Kujana Wagwasilizya Biyeni Nikwaba Mapenzi Aalichitikila?

Mapenzi aalichitikila alikuvula loko mazubaano. Kuti kwaba mapenzi aalichitikila, kweelede kuchitwa mabambe aakuti baswaana penzi eelyo bagwasigwe. Nkinkaako, bamuKabunga Keendelezya bakachita mabambe aakuti kube Dipatimenti Iigwasilizya Nikwaba Mapenzi kumutabi umwi awumwi.

Kuti bakwesu bali mudipatimenti eeyi bamvwa atala amapenzi aalichitikila, nga baambuula abaalu bakundawu eeyo kuti bazibe mbubakonzya kugwasigwa basikupupulula. Kuti zyapambanika kazili zipati zyakuti basikupupulula bakundawu eeyo tabakonzyi kuzibambulula, bakumutabi nga basala bakwesu beelela kuti bazulwide mumulimu ooyo. Bakwesu bakumutabi balakonzya kukumbila basikugwasilizya, naakuti kukumbila kuti bamwi bape zintu nzibalaazyo. Chimwi chiindi balakonzya kuula zintu ziyandikana akuzipa basikupupulula bakaswaana penzi eelyo.

Kuli bubotu buba kuti zintu zyeenda munzila eeyi. Eezi zipa kuti tutachiti mulimu wakachitwa aabamwi kale, zipa kuti zintu zyeende kweendelana amabambe akupa kuti mali azintu zibelesegwe kabotu. Zyoonse eezi zilakonzya kuteenda kabotu kuti bakwesu balichitila mabambe aabo abalikke.

Bakwesu bakasalwa aamutabi balakonzya kulanga-langa akubona kuti kuyandikana mali nyingi biyeni akuti kuyandikana basikugwasilizya biingi biyeni kuti mulimu ooyu weende kabotu. Alubo balakonzya kwaambuula abalupati-pati kuti mulimu ooyu uchitwe chakufwambaana. Tatweelede kubweza mali kuzwa kuli basikupupulula, kutumizya zintu zyakugwasilizya naakuti kwiinka kundawu eeyo kuti teetwabuzigwa kuti tuchite oobo.

Nikuba oobo, kuti kwaba mapenzi aalichitikila, tuyanda kugwasilizya. (Heb. 13:16) Tulabayanda bakombima, nkinkaako niinzi nzitukonzya kuchita? Chintu chiyandikana, nkukombela aabo baswaana mapenzi abaabo banoogwasilizya. Tulakonzya kusanga kumulimu uuchitwa munyika yoonse. Kabazulwidwa abamuKabunga Keendelezya, bakwesu bali kumawofesi aamitabi balagwasigwa kubona kuti zintu eezi nga zyabeleka biyeni nikwaba mapenzi aalichitikila. Kuti katuyanda kugwasilizya, tulakonzya kufila foomu litegwa Local Design/Construction Volunteer Application (DC-50).

AMWEEBELE KAVIDIYO KATII MVULA MPATI YAKANYONYOONA ZINTU KUBRAZIL, KUZWA WAAWO, MUSANDULE MUBUZYO UUTOBELA:

Niinzi chikubotezya atala amabambe aakachitwa aaBakamboni baJehova nikwakawa mvula mpati kuBrazil mu2020?