CHIIYO 18
Tubagwasya Biyeni Bakwesu Bacitikilwa Penzi?
kuDominican Republic
kuJapan
kuHaiti
Ikuti kwacitika penzi, Bakamboni baJehova bacita mabambe aakugwasilizya cakufwambaana kuti bazoogwasye bazyalwanyina bali mupenzi. Milimu eeyi itondeezya luyando lwesu lwacoonzyo kuli bamwi besu. (Johane 13:34, 35; 1 Johane 3:17, 18) Tubagwasya munzilaa nzi?
Tubelesya mali. Nikwakacitika nzala mpati kuJudiya, Makristu aakusanguna kuAntiyokkiya bakatumizya lugwasyo lwamali kuba zyalwanyina. (Incito 11:27-30) Andiswe kuti twaziba kuti bakwesu bali kuli zimwi nyika baswaanana abuyumu-yumu, tutumizya zipo kwiinda mumbungano zyesu kuti tupe ziyandikana kuli babo bali mupenzi.—2 baKorinto 8:13-15.
Tulapa lugwasyo. Baalu bali kubusena ooko kwacitika penzi balayanduula umwi awumwi kuti babone naa ulikabotu. Ikkomiti iibona zyakucitikilwa penzi ilabamba kutumizya zyakulya, maanzi akunywa aali kabotu, zyakuzwaata, lugwasyo lwakusilika abusena bwakukkala. Bakamboni biingi balaaluzibo luyandikana balalyaaba kababelesya mali zyabo kwiinka kuyoogwasya naa kuyakulula Maanda aaBwaami amyuunzi yakamwayika. Kujatana kwesu katuli mbunga alimwi aluzibo nditujana mukubelekelaamwi, zitugwasya kulibambila cakufwambaana muziindi aawo bamwi nibayanda lugwasyo. Nikuba kuti tulagwasilizya “kwaambisya kulibaabo baciinga calusyomo” alubo tulagwasyilizya ababo mbitutakombi aabo kuti kwakonzeka.—baGalatiya 6:10.
Tulabawumbulizya katubelesya Magwalo. Bacitikilwa penzi kapati mbibayandikana kuumbulizigwa. Muziindi zili boobo tujana nguzu kuli Jehova, “nguwe uutuumbulizya mumapenzi esu oonse.” (2 baKorinto 1:3, 4) Tulazuwa zisyomezyo zyamu Bbaibbele ababo bacitikilwa penzi, kusimisya kuti lino-lino Bwaami bwaLeza buyoomanisya mapenzi oonse aapa macise akufwaba.—Ciyubunuzyo 21:4.
Nkaambo nzi Bakamboni nibafwambaana kutola ntaamu nikwacitika penzi?
Nduumbulizyo nzi nditunga tulaabilana abaabo bafutuka?