Amusyomeke kuli Umwi Awumwi Wanu

Jehova uyanda kuti ‘tuyandisye bululami.’ (Mika 6:8) Eeci cilayandikana mulukwatano nkaambo lukwatano lutakwe kusyomeka talukwe kusyomana pe. Alimwi kusyomana kulayandikana kuti luyando luzwidilile.

Mazubaano, kusyomeka mulukwatano nkuce. Ikuti mukwabilile lukwatano lwenu, mweelede kucita zintu zibili.

1 AMUBIKKE LUKWATANO LWANU MUBUSENA BWAKUSAANGUNA

NZILYAAMBA BBAIBBELE: “Musalulule zintu ziinda kubota.” (BaFilipi 1:10) Lukwatano lwenu nciimwi cazintu ziyandikana loko mubuumi bwenu. Lweelela kubikkwa mubusena bwakutalika.

Jehova uyanda kuti ukakatile kumuntu ngokwetenaawe alimwi ‘mubotelwaamwi mubuumi.’ (Mukambausi 9:9) Wakazibikkaa ntanganana kuti toyeelede kumulangilaansi pe ngokwetenaawe, pesi moonse mweelede kuyanduula nzila zikonzya kupa kuti umwi awumwi wanu abotelwe. (1 BaKorinto 10:24) Cita kuti ngokwetenaawe alimvwe kayandikana.

NZYOKONZYA KUCITA:

• Weelede kubaa ciindi cakubaamwi ayooyo ngokwetenaawe alimwi komubikkila maanu camoyo woonse

• Yeeya koti “iswe” ikutali kuti “ime”

2 BAMBA MOYO WAKO

NZILYAAMBA BBAIBBELE: ‘Umwi awumwi uulangilila mwanakazi cakumusukama wabucita kale bumambi anguwe mumoyo wakwe.’ (Matayo 5:28) Ikuti muntu wiinkilila kunembo kayeeya zintu zikonzya kumupa mizeezo yakoonana, ooko kunooli kutondezya kutasyomeka kuli yooyo ngwakwetenaawe.

Jehova waamba kuti weelede ‘kubamba moyo wako.’ (Tusimpi 4:23; Jeremiya 17:9) Ikuti ucitoobo, weelede kubamba meso aako. (Matayo 5:29, 30) Tobelezya cikozyanyo casikale Jobu, ooyo wakapanga cizuminano ameso aakwe kuti atalangi mwanakazi uumbi cakumumenenena mate. (Jobu 31:1) Zumanana kuteebela zintu zyeetela mizeezo yakoonana (iponogilafi). Alubo, tantamuka kuzintu zisololela kukuyandana awumwi muntu uutali yooyo ngokwetenaawe.

NZYOKONZYA KUCITA:

• Zibikkaa ntanganana kubantu kuti ulilipedelede kuliyooyo ngokwetenaawe

• Bikkila maanu kunzila njalimvwaayo ngokwetenaawe alimwi weelede kufwambana kumana kufumbwa buzolwani bukonzya kupa kuti ngokwetenaawe atalimvwi kabotu