Jehova Wakasimya Eliya

Jezebbeli wakanyema naakamvwa zyakachitikila basinsimi baBbaala. Wakatuma mulumbe uya kuli Eliya wakuti: ‘Juunza ulafwa mbuli basinsimi baBbaala.’ Eliya wakayoowa alimwi wakachijila kunkanda. Wakakomba kati: ‘Jehova nsichiyandi pe kupona. Kondipa kuti ndifwe.’ Mpawo Eliya wakalala muunsi amusamu nkaambo wakali katede.

Mungelo wakamusinsimuna akumubuzya kuti: ‘Buka, ulye.’ Eliya wakabona chinkwa chakabikkidwe amabwe apya anongo yamaanzi. Wakalya akunywa naakamana, wakalala lubo. Mungelo wakamusinsimuna lubo akumubuzya kuti: ‘Buka ulye nkaambo uyooyenda lweendo lulamfu.’ Eliya wakalya lubo. Kuzwa waawo, wakeenda sikati amansiku kwamazuba aali 40, kuyoosika kuChilundu chaHorebbu. Kali nkukooko, Eliya wakanjila mumpako yabbwe pati akoona. Pesi Jehova wakabuzya Eliya kuti: ‘Ulikuchitaanzi okuno Eliya?’ Eliya wakavwiila kati: ‘MaIsrayeli bakachilwa kubamba chisyomezyo chabo kulinduwe. Bamwaya zipayililo zyako akujaya basinsimi bako. Lino bayanda kundijaya andime.’

Jehova wakamubuzya kuti: ‘Koya ukayimikile achilundu.’ Kwakasanguna kuunga guwo pati. Mpawo kwakaba muzuzumo alimwi kwakaboneka mulilo. Kumamanino, Eliya wakamvwa jwi lyakali kwaambuula chaansi-aansi. Wakalivumba kumeso achigogo chakwe alimwi wakayimikila aanze abbwe pati. Jehova wakamubuzya kuti nkamboonzi naakachija. Eliya wakati: ‘Ndime andikke ndasyaala.’ Pesi Jehova wakamubuzya kuti: ‘Teenduwe pe awulikke. Kuchili bantu bali 7 000 kuIsrayeli bachindikomba. Koya, ukananike Elisha kuti abe musinsimi mubusena bwako.’ Chakufwambaana, Eliya wakachita nzyakabuzigwa aJehova. Ubonaanga Jehova ulakonzya na kukugwasya ikuti wachita zintu nzyayanda? Ulakonzya kukugwasya. Atwiiye zimwi zyakachitika chiindi nikwakali nzala.