Kuli Mpunga Wamvwa Kulendelelwa Akuyoowa Na?

Langa kalombe kalimucifwanikisyo. Ulikabwene na kuti kalangika kakalendeledwe alimwi kakayoowede? Kuli mpunga wamvwa mbuboobo na?— Muntu woonse ngawalimvwa mbuboobo cimwi ciindi. IBbaibbele lyambuula atalaa beenzinyina baJehova aabo bakayoowa akulendelelwa. Umwi wabo wakali Eliya. Atwiiye atalaa nguwe.

Eliya wakali kukkala kuIsrayeli ciindi loko, Jesu katanazyalwa. Ahabu mwami waIsrayeli, taakali kukomba Leza wakasimpe, Jehova. Ahabu amwanakazi wakwe, Jezebeli, bakali kukomba leza wakubeja, Baala. Nkinkaako, bantu biingi kuIsrayeli bakatalika kukomba Baala. Mwanakazi wamwami, Jezebeli, wakalaa lunya alimwi wakali kuyanda kujaya bantu boonse bakali kukomba Jehova, aamwi aEliya! Ulizi na kuti Eliya wakacitaanzi?—

Eliya wakacija! Wakaya kunkanda ooko kwakali kule loko alimwi wakakuyuba mumpangala yabbwe. Ubonaanga wakazicitilaanzi eezyo?— Nkaambo wakali yoowede. Pesi Eliya taakeelede kuyoowa pe. Nkamboonzi? Nkaambo wakalizi kuti Jehova ulakonzya kumugwasya. Jehova wakali wamutondezya kale nguzu zyakwe muciindi cakiinda. Mulicimwi ciindi, Jehova wakali wasandula nkombyo yaEliya kwiinda mukweeta mulilo kuuzwa kujulu. Nkinkaako nikuba muciindi eeco naakali kuyoowa, Jehova wakali kuyoomugwasya Eliya.

Ciindi Eliya naakali mumpangala, Jehova wakaambulaa nguwe alimwi wakamubuzya kuti: ‘Uliikucitaanzi okuno?’ Eelyo Eliya wakasandula kati: ‘Ndime andikke ndasyaala kandikukomba, alimwi ndiyoowa kuti balandijaya.’ Eliya wakali kuyeeya kuti bakombi baJehova boonse bakali bajayigwa. Pesi Jehova wakaambila Eliya kuti: ‘Peepe, teensi zyacoonzyo pe eezyo. Kuli bamwi bantu bali 7 000 bacindikomba. Koba sicamba. Ndilaa milimu myiingi loko njindiyanda kuti ucite!’ Ubonaanga Eliya wakabotelwa na kumvwa majwi aayo?—

Wiiyaanzi kuzwa kuleezyo zyakacitika kuli Eliya?— Taweelede kuyoowa pe akulendelelwa. Ulaabeenzinyokwe bayanda Jehova alimwi bakuyanda. Alubo Jehova ulaamanguzu miingi, alimwi unookugwasya ciindi coonse! Wabotelwa na kuziba kuti Jehova unookugwasya ciindi coonse?—