CHIIYO 16
Mulimu Nzi Ngubalawo Babelesi Babelekela?
kuMyanmar
Cipanzi camuswaangano
Kabunga kamumulimu wakukambawuka
Kusalazya N’anda yaBwaami
IBbaibbele lipandulula tubunga tubili twabaalumi balangania ziyandikana mumbungano zyaBakamboni baJehova mbibayita kuti “balangizi alimwi abakutausi.” (baFilipi 1:1, NW) Mumbungano mujanika bakwesu biingi babeleka kabali babelesi babelekela. Mulimu nzi ngubabeleka kuti tugwasigwe?
Bagwasilizya kabunga kabaalu. Babelesi babelekela mbaalumi baciniini abapati basimide kumuuya basyomeka, alimwi bacita kabotu kumilimu yamumbungano. Babeleka milimu yeelede kucitwa mumbungano alimwi ayeyo yeelede kucitwa canguzu. Eezi zigwasya baalu kuti babikkile maanu mumulimu wakuyiisya awakweembela luzutu.
Bapa lugwasyo luyandikana. Bamwi babelesi babelekela baabilwa milimu yakutambula aabo baza kumiswaangano. Bamwi balanga-langa zibelesegwa kukwaambuula akupa mabbuku, akulanga ma-akkawunti ambungano, akupa ndawo zyakukambawukila. Bagwasizya lubo kusalazya N’anda zyaBwaami. Baalu balakonzya kubakumbila kuti bagwasye bacembeede. Kufumbwa mutolo ngubapegwa babelesi babelekela balawucita, luyandisisyo lwabo lwakubeleka milimu eeyi lupa kuti kabalemekwa abamumbungano boonse.—1 Timoteo 3:13.
Baalumi aaba baciKristu bapa citondeezyo cibotu. Babelesi babelekela balasalwa akaambo kabube bwabo bwakumuuya. Ciindi nibeendelezya zimwi zipanzi zyamiswaangano zipa kuti tusimisigwe mulusyomo. Kwiinda mukupa citondeezyo cibotu mumulimu wakukambawuka, bapa kuti andiswe tube basungu. Akaambo kamuuya wabo wakubelekelaamwi, bacita kuti kube kubotelwa akujatana mumbungano. (baEfeso 4:16) Mukuya kwaciindi abalabo bazoosika azyeelelo zyakubeleka kabali baalu.
Babelesi babelekela mbaalumi bali biyeni?
Babelesi babelekela bagwasya biyeni kuti zintu kazyeenda kabotu mumbungano?