Bajisini Mukuchita Kuyanda kwaJehova

MUNYIKA yoonse kuli mbunga zisiyene-siyene ziswaanizya zyabukombi, zyapolitikisi, zyakuuzya azilangania bukkale bwabantu alubo mbunga eezi zilaamaboneno amakanze aasiyene-siyene. Pesi kuli mbunga iimwi iisiyene azimwi mbunga. Jwi lyaLeza litondeezya kuti nimbunga yaBakamboni baJehova.

² Chilabotezya kuti wakaba mumbunga yaJehova. Wakayiya kuyanda kwaLeza alubo uliikukuchita. (Int. 143:10; Rom. 12:2) Wasala kuba mubelesi waJehova alubo ukombaamwi abakwesu balaaluyando, bali munyika yoonse. (2 Kor. 6:4; 1 Pet. 2:17; 5:9) Bbayibbele litondeezya kuti kuchita oobo kupa kuti ujane kubotelwa azilongezyo. (Tus. 10:22; Mk. 10:30) Kubelekela Jehova chakusyomeka, kuyookugwasya kuti ukajane zilongezyo zitamani.—1 Tim. 6:18, 19; 1 Joh. 2:17.

³ Mulengi wesu Mupati ulaambunga iisiyene azimwi mbunga munyika yoonse alubo nguyiyendelezya. Eezi zyaamba kuti iyendelezegwa aJehova alubo nguMutwe wayo. Tulamusyoma amoyo woonse. Mubetesi wesu, Ngusikutupa milawu alubo Mwaami wesu. (Is. 33:22) Mbukunga nguLeza uubambikene, wakachita mabambe akuti katubeleka “antoomwe anguwe” kuchitila kuti kuyanda kwakwe kuchitwe.—2 Kor. 6:1, 2.

⁴ Tweelede kuzumina kweendelezegwa aMwaami Jesu Kristu wakasalwa, mbukunga bweende oobu bwazintu bwaba afwiifwi kumana. (Is. 55:4; Ciy. 6:2; 11:15) Jesu wakaamba kuti batobeli bakwe bakali kuyoochita milimu mipati kwiinda njaakachita naakali aanyika. (Joh. 14:12) Masimpe kuti batobeli baJesu bakali kuyookambawuka kwachiindi chilamfu, bakali kuyoovula akukambawuka mumasena miingi. Bakali kuyookambawuka makani mabotu aaBwaami munyika yoonse.—Mt. 24:14; 28:19, 20; Mil. 1:8.

⁵ Makani aaya atondeezya kuti eezi ziliikuzuzikizigwa. Nikuba boobo, Jesu wakaamba kuti mulimu wakukambawuka makani mabotu uyoomana achiindi chibikkidwe aJehova. Bupolofita boonse buli muJwi lyaLeza butondeezya kuti buzuba bupati, buyoosya bwaJehova bwaba afwiifwi.— Joel. 2:31; Zef. 1:14-18; 2:2, 3; 1 Pet. 4:7.

⁶ Zyaamba kuti tweelede kuziba zintu zichitwa ambunga yaLeza akubelekelaamwi anjiyo. Mbukunga twakumvwisisisya kuyanda kwaLeza akubona kuti tupona muchiindi chakumamanino, tweelede kusungwaala mukuchita nzyayanda Leza, akubelekela amwi ambunga nkaambo mbunga ibelesya malayilile, milawu anjiisyo zizwa muJwi lyaLeza.—Int. 19:7-9.

⁷ Kuti babelesi baJehova batobelezya malayilile aaya aazwa muBbayibbele, zipa kuti babe aluumuno akujatana. (Int. 133:1; Is. 60:17; Rom. 14:19) Niinzi chipa kuti bakwesu kabajisini munyika yoonse? Nduyando. Zyoonse nzituchita ziyeeme muluyando ndotulaalo. (Joh. 13:34, 35; Kol. 3:14) Kuti twachita zintu ziyandwa aLeza, tuyooyendaamwi ambunga yaJehova iili kujulu.

MBUNGA YAJEHOVA IILI KUJULU

⁸ Mupolofita Isaya, Ezekkiyele aDaniyele bakabona zilengaano zyambunga yaJehova iili kujulu. (Is., chaandaano 6; Ezk., chaandaano 1; Dan. 7:9, 10) Alubo, mwaapostolo Johane wakabona chilengaano chambunga iili kujulu alubo wakatubuzya mubufwiifwi zintu nzyaakabona mubbuku lyaCiyubunuzyo. Wakabona Jehova kakkede achuuno chakwe chabwaami alubo kazyungulukidwe abangelo bakali kwaamba kuti: “Ulasalala, ulasalala, ulasalala Jehova Leza, Singuzuzyoonse, ooyo wakaliko, uuliko alimwi uuboola.” (Ciy. 4:8) Alubo Johane wakabona “akati kacuuno cabwami . . . mwanambele wiimvwi,” Mwanaambelele waLeza, chaamba Jesu Kristu.— Ciy. 5:6, 13, 14; Joh. 1:29.

⁹ Muchilengaano Johane nchaakabona Jehova kakkede aachuuno chabwaami, zitondeezya kuti Jehova nguyendelezya mbunga eeyi. Lugwalo lwa 1 Makani 29:11, 12 lutondeezya bupati bwaJehova, lwaamba kuti: “Yebo O Jehova, bupati, nguzu, bweebesi, lulemeko abulemu nzizyako, nkaambo zintu zyoonse kujulu alimwi aanyika nzizyako. Bwami mbubwako, O Jehova. Yebo ndonduwe oosumpukide mbuli silutwe wazyoonse. Buvwubi abulemu zizwa kulinduwe, nduwe weendelezya zintu zyoonse, alimwi mujanza lyako mozibede nguzu abupati, alimwi janza lyako lilakonzya kusumpula akupa nguzu kuli boonse.”

¹⁰ Mbukunga Jesu Kristu ngusimilimonyina aJehova, wakapegwa chuuno chisumpukide kujulu amanguzu akweendelezya. Jehova “wakabombya zintu zyoonse kunsi aamaulu aakwe, akumubikka kuti abe mutwe wazintu zyoonse zijatikizya mbungano.” (Ef. 1:22) Naakali kwaambuula atala aJesu, mwaapostolo Pawulu wakati: “Leza wakamusumpula akumupa cuuno caatala azina liinda mazina oonse, kutegwa muzina lya Jesu boonse bafwugame—aabo bali kujulu, anyika alimwi abaabo bali mubulongo—alimwi boonse beelede kuzumina caantangalala kuti Jesu Kristo Mwami kutegwa Leza Taata alemekwe.” (Flp. 2:9-11) Nkinkaako, tulakonzya kusyoma kuti Jesu Kristu mweendelezi uululeme.

¹¹ Mupolofita Daniyele wakabona chilengaano chaSinsiku kakkede achuuno chakwe chakujulu abangelo bakali “cuulu cazyuulu zyabaabo bakali kukutauka kumbele lyakwe, abali zyuulu zili kkumi iziyungizyidwe ziindi zili zyuulu zili kkumi ibakaimvwi kumbele lyakwe.” (Dan. 7:10) Bbayibbele lyaamba kuti nkamu yabangelo “myuuya iibeleka mulimo uusalala, ibatumwa kubelekela baabo ibayookona lufwutuko.” (Heb. 1:14) Bangelo boonse bapedwe ‘zyuuno zyabwami, bulelo, mfwulumende naa bweendelezi.’—Kol. 1:16.

¹² Ikuti twayeeyesesya atala ambunga yaJehova iili kujulu, tulakonzya kumvwisisisya nzyaakachita Isaya chiindi naakabona ‘Mwaami Leza kakkede achuuno chabwaami,’ alubo “ajulu lyakwe kwakaliimvwi baangelo baserafimu.” Isaya wakati: “Maawe mebo! Ndanyonyooka, nkaambo ndimuntu uusofweede kumilomo, alimwi ndikkede akati kabantu basofweede kumilomo; nkaambo meso aangu abona Mwami, Jehova wamakamu lwakwe.” Masimpe kuti Isaya wakayoowa akulibombya naakabona bupati bwambunga yaJehova. Nzyaakabona zyakamujata zyakuti chiindi Jehova naakali kuyanda muntu wakutuma kuchita mulimu uuyandikana wakwaambilizya lubeta lwakwe, Isaya wakati: “Ndime aano! Kondituma!”—Is. 6:1-5, 8.

¹³ Kuziba akumvwisisisya mbunga yaJehova kupa kuti babelesi Bakwe bazumine mbuli mbaakachita Isaya. Tuyanda kweendaamwi ambunga yaJehova chiindi choonse. Alubo, tuyanda kutondeezya kuti tulayisyoma mbunga yaJehova.

MBUNGA YAJEHOVA ILIKWIINKILILA KUNEMBO

¹⁴ Chaandaano 1 chabbuku lyaEzekiele, chitondeezya kuti Jehova ngutantide nkalaki mpati yakujulu. Nkalaki eeyi iibeka-beka iyiminina mbunga yaJehova iili kujulu. Nguyitantide nkaambo nguwe uyiyendelezya alubo njabelesya kuti azuzikizye makanze aakwe.—Int. 103:20.

¹⁵ Vili limwi alubo lilaavili limbi mukati, lyeelene andilyo. Eezi nzinzyo zipa kuti mavili aaya kayenda “kumabazu aangawo oonse one.” (Ezk. 1:17) Mavili aayo alakonzya kuchenguluka chakufwambaana. Nikuba boobo, tazyaambi kuti nkalaki eeyi tiinyoneki pe. Jehova talekeli mbunga yakwe kuti iyinke kufumbwa nkuyayanda kuya. Lugwalo lwaEzekieli 1:20 lwaamba kuti: “Zyakali kuunka ooko muuya nkuwakali kuyanda kuti zyuunke.” Eezi zitondeezya kuti Jehova nguwe uupa kuti iyinke kufumbwa muuya wakwe nkuuyanda kuti iyinke. Nkinkaako, tweelede kulibuzya kuti, ‘Ndiliikweendezyania ambunga yaJehova na?’

¹⁶ Kweendaamwi ambunga yaJehova kuswaanizya zintu zyiingi kutali kunjila miswaangano akukambawuka makani mabotu luzutu. Pesi kuswaanizya kwiinkilila kunembo akusima muzintu zyabukombi. Tweelede kuchita “zintu ziyandika kapati” alubo tweendaamwi alwiiyo ndutupegwa ambunga yaJehova. (Flp. 1:10; 4:8, 9; Joh. 17:3) Tweelede kuyeeya kuti kuyandikana bweendelezi akubelekelaamwi kuti zintu zyeende kabotu. Nkinkaako, tweelede kubelesya kabotu chiindi chesu, manguzu azintu Jehova nzyatupede kuti tuchite kuyanda kwakwe. Tulakonzya kweendaamwi ambunga yaJehova kwiinda mukupona kweendelana amulumbe ngutukambawuka.

¹⁷ Kwiinda mumbunga yakwe, Jehova uliikutugwasya kuti twiinkilile kunembo mukuchita kuyanda kwakwe. Utalubi kuti nguJehova uutantide nkalaki eeyi yakujulu. Nkinkaako, kweendaamwi ankalaki yakwe, kutondeezya kuti tulamulemeka Jehova akumusyoma kuti niNdomba yesu. (Int. 18:31) Bbayibbele lisyomezya kuti: ‘Jehova uyoobapa nguzu bantu bakwe, Jehova ulalongezya bantu bakwe aluumuno.’ (Int. 29:11) Akaambo kakuti tuli mumbunga yakwe iibambikene, tujana manguzu aluumuno Jehova nzyapa babelesi bakwe. Ikuti twayinkilila kunembo katuchita kuyanda kwaJehova, tuyoojana zilongezyo zyiingi.