Nkamboonzi Nikuyandikana Kuziba Kuti Kuli Mulengi?
Nkamboonzi nikuyandikana kuziba kuti kuli Mulengi? Kuti kuli aabumboni bwakuti Leza mpali, zilakugwasya kuti ulange-lange bumboni butondeezya kuti nguwe wakalemba Bbayibbele. Kuti wasyoma nzilyaamba Bbayibbele, ulagwasigwa munzila zitobela:
Ulabotelwa loko mubuumi
NZILYAAMBA BBAYIBBELE: “[Leza] wakacita zibotu, wakamupa mvwula kuzwa kujulu aziindi eelyo nokuba micelo minji, alimwi wakamukkutya azilyo akuzuzya myoyo yanu akubotelwa.”—Milimo 14:17.
CHAAMBAANZI?: Zintu zyoonse zili aanyika nzipo zizwa kuMulengi. Uzibona kaziyandikana zipo eezi kuti waziba kuti muntu wakakupa ulaandaba anduwe.
Ulajana malayilile aatakugwasye
NZILYAAMBA BBAYIBBELE: “Aboobo uyoomvwisya cintu ciluleme, ciluzi alimwi cibotu, nkokuti bukkale boonse bubotu.”—Tusimpi 2:9.
CHAAMBAANZI?: Mbukunga Leza nguwe wakakulenga, ulizizi zintu nzuyanda kuchitila kuti ubotelwe. Kuti wabala Bbayibbele, ulajana zyiiyo zitakugwasye mubuumi bwako.
Ulajana nsandulo zyamibuzyo njulaayo
NZILYAAMBA BBAYIBBELE: “Ulajana luzyibo lwa Leza.”—Tusimpi 2:5.
CHAAMBAANZI?: Kuziba kuti kuli Mulengi kulakugwasya kuti ujane nsandulo zyamibuzyo iiyandikana mbuli yakuti: Tuponenaanzi? Nkamboonzi nikuli mapenzi miingi? Niinzi zichitika kuti twafwa? Ulakonzya kujana nsandulo zyamibuzyo eeyi muBbayibbele.
Ulaba aabulangilizi bwabuumi buli kunembo
NZILYAAMBA BBAYIBBELE: “‘Nkaambo ndiliizyi kabotu mizeezo njendiyeeya kujatikizya ndinywe,’ mbwaamba Jehova, ‘mizeezo yakumuletela luumuno, kutali mapenzi pe, kumupa buumi bwakumbele bubotu alimwi abulangizi.’”—Jeremiya 29:11.
CHAAMBAANZI?: Leza utusyomezya kuti muchiindi chili kunembo uyoomaninsya bubi, mapenzi alufu. Kuti wazisyoma zisyomezyo eezi, ulalisimya kumapenzi nguswaana buzuba abuzuba.