa naakuti mbantu basiya. “Kuzwa kumuntu omwe wakalenga bantu ibali muzisi zyoonse.” (Milimo 17:26) Eezi zyaamba kuti bantu boonse mbana bamuntu uumwi. Kuti twalemeka bamwi akubajata munzila iilikabotu, bantu aabo bayoobotelwa andiswe tuyoobotelwa alubo kwiinda zyoonse tuyoopa kuti Mulengi wesu abotelwe.

Baamoyo Uubombede

‘Amulisamike . . . moyo walubomba.’—BAKOLOSE 3:12.

Kuti katuli aamoyo uubombede bamwi bayoowangunuka kwaambuula aandiswe. Alubo kulabawubila kutubuzya mputwalubizya nkaambo ngabalizi kuti tatubanyemeni pe. Alubo kuti umwi muntu katunyemenede mpawo twamusandula kabotu zilapa kuti abatame. Tusimpi 15:1 yaamba kuti: “Kuvwiila kabotu kulalesya bukali, pele majwi mabi alanyemya.”

Bamuntu Uupa Alubo Uulumba

“Kupa kulakkomanisya kapati kwiinda kupegwa.”—MILIMO 20:35.

Bantu biingi mazubaano balatangala alubo babikkila maanu kuzintu nzibayanda luzutu. Pesi bantu bapa mbabo babotelwa chachoonzyo. (Luka 6:38) Bantu bapa balabotelwa nkaambo batondeezya kuti balabayanda bamwi kwiinda zintu nzibalaazyo. Luyando oolo ndulo lupa kuti balumbe kuti umwi muntu wabapa chimwi chintu. (Bakolose 3:15) Libuzye kuti, ‘Ndiyanda kumvwanana aamuntu uulibiyeni, uutapi alubo uutalumbi na naakuti uupa alubo uulumba?’ Twiiyaanzi aawa? Bamuntu ulaabuntu mbuyanda kuti bamwi babe aabo.—Matayo 7:12.