Samuele Wakiinkilila Kunembo Kacita Zintu Zili Kabotu

Kuzwa naakali mwana, Samuele wakakkala alimwi kabelekela kutente lyaLeza, ooko bantu nkubakali kukombela Jehova. Ulizi na kuti niinzi cakacitika kuti Samuele abelekele kutente lyaLeza? Atutalike kwiiya atalaa bayinaa Samuele, Hana.

Kwaciindi cilamfu, Hana taakalikwe mwana pe nikuba kuti wakali kuyanda kubaa mwana. Nkinkaako, wakakomba kuli Jehova alimwi kalookukombelela kuti amugwasye. Wakasyomezya kuti, ikuti wabaamwana mulombe, wakalikuyoomutola kutente lyaLeza kuti akakkale alimwi kabelekela nkuko. Jehova wakiisandula nkombyo yakwe, alimwi Hana wakabaa mwana mulombe. Wakamuuzika zina lyakuti Samuele. Ciindi Samuele nakalaa minyaka yakuzyalwa yotatwe naa yone, Hana wakamutola kutente lyaLeza kuti akabelekele nkuko, mbuli mbwaakasyomezezye.

Eli wakali mupayizi mupati kutente lyaLeza. Bana bakwe balombe abalabo bakali kubelekela nkuko. Kutalubi kuti tente lyaLeza bwakali busena bwakukombela Leza, alimwi bantu bakeelede kucita zintu zili kabotu nkukooko. Nikuba boobo, bana baEli bakali kucita zintu zibi loko. Samuele wakalizibwene nzibakali kucita. Samuele wakacita zintu zibi na mbuli mbubakali kucita bana baEli?— Peepe, wakiinkilila kunembo kacita zintu zili kabotu, mbuli mbwaakayiisidwe abazyali bakwe.

Ubonaanga Eli wakeelede kubacitaanzi bana bakwe babili?— Wakeelede kubasubula akubakasya kubelekela kutente lyaLeza. Pesi Eli taakazicita pe eezyo, nkinkaako Jehova wakanyemena Eli abana bakwe babili. Eelyo Jehova wakasala kubasubula.

Bumwi busiku Samuele kalede, wakamvwa muntu kaliikumwiita kati: ‘Samuele!’ Wakacijana kaya kuli Eli, pesi Eli wakati: ‘Teendakwiita pe.’ Eezi zyakacitika kwaziindi zyobile. Naakiitwa kwaciindi catatu, Eli wakamwaambila kuti, ikuti walimvwa lubo jwi eelyo weelede kwaamba kuti: ‘Kowamba Jehova ndiliswiilizizye.’ Eelyo Samuele wakacita mbubonya oobo. Mpawo Jehova wakati kuli Samuele: ‘Buzya Eli kuti ndiyanda kusubula mpuli yakwe akaambo kazintu zibi nzibacita.’ Ubonaanga cakali cuuba na kuli Samuele kubuzya Eli mulumbe ooyo?— Teecakali cuuba pe. Nikuba kuti Samuele wakali yoowede kubuzya EIi mulumbe ooyo, pesi wakacita eezyo Jehova nzyakamulayilide. Eezyo nzyakaambide Jehova zyakazuzikizigwa. Bana baEli bakali bapayizi bakajayigwa, alakwe Eli wakafwa.

Samuele ncikozyanyo cibotu kulindiswe. Wakacita zintu zibotu nikuba kuti wakabwene bamwi bantu kabacita zintu zibi. Aniwe uyooyinkilila kunembo na, kucita zili kabotu mbuli mbwaakacita Samuele? Ikuti wacitoobo uyoobotezya Jehova andiswe.