Lino Makani Mabotu Aazwa Kuli Leza Cacoonzyo na?

1. Ngwani Mwini Bbaibbele?

Makani mabotu akuti bantu bayoopona munyika kukabe kutamani alembedwe muBbaibbele. (Intembauzyo 37:29) MuBbaibbele kujanika mabbuku manini ali 66. Leza wakabelesya baalumi bali 40 basyomeka mukwaalemba. Mabbuku alimusanu akutalika akalembwa aMusa mumyaka isika ku3 500 yakiinda. Ibbuku lyakumanisizya lyakalembwa amuapostolo Johane mumyaka iyiinda ku1 900 yakiinda. Basikulemba Bbaibbele bakalikulemba mizeezyo yani? Leza wakaambulabo kabelesya muuya wakwe usalala. (2 Samuele 23:2) Bakalemba mizeezyo yaLeza iitali yabo pe. Nkikaako Jehova ngonguwe Mwini Bbaibbele.​—Bala 2 Timoteo 3:16; 2 Petro 1:20, 21.

Yeebela kavidiyo kategwa Ngwani Wakalemba Bbayibbele?

2. Niinzi cipa kuti tube acoonzyo cakuti Bbaibbele lilakasimpe?

Tulizi kuti iBbaibbele lizwa kuli Leza nkaambo lyaambilizya cakasimpe makani azintu zitakacitike kunembo. Takukwe muntu ukonzya kuzicita eezi. (Joshua 23:14) NguLeza Singuzu zyonse luzutu ukonzya kubona buumi bwabantu bwakunembo cakasimpe.​—Bala Isaya 42:9; 46:10.

Tulangilila kuti bbuku lizwa kuli Leza lisiyane aamwi alino mbulibede. Kwamwayigwa maBbaibbele miingi mumilaka miingi loko. Nikuba kuti lyakalembwa ciindi, lilazuminana asayensi. Alimwi basikulilemba bali 40 tibakakazyanya pe. Kuyungizya wawo iBbaibbele litondezya luyando lwaLeza lulaantanganana, alimwi licilanguzu zyakucinca buumi bwabantu kuti kababotelwa. Ootu twaambo twakasimpe tupa kuti bantu biingi bazumine kuti iBbaibbele ndiJwi lyaLeza.​—Bala 1 baTesalonika 2:13.

Yeebela kavidiyo kategwaNiinzi Chipa Kuti Tusyome Kuti Bbayibbele Lilaakasimpe?

3. IBbaibbele lyaambula atala eenzi?

Makani mabotu aakuti Leza ulamakanze mabotu kubantu ngawo avuzya kwambwa muBbaibbele. Magwalo apandulula kuti coolwe cabantu cakupona munyika iiliparadaiso cakasweeka biyeni cindi cakumatalikilo. Alimwi lyaamba kuti paradaiso iyobwedezegwa biyeni.​—Bala Ciyubunuzyo 21:4, 5.

MuJwi lyaLeza mujanika milawo, zyeelelo, alulayo. Kuyungizya wawo iBbaibbele lilembedwe zintu zyakacitika ciindi atalaa akuti Leza wakali kubeleka biyeni abantu, eezi zyakacitika zitondezya bube bwaLeza. Nkikaako, iBbaibbele lilakonzya kukugwasya kuti uzibe Leza. Lipandulula mbuukonzya kuba mwenzuma wakwe.​—Bala Intembauzyo 19:7, 11; Jakobo 2:23; 4:8.

4. Kujana walimvwisisya biyeni Bbaibbele?

Kabbuku aaka kalakugwasya kuti umvwisisye Bbaibbele mukubelesya nzila njakabelesya Jesu. Wakaamba magwalo katobelana alimwi wakapandulula “makani amuMagwalo.”​—Bala Luka 24:27, 45.

Nzice loko zintu zibotezya mbuli makani mabotu aazwa kuli Leza. Pesi bamwi bantu tabawayandi alimwi tababotezi. Utaleki pe. Bulangilizi bwakuyoopona kukabe kutamani buyeme mukujana kwako luzibo atalaa Leza.​—Bala Johane 17:3.