Amulangile kuli Leza kuti Mubotelwe Mulukwatano

Jehovaa Leza nguwe wakatalisya lukwatano lwakusaanguna. IBbaibbele litwaambila kuti wakalenga mwanakazi wakutalika alimwi ‘wakamweeta kumuntu.’ Adamu wakabotelwa loko zyakuti wakaamba kuti: “Ooyu ulijisi zifuwa mbubonya mbuli zifuwa zyangu anyama mbubonya mbuli nyama yangu.” (Matalikilo 2:22, 23) Jehova uciyanda kuti bantu bakwetene kababotelwa.

Ciindi nimukwatana, mulakonzya kuyeeyela kuti zintu zyoonse zinooyenda muwelewele. Nikuba boobo, masimpe ngakuti bantu bakwetene alimwi bayandana balakonzya kuswaananaa mapenzi. (1 BaKorinto 7:28) Mukabbuku aaka, muyoojana malayilile aazwa muBbaibbele akonzya kumugwasya kuti mubotelwe mulukwatano amumpuli yanu ikuti mwaabelesya.​—Intembauzyo 19:8-11.

1 ZUMINA MUKULI NGWAKUPEDE JEHOVA

NZILYAAMBA BBAIBBELE: Mwaalumi ngumutwe wampuli.​—BaEfeso 5:23.

Ikuti kulimwaalumi, Jehova uyanda kuti ujate mwanakazi wako mbuli ji. (1 Petro 3:7) Wakamucita kuti abe mugwasilizi wako, alimwi uyanda kuti umulemeke akumuyanda camoyo woonse. (Matalikilo 2:18) Weelede kumuyanda loko mwanakazi wako cakuti ulakonzya kucita nzyayanda mubusena bwakutalika kwiinda nzyuyanda.​—BaEfeso 5:25-29.

Ikuti kulimwanakazi, Jehova uyanda kuti ulemeke mulumaako kazizwa aansi aamoyo alimwi umugwasilizye kuzuzikizya mukuli wakwe. (1 BaKorinto 11:3; BaEfeso 5:33) Zuminanaa kusala kwakwe alimwi ubelekelaamwi anguwe camoyo woonse. (BaKolose 3:18) Ikuti wacitoobo, uyooba mwanakazi uulikabotu mumeso amulumaako akuli Jehova.​—1 Petro 3:1-6.

NZYOKONZYA KUCITA:

• Buzya ngokwetenaawe nzyokonzya kucita kuti ube mwaalumi naa mwanakazi uuli kabotu. Swiilisisya, alimwi ucite nzyukonzya kuti uyungizye kucita zintu zili kabotu

• Kobaa moyo mulamfu. Zitola ciindi cilamfu kuti moonse kamuli babili mucite zintu zibotezya kuli umwi awumwi wanu

2 BIKKILA MAANU KUNZILA NJALIMVWAAYO NGOKWETENAAWE

NZILYAAMBA BBAIBBELE: Weelede kubikkila maanu kuzintu ziyandwaa ngokwetenaawe. (BaFilipi 2:3, 4) Jata ngokwetenaawe mbuli muntu uuyandikana, kutalubi kuti Jehova uyanda kuti babelesi bakwe babe ‘batete-moyo kubantu boonse.’ (2 Timoteo 2:24) “Majwi aabantu bamwi alayasa mbuli ipanga, pele lulimi lwabasongo lulaponya.” Nkinkaako, sala majwi aako munzila yakucenjela. (Tusimpi 12:18) Muuya Usalala waJehova uyookugwasya kuti wambuule munzila yabuuya ayaluyando.​—BaGalatiya 5:22, 23; BaKolose 4:6.

NZYOKONZYA KUCITA:

• Kamutanatalika kwambuula, komba kolombela lugwasyo kuti ukonzye kubatama akuti ukonzye kuswiilila mizeezo yangokwetenaawe ciindi nomwambuula zintu ziyandikana

• Yeeyesya atalaa majwi ngoyanda kwaambuula anzila njotakambuulaayo

3 AMUBAA MUZEEZO UUMWI

NZILYAAMBA BBAIBBELE: Ciindi nomukwatana muba “nyama yomwe” angokwetenaawe. (Matayo 19:5) Pesi mucili bantu babili alimwi mulakonzya kubaa mizeezo iisiyene. Nkinkaako mweelede kuti mwiiye kukamantana mumizeezo amunzila njomulimvwaayo. (BaFilipi 2:2) Lukamantano lulayandika ciindi nomusala zyakucita. IBbaibbele lyaamba kuti: “Lulayo lulayandwa kuti makanze azuzikizigwe.” (Tusimpi 20:18) Amuzumizye malayilile aazwa muBbaibbele kuti amusololele ciindi nomusala zyakucita ziyandikana kamulaamwi.​—Tusimpi 8:32, 33.

NZYOKONZYA KUCITA:

• Buzya ngokwetenaawe nzila njolimvwaayo, ikutali kwaamba biyo makani naa mizeezo yako

• Wambuulaa ngokwetenaawe kotana sala zyakucita