Jehova Wakaambuula aSamiyele

Mupayizi Mupati Eli, wakali abana babili bapayizi bakali kubelekela kutente lyakukombela. Umwi wakali Hofini alubo umwi wakali Finiyasi. Bana baEli teebakali kutobela milawu yaJehova alimwi bakali kubajata chalunya bantu. Chiindi maIsrayeli nibakali kweeta zituuzyo kuli Jehova, Hofini aFiniyasi bakali kubweza nyama mbotu akwiichita yabo. Nikuba kuti Eli wakali kuzimvwa zyakali kuchitwa abana bakwe, pesi taakwe naakabapa lulayo. Jehova wakali kuyoozileka kazili mbuboobu na zintu?

Samiyele wakali muniini kuli Hofini aFiniyasi, pesi taakwe naakachita nzibakali kuchita. Jehova wakali kumuyanda Samiyele. Bumwi buzuba Samiyele naakalede mansiku, wakamvwa jwi lyakamwiita. Kuzwa waawo, Samiyele wakabuka, waya kuli Eli, mpawo wakati: ‘Ndasika!’ Pesi Eli wakati: ‘Tandikwiitide pe. Bweeda ukalale.’ Kuzwa waawo, Samiyele wakaya kukulala. Wakamvwa jwi kalimwiita lubo. Mpawo Samiyele naakayitwa kwachiindi chatatu, Eli wakaziba kuti Jehova nguwe wakali kwiita Samiyele. Mpawo Eli wakabuzya Samiyele kuti, ikuti naa ulimvwe lubo jwi kalikwiita, waambe kuti: ‘Wamba Jehova. Mubelesi wako uliswiilizizye.’

Samiyele wakabweeda lubo kukulala. Mpawo wakamvwa jwi kaliti: ‘Samiyele! Samiyele!’ Wakasandula kati: ‘Wamba. Mubelesi wako uliswiilizizye.’ Mpawo Jehova wakamubuzya kuti: ‘Buzya Eli kuti ndiyoomusubula ampuli yakwe. Ulizi kuti bana bakwe bali kuchita zintu zibi kutente lyakukombela, pesi taakwe nzyakabachita pe.’ Nibwakacha, Samiyele wakajula milyango yatente lyakukombela mbuli mbakali kuchita lubbe. Wakaliyoowede kubuzya mupayizi mupati nzyakabuzidwe aJehova. Pesi Eli wakamwiita akumubuzya kuti: ‘Mwanaangu, Jehova wakubuzyaanzi? Ndibuzye zyoonse.’ Mpawo Samiyele wakabuzya Eli makani woonse.

Jehova wakayinkilila kunembo kagwasya Samiyele mbuli mbakali buya bukomena. Kuzwa kulubazu lumwi lwanyika kuya kulubazu lumwi, maIsrayeli bakalizi kuti Jehova wakasalide Samiyele kuti abe musinsimi akuba mubetesi.