Babelesi Babelekela Bachita Mulimu Uuyandikana

MWAAPOSTOLO Pawulu wakalembela mbungano yakuFilipi kuti: “Ndime Paulo nendili antoomwe a Timoteo, tobazike ba Kristo Jesu, nendilembela basalali boonse ibakamantene a Kristo Jesu ibali mu Filipi, kubikkilizya abalangizi alimwi abakutausi [babelesi babelekela].” (Flp. 1:1) Mulugwalo oolu, Pawulu wakaamba atala ababelesi babelekela. Chiindi, bakwesu aaba bakali kuchita mulimu uuyandikana wakugwasya baalu mumbungano. Mbukubede mazubaano. Babelesi babelekela bagwasya baalu alubo bachita kuti mbungano ikkale kiibambikene.

² Ulibazi na babelesi babelekela bali mumbungano yanu? Ulayibona na milimu njibachita iikugwasya alubo iigwasya mbungano? Jehova ulakubotelelwa kubeleka changuzu nkubachita bakwesu aaba. Pawulu wakalemba kuti: “Nkaambo bantu aabo ibabeleka kabotu balijanina mpuwo mbotu alimwi balakonzya kwaamba cakutayoowa abuniini kujatikizya lusyomo lwabo muli Kristo Jesu.”—1 Tim. 3:13.

ZYEELELO ZYABABELESI BABELEKELA ZIZWA MUMAGWALO

³ Babelesi babelekela beelede kuba bantu bapona kabotu mbuli maKristu, basyomeka alubo bazuzikizya milimu njibapedwe. Eezi zilaantanganana kuti twabona zyeelelo nzyakaamba Pawulu kabuzya Timoteyo kuti: “Mbubonya buyo abalo bakutausi beelede kuba bantu basimide mumizeezo, ikutali basimilaka yobilo, ikutali banywa waini munji, ikutali bayanda kujana mpindu cabumpelenge, pele ibakakatila kumaseseke aa Leza aajatikizya lusyomo kabajisi manjezyeezya aasalala. Alimwi, aaba beelede kusaanguna kusolwa naa baleelela; nomuya mubalekele kubeleka mulimo wabukutausi, mbwaanga tabajisi butongo. Bakutausi beelede kuba balumi bakwete mukaintu omwe, ibeendelezya kabotu bana babo alimwi abamumaanda aabo beni.” (1 Tim. 3:8-10, 12) Kuti mubelesi uubelekela kapona kweendelana azyeelelo zizwa muMagwalo, ziyoopa kuti kutabi muntu uusyooloka akaambo kabaalumi bapedwe mitolo mumbungano.

⁴ Kufumbwa minyaka njibalaayo, babelesi babelekela babeleka chabusungu mumulimu wakukambawuka chiindi choonse alimwi batobelezya chikozyano chaJesu. Kwiinda mubusungu bwabo, batondeezya kuti Jehova uyanda kuti bantu boonse bakafutuke.—Is. 9:7.

⁵ Babelesi babelekela beelede kuba zikozyano zili kabotu kwiinda munzila njibazwataayo, njibaambuulaayo anjibalijataayo. Balalibatamika eezi zipa kuti balemekwe. Kuyungizya waawo, babikkila maanu kubweenzinyina mbubalaabo aJehova akumilimu njibachita mumbungano.—Tit. 2:2, 6-8.

⁶ Bakwesu aaba beelede “kusolwa naa baleelela.” Batondeezya kuti balalipeda nikuba kabatanasalwa kuba babelesi babelekela. Batondeezya kuti babikka Bwaami mubusena bwakusaanguna mubuumi bwabo alubo batondeezya kuti balilipedelede kuchita kufumbwa milimu iichitwa mumbungano. Nisimpe kuti bakwesu aaba nzikozyano zili kabotu mumbungano.—1 Tim. 3:10.

MILIMU IICHITWA ABABELESI BABELEKELA

⁷ Babelesi babelekela bachita milimu iisiyene-siyene iigwasya mbungano alimwi eezi zigwasya baalu kuti bajane chiindi chiingi chakuchita mulimu wakuyiisya awakweembela mbungano. Chiindi nikuli mulimu uuyanda kuchitwa mumbungano, kabunga kabaalu kalalanga-langa kuti mubelesi uubelekela ulakonzya na kuuchita.

⁸ Atulange-lange milimu iichitwa ababelesi babelekela: Umwi ubeleka kupa basikupupulula mabbuku aakubala naakuti aakubelesya mumulimu wakukambawuka. Bamwi babeleka kulanga zyama-akkawunsi aambungano naakuti kubamba malekkodi aabusena bwakukambawuka. Bamwi balangania kubelesegwa kwama microphone, kubamba minchina iibelesegwa kuNg’anda yaBwaami, kuba balindi akugwasya baalu munzila zisiyene-siyene. Kuli mulimu mwiingi wakubamba Ng’anda yaBwaami kuti ikkale kayili kabotu, babelesi babelekela balakonzya kugwasya kuchita milimu eeyi.

⁹ Mumbungano zimwi, mubelesi uubelekela ulakonzya kunoochita mulimu uumwi luzutu. Pesi kuli zimwi mbungano, mubelesi uubelekela ulakonzya kuchita milimu myiingi. Chimwi chiindi, babelesi babelekela balakonzya kugwasyania kuchita mulimu umwi. Pesi kuti mumbungano kakuli babelesi babelekela bache, kabunga kabaalu kalakonzya kusala bamwi bakwesu bakabbabbatizigwa bali bachita kabotu mubukombi. Eezi ziyoopa kuti bakwesu aaba bajane luzibo luyoobagwasya chiindi baakusalwa kuti babe babelesi babelekela. Kuti kakutakwe bakwesu, muchizi uuchita kabotu muzintu zyabukombi ulakonzya kusalwa kuti kachita milimu eeyi nikuba kuti takonzyi kujana chilongezyo chakuba mubelesi uubelekela. Muntu uchita kabotu mubukombi nguulijata kabotu alubo kasimide mubukombi. Nchikozyano chili kabotu mukunjila miswaangano, mukusungwaala mumulimu wakukambawuka, mukulangania mpuli yakwe, munzila njasalaayo zyakulikondelezya, munzila njazwaataayo azimwi zili boobo.

¹⁰ Mumbungano muli baalu bache, babelesi babelekela balakonzya kubuzya aabo bayanda kubbabbatizigwa mibuzyo yakubbabbatizigwa ilaatala anjiisyo zizwa muBbayibbele. Mibuzyo eeyi ijanika mumakani aali kumamanino aabbuku eeli, “Chipanzi 1: Njiisyo zyamaKristu.Chipanzi 1: Njiisyo zyamaKristu.” Mbukunga ““Chipanzi 2: Buumi bwamaKristu” chaambuula atala azintu ziyandikana cheelede kuchitwa amwaalu.

¹¹ Chiimwi chiindi, kabunga kabaalu kalakonzya kuchinchanisya milimu babelesi babelekela njibachita. Nikuba boobo, kulagwasya kuti bakwesu bagame kuchita mulimu ngubapedwe kuchitila kuti bajane luzibo.

¹² Kweendelana aziyandikana zyambungano, babelesi babelekela batondeezya milimu mibotu ‘iibonwa abantu boonse,’ balakonzya kupegwa imwi milimu. (1 Tim. 4:15) Mumbungano muli baalu bache, mubelesi uubelekela ulakonzya kubeleka kali mugwasilizi wamulangizi wakabunga naakuti mubelesi wakabunga kapegwa malayilile abaalu. Babelesi babelekela balakonzya kuchita zimwi zipaanzi zyaMuswaangano waBuumi Amulimu Wesu, kuswaanizya kuchitisya Chiiyo chaBbayibbele chaMbungano akupa nkani yabantu boonse. Chimwi chiindi, babelesi babelekela beelela balakonzya kupegwa imwi milimu kuti kakuli zimwi ziyanda kuchitwa. (1 Pet. 4:10) Babelesi babelekela beelede kulipeda kugwasya baalu.

¹³ Nikuba kuti mulimu wabo ulisiyene amulimu wabaalu, pesi uyandikana loko mumeso aaLeza alubo upa kuti zintu kazyeenda kabotu mumbungano. Mukuya kwachiindi, kuti kabawuchita kabotu mulimu wabo akuboneka kuti baleelela kuba beembezi abayiisi, balakonzya kulumbayizigwa kuti babe baalu.

¹⁴ Kuti kuli mukubusi naakuti mukwesu uubbabbatizidwe, ulikubelekela kuti ube mubelesi uubelekela na? (1 Tim. 3:1) Munyaka amunyaka, kuli bantu biingi baliikubbabbatizigwa, nkinkaako, kuyandikana baalumi basimide mubukombi kuti balanganie mbungano. Ulakonzya kubelekela kuba mubelesi uubelekela kwiinda mukugwasya bamwi mumbungano. Imwi nzila iikonzya kukugwasya kuti uchite oobo, nkuyeeyesesya atala achikozyano chibotu chaJesu. (Mt. 20:28; Joh. 4:6, 7; 13:4, 5) Chiyandisyo chako chiyokomena chiindi nubona kubotelwa kweetwa akaambo kakupa. (Mil. 20:35) Alubo, ulakonzya kulipeda kugwasya bamwi, kubambulula Ng’anda yaBwaami naakuti kupa nkani muMuswaangano waBuumi Amulimu Wesu. Eezi ziswaanizya kuba abube bulikabotu mbukonzya kubaabo kwiinda mukubala Bbayibbele chiindi choonse. (Int. 1:1, 2; Gal. 5:22, 23) Kuyungizya waawo, mukwesu uyanda kuchita zyiingi mumbungano weelede kusyomeka akwiizuzikizya milimu njapedwe mumbungano.—1 Kor. 4:2.

¹⁵ Babelesi babelekela babikkwa amuuya uusalala kuchitila kuti mbungano igwasigwe. Boonse mumbungano balakonzya kutondeezya kuti balayilumba milimu iichitwa ababelesi babelekela, kwiinda mukubelekelaamwi ambabo chiindi nibachita milimu njibapedwe. Kuti mbungano yachita oobo, inooli kiitondeezya kuti ilalumba bubambe bwaJehova bwakuti mbungano ikkale kiibambikene.—Gal. 6:10.