Miswaangano Ipa Kuti ‘Tuyandane Akuchita Milimu Mibotu’

KUZWA chiindi, bakombi baJehova bakali kubungana munzila iibambikene. Chiindi chamaIsrayeli, baalumi boonse bakali kwiinka kuJerusalemu kuti bakasekelele mapobwe aatatu mapati. (Dt. 16:16) Mumwaanda wamunyaka wakusaanguna, maKristu bakali kubungana chiindi choonse mung’anda yawumwi mukwesu. (Flm. 1, 2) Andiswe mazubaano tulabotelwa kuba amiswaangano yambungano amiswaangano mipati. Nkamboonzi babelesi baJehova nibabunganaamwi? Nkaambo ninzila yakukomba Leza.—Int. 95:6; Kol. 3:16.

² Alubo, miswaangano ilakonzya kutugwasya. Chiindi maIsrayeli nibali kuyoochita Pobwe lyaZilawo, lyamusanu ayibili bakabuzigwa kuti: “Mweelede kunoobunganya bantu, baalumi, bamakaintu, bana amweenzu uuli muminzi yanu, kuti baswiilile akwiiya kuyoowa Jehova Leza wanu akulomya kutobela majwi oonse aa Mulawo ooyu.” (Dt. 31:12) Chilaantanganana kuti kaambo kapati kapa kuti katubungana nkakuti ‘tuyiisigwe aJehova.’ (Is. 54:13) Miswaangano ipa kuti tuzibane akuti tusungwaazyanie.

MISWAANGANO YAMBUNGANO

³ Basikwiiya bakabungene nilyakayinda Pentekoste lya 33 C.E., bakalilipedelede kunjiisyo yabaapostolo “buzuba abuzuba bakalisungweede kuswaangana mutempele amuzeezo omwe.” (Mil. 2:42, 46) Mukuya kwachiindi maKristu nibakali kubungana bakali kubala magwalo akazulwidwa amuuya uusalala amagwalo aakali kulembwa abaapostolo aamwi maKristu. (1 Kor. 1:1, 2; Kol. 4:16; 1 Tes. 1:1; Jak. 1:1) Alubo, bakali kukomba kabali mbungano. (Mil. 4:24-29; 20:36) Chimwi chiindi, mamishinali bakali kwaambuula atala anzibakali kuswaana mumulimu wakukambawuka. (Mil. 11:5-18; 14:27, 28) Bakali kulanga-langa njiisyo zizwa muBbayibbele akuzuzikizigwa kwabupolofita. Kwakali kupegwa malayilile atala ambubeelede kulijata maKristu akulemeka Leza. Boonse bakali kusungwaazigwa kuti babe bakambawusi basungweede bamakani mabotu.—Rom. 10:9, 10; 1 Kor. 11:23-26; 15:58; Ef. 5:1-33

⁴ Mazubaano miswaangano yamaKristu ichitwa mbuli mbuyakali kuchitwa muchiindi chabaapostolo. Tuswiilila malayilile ajanika mulugwalo lwa Bahebrayo 10:24, 25 lwaamba kuti: “Alimwi katubikkilana maano . . . , tutanooleki kuswaangana antoomwe, mbuli bamwi ibajisi ciyanza eeci, pele katukulwaizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.” Akaambo kakuti tupona kumazuba aakumamanino akataazya, tweelede kunjila miswaangano chiindi choonse kuchitila kuti tusungwaazigwe, kuti tukkale katusimide mubukombi akuti tulisimye mbuli maKristu. (Rom. 1:11, 12) Mazubaano, tuliikupona abantu batayandi bubotu. Twakabusiya buumi bwakutalemeka Leza azintu zili munyika. (Flp. 2:15, 16; Tit. 2:12-14) Nisimpe kuti taakwe kumwi nkutukonzya kujana kubotelwa kunze kwakuba aakati kabantu baJehova! (Int. 84:10) Alubo taakwe chintu chibotu chigwasya chiinda kwiiya akumvwisisisya Jwi lyaLeza! Atulange-lange miswaangano iisiyene-siyene yakabambilwa kuti itugwasye.

MUSWAANGANO WAKUMAMANINO AAMVIKI

⁵ Muswaangano wakumamanino aamviki uswaanizya nkani yaBbayibbele yakugwasya bantu kuswaanizya ababo basika kumiswaangano kakusaanguna. Muswaangano ooyu upa chakulya chigwasya mubukombi kubantu bapya mumbungano abamwi boonse bamumbungano.—Mil. 18:4; 19:9, 10.

⁶ Miswaangano iichitwa mumbungano zyabakombi baJehova, ileendelana amiswaangano yabantu boonse yakali kuchitwa aKristu Jesu ayakali kuchitwa abaapostolo bakwe kabalaamwi abaabo bakali kuliswaanizya ambabo. Jesu wakali muyiisi mupati kwiinda bantu boonse. Chimwi chiindi, kwakaambwa atala nguwe kuti: “Takunabede muntu waambaula bobuya.” (Joh. 7:46) Jesu wakali kwaambuula munzila ilaachindemezi alubo iigambya. (Mt. 7:28, 29) Bantu biingi bakagwasigwa anjiisyo zyakwe. (Mt. 13:16, 17) Baapostolo bakali kutobelezya chikozyano chakwe. Lugwalo lwa Milimo 2:14-36 lutubuzya atala ankani yakaambuulwa amwaapostolo Petro muPentekoste ya 33 C.E. Bantu biingi bakatola ntaamu akaambo kamakani ngibakamvwa. Alubo, chiindi bamwi nibakamvwa nkani yaPawulu njakaambuula kuAtene, bakaba basyomi.—Mil. 17:22-34

⁷ Nikuba mazubaano, bantu biingi balikugwasigwa ankani zyabantu boonse zichitwa mviki amviki mumbungano ankani zyaambuulwa kumiswaangano yamabazu ayabbooma. Nkani eezi zitugwasya kuti tuzibe njiisyo zyabuKristu akuti tulisimye mumulimu wesu waBwaami. Tulakonzya kugwasya bantu kuti bamvwisisisye njiisyo zyamuBbayibbele kuti twabatamba kuti basike kumiswaangano eeyi.

⁸ Nkani zyabantu boonse nga zili aamitwe iisiyene-siyene. Chimwi chiindi, zilakonzya kwaambuula atala anjiisyo zizwa muBbayibbele, bupulofita, malayilile aazwa muMagwalo, malayilile aagwasya mpuli abakwetene, makani aalatala azikataazya bachikula ambubeelede kupona maKristu. Zimwi nkani zyaambuula atala azintu zyakalengwa aaJehova zigambya. Zimwi zyaambuula atala azyiiyo nzitukonzya kujana kuzwa mubantu balembedwe muBbayibbele bakali aalusyomo, kutayoowa akusyomeka.

⁹ Tweelede kujula magwalo aambwa asikwaambuula akuswiilisisya chiindi naapandulula kuchitila kuti tugwasigwe ankani eezyo. (Lk. 8:18) Kuti twamvwisisisya zintu zyaambuulwa tuyoozisyoma akuzibelesya mubuumi bwesu.—1 Tes. 5:21

¹⁰ Mbungano ilakonzya kuba ankani yabantu boonse mviki amviki kuti basikwaambuula kabaliwo. Chimwi chiindi, sikwaambuula ulakonzya kuzwa kuliimwi mbungano. Pesi kuti mumbungano kakuli basikwaambuulwa bache, nkani eezi tazinoopegwi pe chimwi chiindi.

¹¹ Chipanzi chachibili kumuswaangano wakumamanino aamviki Nchiiyo chaNgaziyakulinda, muchiiyo eechi kuli kwaambuuzyania kwamibuzyo ansandulo. Jehova utupa chakulya chitugwasya mubukombi kabelesya chiiyo chaNgaziyakulinda.

¹² Zyiiyo zyiingi zyaambuula atala amalayilile aazwa muBbayibbele aakonzya kutugwasya mubuumi bwesu. Zigwasya maKristu kuti bakonzye kukaka “muuya waansi ano” akuti kabalijata kabotu. (1 Kor. 2:12) MuNgaziyakulinda, kupandululwa njiisyo zizwa muBbayibbele abupolofita zitugwasya kuti tube aluzibo lwakasimpe akuti katuli munzila yabululami. (Int. 97:11; Tus. 4:18) Kujanika kumuswaangano chiindi nikuchitwa Chiiyo chaNgaziyakulinda akutola lubazu kutugwasya kuti tusimye bulangilizi bwanyika mpya yaJehova ilaabululami. (Rom. 12:12; 2 Pet. 3:13) Miswaangano yesu yabuKristu itugwasya kuti tube amichelo yamuuya akuti tusimye chiyandisyo chesu chakubelekela Jehova. (Gal. 5:22, 23) Tulagwasigwa kuti tulisimye kumapenzi ‘akuliyobweda ntalisyo mbotu yachiindi chiza’ kuchitila kuti ‘tujatisisye buumi bwinibwini.’—1 Tim. 6:19; 1 Pet. 1:6, 7.

¹³ Kujana twatondeezya biyeni kulumba chipego eechi chitugwasya mubukombi? Kwiinda mukulibambila chiiyo katuli mpuli naa katuli aatulikke, akulanga-langa magwalo aalembedwe kuchitila kuti tukatole lubazu katubelesya majwi eesu kumiswaangano. Eezi ziyoopa kuti kasimpe kakkalilile mumyoyo yesu alubo ziyoogwasya bamwi chiindi twanoosandula. Ikuti twaswiilisisya chiindi bamwi nibasandula tuyoogwasigwa.

MUSWAANGANO WAAKATI KAMVIKI

¹⁴ Mviki amviki mbungano zilabungana kuNg’anda yaBwaami kuti zizoochite muswaangano waBuumi Bwesu bwachiKristu Amulimu Wesu. Muswaangano ooyu ulazipanzi zitatu ‘utuzulizizya’ kuti tube babelesi baLeza. (2 Kor. 3:5, 6) Pulogilamu yamuswaangano izwa muKabbuku Kamuswaangano Wabuumi Bwesu bwachiKristu Amulimu Wesu kazwa mweezi amweezi. Alubo kabbuku aaka, kali aazikozyano zyakwaambuuzyania nzitukonzya kubelesya mukukambawuka.

¹⁵ Chipanzi chakusaanguna chamuswaangano ooyu, chitegwa Lubono Luzwa muJwi lyaLeza, chitugwasya kuti tumvwisisisye mpuzyakatalikila zintu zilembedwe muBbayibbele akuti tubone zyiiyo zikonzya kutugwasya. Muswaangano ooyu ulaankani, kubalwa kwaBbayibbele akwaambuuzyania atala anzitwakabala muBbayibbele mumviki eeyo. Kabbuku Kamuswaangano Wabuumi Amulimu Wesu kali azifanikisyo amachaati zitugwasya kuti tumvwisisisye zyiiyo eezi. Kubala Bbayibbele akulimvwisisisya munzila iliboobu kulatugwasya mubuumi bwesu amunzila njituyiisyaayo kuchitila kuti ‘tulibambe, akuzulila kukumana milimo mibotu yoonse.’—2 Tim. 3:16, 17.

¹⁶ Chipanzi chabili chamuswaangano ooyu chitegwa, Lipede Kumulimu Wakukambawuka, chituyiisya mbutukonzya kuyiisya mumulimu wakukambawuka. Kuyungizya waawo, nga kweebelwa tuvidiyo twazikozyano zyakwaambuuzyania. Chipanzi eechi chamuswaangano chitugwasya kuti tube ‘alulimi lwabayiide’ kuchitila kuti ‘tuzibe kwaamba majwi aakugwasya bakateede.’—Is. 50:4.

¹⁷ Chipanzi chatatu chitegwa Buumi BwamaKristu, chitugwasya kubona mbutukonzya kubelesya malayilile aazwa muBbayibbele buzuba abuzuba. (Int. 119:105) Muchipanzi eechi, kuchitwa Chiiyo chaBbayibbele chaMbungano. Muchiiyo chaBbayibbele chaMbungano kuchitwa kwaambuuzyania kwamibuzyo ansandulo mbuli mbukuchitwa muChiiyo chaNgaziyakulinda.

¹⁸ Mweezi amweezi kuti Kabbuku Kamuswaangano Wabuumi Amulimu Wesu kasika, mulangizi wakabunga kabaalu naa umwi mwaalu ulakalanga-langa akuchita pulogilamu. Mviki amviki mwaalu uukonzya kuyiisya kabotu uusalwa akabunga kabaalu ulakonzya kuba sichuuno mumuswaangano ooyu. Mulimu wakwe ngwakubona kuti muswaangano ulasaanguna akumana achiindi cheelede akubalumba akubapa lulayo bali aazyakuchita aamuswaangano.

¹⁹ Kulibambila, kunjila akutola lubazu mumuswaangano waBuumi Amulimu Wesu, zitugwasya kuti twaazibe kabotu Magwalo, tumvwisisisye malayilile aali muBbayibbele, tukonzye kukambawuka makani mabotu katutayoowi akuti tukonzye kugwasya bantu kuti babe basikwiiya. Nikuba aabo batali Bakamboni balakonzya kugwasigwa akusungwaazyania kulikabotu achakulya chibasimya mubukombi. Tulakonzya kulibambila miswaangano katubelesya Watchtower Library, JW Library^®, Watchtower ONLINE LIBRARY^™ naakuti kubelesya layibbulali iili kuNg’anda yaBwaami. Layibbulali iili kuNg’anda yaBwaami ilaamabbuku miingi aapupululwa aBakamboni baJehova aaswaanizya Watch Tower Publications Index, Research Guide for Jehovah’s Witnesses, maBbayibbele asiyene-siyene, bbuku litegwa concordance, bbuku lyakupandulula amwi mabala aasiyene-siyene. Layibbulali eeyi ilakonzya kubelesegwa kufumbwa wayanda niyamana miswaangano naakuti kiitanasaanguna.

MUSWAANGANO WAMULIMU WAKUKAMBAWUKA

²⁰ Mukati kamviki akumamanino aayo tubunga twabasikupupulula bayanda kuya mumulimu wakukambawuka balabungana kuti bachite muswaangano wamulimu wakukambawuka. Miswaangano eeyi ichitilwa mumaanda aabakwesu naakuti kubusena bwakasalwa. Chimwi chiindi, ilakonzya kuchitilwa kuNg’anda yaBwaami. Kwiichitila aafwiifwi miswaangano eeyi kugwasya basikupupulula kuti kabateendi musinzo chiindi nibaya kubusena buchitilwa muswaangano akubusena nkubakambawukila. Basikupupulula balakonzya kupegwa muntu wakubelekaawe akusaanguna kubeleka chakufwambaana. Alubo kulamuubila mulangizi wakabunga kubalangania aabo bali mukabunga nkalangania. Nikuba kuti kulagwasya kuti tubunga twabasikupupulula tubungane mumasena aasiyene-siyene, pesi chimwi chiindi nga kwayandikana kuti tubunga katubelekelaamwi. Muchikozyano, ikuti aakati kamviki kakuzwa basikupupulula bache, tubunga tulakonzya kujatanisigwa akubunganina kuNg’anda yaBwaami naakuti kuli bumwi busena. Eezi ziyoopa kuti basikupupulula batabuli muntu wakuzwaawe mumulimu wakukambawuka. Nikuli mapobwe aakulyookezya, mbungano ilakonzya kusala kubunganina kuNg’anda yaBwaami. Chimwi chiindi, mbungano ilakonzya kuchita muswaangano wamulimu wakukambawuka nikwamana kuchitwa Chiiyo chaNgaziyakulinda.

²¹ Chiindi tubunga twabasikupupulula bayanda kuya mumulimu wakukambawuka nibabunganaamwi, mulangizi wakabunga nguwe weendelezya muswaangano wamulimu wakukambawuka. Chimwi chiindi, mulangizi wakabunga ulakonzya kukumbila uumugwasilizya naakuti umwi mukwesu weelela kuti achitisye muswaangano wamulimu wakukambawuka. Sikuchitisya muswaangano weelede kulibambila twaambo tukonzya kugwasya basikupupulula chiindi nibaya kukukambawuka. Naamana kupa baliwo muntu wakubeleka awe abusena bwakubelekela, umwi wamukabunga ulakomba. Bamaninsya balakonzya kwiinka. Muswaangano ooyu weelede kutola maminiti aali 5 naakuti 7 pesi weelede kufwiinsigwa kuti kuchitwa niyamana miswaangano yambungano. Sikuchitisya weelede kupa majwi aasungwaazya, malayilile aagwasya akubabuzya nzibeelede kuchita aabo bayanda kuya kukukambawuka. Aabo bachili bapya naakuti bamwi balakonzya kubelekaamwi abasikupupulula bali aluzibo kuchitila kuti babe aluzibo.

MABAMBE AAMUSWAANGANO MUMBUNGANO

ZIPYA AZINIINI

²² Mbungano zilikuvula nkaambo basikwiiya baliikuvula. Mulangizi wabbazu utumizya foomu lilaatala akubambwa kwambungano mpya. Nikuba boobo, tubunga tuniini tulakonzya kuliswaanizya ambungano mpati ilaafwiifwi.

²³ Muli zimwi mbungano kuli bachizi luzutu. Ikuti kakuli boobo, muchizi uukomba mumbungano naakuti uchitisya miswaangano yambungano, weelede kwaanga nduku kweendelana amalayilile aali muMagwalo. (1 Kor. 11:3-16) Weelede kuchitisya miswaangano kakkede kalangide kubantu. Kumiswaangano, bachizi tabapi nkani pe, pesi balakonzya kwaambuuzyania naakuti kuchita zitondeezyo kababelesya mabbuku apupululwa ambunga. Bawofesi yamutabi balakonzya kukumbila muchizi kuti kachitisya miswaangano akwaambuuzyania abamutabi. Mukuya kwachiindi, kuti kwazooba bakwesu beelela balakonzya kuzoochita milimu eeyi.

MISWAANGANO YABBAZU

²⁴ Munyaka amunyaka, mbungano zili mubbazu limwi zichita miswaangano yabbazu iibili, yabuzuba bumwi. Ziindi eezi zibotezya zipa kuti boonse baliwo bakonzye ‘kujula myoyo yabo’ kuti kube kusungwaazyania kwabuKristu. (2 Kor. 6:11-13) Mbunga yaJehova ibamba mitwe yamiswaangano iizwa muMagwalo azimwi zisiyene-siyene kweendelana aziyandikana kubantu. Kumiswaangano eeyi kuba nkani, zitondeezyo, zyakachitika chiindi, zitondeezyo zyabantu baambuula abalikke ambuzisisyo. Malayilile aaya agwasya bantu boonse banooli kumuswaangano. Basikwiiya balakonzya kubbabbatizigwa kumiswaangano eeyi, kabatondeezya kulipeda kwabo kuli Jehova.

MISWAANGANO YABBOOMA

²⁵ Munyaka amunyaka, kuchitwa miswaangano mipati. Miswaangano eeyi yabbooma iichitwa kwamazuba aatatu, iswaanizya mbungano zizwa mumabazu aasiyene-siyene. Munyika muli mbungano ziche, wofesi yamutabi ilakonzya kwaamba kuti mbungano zyoonse zichitilaamwi muswaangano. Muli zimwi nyika, mabambe amiswaangano eeyi alakonzya kusiyana amabambe azimwi nyika akaambo kamalayilile aazwa kukabunga keendelezya. Chiindi achiindi, kuchitwa mabambe amiswaangano yanyika zisiyene-siyene naakuti iiyandikana alubo Bakamboni biingi bazwa munyika zisiyene-siyene balayinjila miswaangano eeyi. Kwaminyaka myiingi, bantu biingi bakamvwa makani mabotu aaBwaami akaambo kamiswaangano mipati iichitwa aBakamboni baJehova.

²⁶ Miswaangano mipati ilabajatanisya babelesi baJehova mubukombi. Kasimpe kazwa muBbayibbele kalapandululwa kumiswaangano eeyi mipati. Chimwi chiindi kumiswaangano eeyi kugwisigwa mabbuku mapya aakubala naakuti aakubelesya kuchiiyo chaBbayibbele chambungano naakuti akubelesya mumulimu wakukambawuka. Alubo, bantu balabbabbatizigwa kumiswaangano eeyi. Miswaangano eeyi mipati ilatusimya mubukombi. Miswaangano eeyi iitondeezya kuti Bakamboni baJehova mbazyalwanyina bamunyika yoonse akuti maKristu batondeezya kuti mbaasikwiiya baJesu Kristu kwiinda mukutondezyania luyando.—Joh. 13:35.

²⁷ Tulasimisigwa mukuchita kuyanda kwaJehova chiindi nitunjila miswaangano yambungano amiswaangano mipati ichitwa abakombi baJehova. Alubo, ilatukwabilila kulweeno luli munyika lukonzya kunyongania lusyomo lwesu. Miswaangano eeyi ipa kuti Jehova alemekwe akuti atembawulwe. (Int. 35:18; Tus. 14:28) Tweelede kumulumba Jehova nkaambo ubambila bakombi bakwe miswaangano eeyi igwasya mubukombi mumazubaano akumamanino.

CHILALILO CHAMWAAMI

²⁸ Kamwi amunyaka, Bakamboni baJehova munyika yoonse bachita Chiyubulusyo Chakufwa KwaJesu naakuti Chilalilo chaMwaami mubuzuba bweendelana abuzuba Jesu Kristu mbwakafwa. (1 Kor. 11:20, 23, 24) Muswaangano ooyu uyandikana loko kubakombi baJehova. Twakalayililwa kuti katuyeeya lufu lwaJesu.—Lk. 22:19.

²⁹ Buzuba bwaChiyubulusyo bweendelana abuzuba bwakali kuchitwa Pasika bulembedwe muBbayibbele. (Kul. 12:2, 6; Mt. 26:17, 20, 26) Pasika bwakali buzuba aawo maIsrayeli nibakali kuyeeya Kwaangununwa kwabo kuEgepita mumunyaka wa1513 B.C.E., alubo yakali kuchitwa kamwi amunyaka. Muchiindi eecho, Jehova wakasala buzuba bwachi 14 bwamweezi wakusaanguna kuti bube buzuba bwakulya kabelele kaPasika abuzuba bwakuzwa mubuzike kuEgepita. (Kul. 12:1-51) Buzuba oobo bujanika kwiinda mukubala mazuba aali 13 kuzwa nwakkala mweezi kuJerusalemu. Chiyubulusyo chichitwa mubuzuba bwakusaanguna chiindi mweezi nulibonia woonse.

³⁰ Mulugwalo lwa Matayo 26:26-28, Jesu wakaamba mbucheelede kuchitwa Chiyubulusyo. Tachili chiyanza chilatunsiya-nsiya tutamvwisisiki, pesi nchilalilo chachikozyano chilyigwa ababo bayooyendelezya aJesu Kristu muBwaami bwakwe bwakujulu. (Lk. 22:28-30) Pesi, maKristu boonse kuswaanizya abantu balaachiyandisyo chakwiiya Bbayibbele balakonzya kubawo chiindi nikuchitwa Chilalilo chaMwaami. Kujanika kuChiyubulusyo, kutondeezya kuti tulachilumba chipo Jehova Leza nchaakapa bantu boonse kabelesya Mwanaakwe Jesu Kristu. Kachitanachitwa Chiyubulusyo, kupegwa nkani yabantu boonse yakabambilwa kugwasya bantu kuti babikkile maanu kuChiyubulusyo akuti babe achiyandisyo chakwiiya Bbayibbele.

³¹ Kunjila miswaangano nchintu chiyandikana kuBakamboni baJehova nkaambo kutupa chiindi ‘chakuyeeyana, chakubusyanya-busyanya mukuyandana akuchita milimu mibotu.’ (Heb. 10:24) Muzike uusyomekede alubo uuchenjede utubambila miswaangano eeyi kuchitila kuti tugwasigwe mubukombi. Bakombi baJehova boonse kuswaanizya abantu balaachiyandisyo basungwaazigwa kuti kabanjila miswaangano eeyi. Bakombi baLeza balijisini nkaambo batondeezya kuti balazilumba zintu nzyabapede Jehova kabelesya mbunga yakwe. Eezi zipa kuti tulemeke Jehova akumutembawula.—Int. 111:1.