Babelesi Bakambawuka Makani Mabotu

JEHOVA wakatupa chikozyano chimaninide nchitweelede kutobelezya, Mwanaakwe Jesu Kristu. (1 Pet. 2:21) Ikuti muntu waba mutobeli waJesu, weelede kukambawuka makani mabotu kali mubelesi waLeza. Katondeezya mbuzyakali kubayoogwasya mubukombi, Jesu wakaamba kuti: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa.” (Mt. 11:28, 29) Nisimpe kuti chisyomezyo chakwe chilikuzuzikizigwa kubantu bazumina kutamba kwakwe.

² Mbukunga Jesu Mubelesi Mupati waLeza, wakatamba bamwi bantu kuti babe batobeli bakwe. (Mt. 9:9; Joh. 1:43) Wakabayiisya mbubakeelede kukambawuka alubo wakabatuma kuti bachite mulimu wakukambawuka ngwakali kuchita. (Mt. 10:1–11:1; 20:28; Lk. 4:43) Mukuya kwachiindi, wakatuma bamwi bali 70 kuti bakakambawuke makani mabotu ali atala aBwaami bwaLeza. (Lk. 10:1, 8-11) Chiindi Jesu naakatuma basikwiiya bakwe, wakababuzya kuti: “Kufwumbwa uumuswiilila nywebo ulandiswiilila andime. Alimwi kufwumbwa uutamulemeki nywebo tandilemeki andime. Kuyungizya waawo, kufwumbwa uutandilemeki mebo tamulemeki awalo ooyo wakandituma.” (Lk. 10:16) Majwi aaya akatondeezya kuti mulimu Jesu ngwakapa basikwiiya bakwe ulayandikana. Bakali kwiiminina Jesu aLeza Mupatikampatila! Kulikozyenie amazubaano kubantu boonse bazumina kutamba kwaJesu kwakuti: “Uboole ube sikunditobela.” (Lk. 18:22; 2 Kor. 2:17) Boonse bazumina beelede kuchita mulimu waLeza wakukambawuka makani mabotu alaatala aBwaami awakuyiisya bantu kuti babe basikwiiya.—Mt. 24:14; 28:19, 20.

³ Kuzumina kutamba kwaJesu kwapa kuti tujane chilongezyo ‘chakuziba’ Jehova aJesu Kristu. (Joh. 17:3) Tulikuyiisigwa nzila zyaJehova. Alubo, Jehova ulokutugwasya kuti tuchinche miyeeyo, tusame buntu bupya akuti tupone kweendelana amilawu yakwe iiluleme. (Rom. 12:1, 2; Ef. 4:22-24; Kol. 3:9, 10) Kuyanda kulumba Jehova kwapa kuti tulipede kuli nguwe akuti tutondeezye kulipeda ooku kwiinda mukubbabbatizigwa mumaanzi. Chiindi nitubbabbatizigwa, tusala kuba bakombi baLeza.

⁴ Mutalubi kuti tweelede kubelekela Jehova amaboko aasalala amyoyo iituba. (Int. 24:3, 4; Is. 52:11; 2 Kor. 6:14–7:1) Twakaba aamoyo uusalala akaambo kakusyoma muli Jesu Kristu. (Heb. 10:19-23, 35, 36; Ciy. 7: 9, 10, 14) Mwaapostolo Pawulu wakasungwaazya maKristu kuti kuzintu zyoonse nzibachita kabalemeka Leza kuchitila kuti zitabi zilebyo kuli bamwi. Alubo, mwaapostolo Petro wakatondeezya mbukuyandikana kulijata kabotu kuchitila kuti tugwasye batakombi kuti bazibe kasimpe. (1 Kor. 10:31, 33; 1 Pet. 3:1) Kujana twachita biyeni kuti tugwasye bamwi kuti babe bakambawusi bamakani mabotu?

BASIKUPUPULULA BAPYA

⁵ Chiindi nutalika kwiiya amuntu Bbayibbele, musungwaazye kuti kabuzya bamwi zintu nzyayiya. Ulakonzya kubuzya nzubo zyakwe, beenzinyina, mbabelekaabo naakuti bamwi mbaswaana. Kuchita oobo kugwasya basikupupulula bapya kuti babe batobeli baJesu Kristu abakambawusi bamakani mabotu. (Mt. 9:9; Lk. 6:40) Mbuli mbayabusima mubukombi akuzibila kubuzya bamwi nzyayiya, muntu ulaachiyandisyo uyooyanda kuzwa andiswe mumulimu wakukambawuka.

ZYEELELO ZYAKUBA SIKUPUPULULA UTANABBABBATIZIGWA

⁶ Tweelede kubona kuti muntu uyanda kutalika kukambawuka kunga’anda ang’anda ulazizuzikizya na zyeelelo zyeelede. Nkaambo muntu ngutwiinkaawe kukukambawuka ulitondeezya kuti nguKamboni waJehova. Nkinkaako, weelede kuba muntu uupona kweendelana amilawu yaJehova iiluleme kuchitila kuti abe sikupupulula utanabbabbatizigwa.

⁷ Chiindi nuyiya amuntu akwaambuuzyania anguwe atala amalayilile aamuBbayibbele ulakonzya kuziba mbabede. Ulakonzya kubona kuti ulikupona kweendelana anzyayiya. Pesi kuli zimwi zintu zili atala abuumi bwasikwiiya baalu nzibayooyanda kwaambuuzyania anguwe kalaamwi amuntu umuyiisya.

⁸ Mulangizi wakabunga kabaalu uyoochita mabambe aakuti baalu babili, (umwi mwaalu weelede kuti kali wakkomiti yamulimu) bazoowambuuzyanie anduwe amuntu nguyiyaawe atala amakani aaya. Mumbungano muli baalu bache, mwaalu amubelesi uubelekela weelela balakonzya kuchita mabambe aaya. Bakwesu basalwa kuti baambuuzyanie asikupupulula amuntu ngwayiyaawe, beelede kuzichita chakufwambaana. Chimwi chiindi, kuti baziba makani aaya chiindi chamiswaangano, balakonzya kwaambuuzyania anduwe kulaamwi amuntu nguyiyaawe niyamana miswaangano. Mweelede kwaambuula kamwaangunukide. Pesi muntu uyiya Bbayibbele katanaba sikupupulula utanabbabbatizigwa, weelede kupona kweendelana amalayilile aatobela:

1. (1) Usyoma kuti Bbayibbele ndiJwi lyaLeza lyakazulwidwa.—2 Tim. 3:16.

2. (2) Usyoma njiisyo zizwa muMagwalo, nikuba kuti wabuzigwa mubuzyo ulakonzya kusandula kweendelana azili muBbayibbele kutali kubelesya njiisyo zyabukombi bwakubeja naakuti kwaamba nzyayeeya.—Mt. 7:21-23; 2 Tim. 2:15.

3. (3) Utobelezya malayilile aazwa muBbayibbele akuliswaanizya abakombi baJehova kumiswaangano yambungano kuti kakonzya.—Int. 122:1; Heb. 10:24, 25.

4. (4) Ulizi nzilyaamba Bbayibbele atala akoonana kwabantu batakwetene, bumambi, kwaalika akoonana kwabaalumi abaaluminyina naakuti kwabanakazi abanakazinyina alubo upona kweendelana anziliyiisya Bbayibbele atala amakani aaya. Ikuti kakkede amuntu wachaalumi naakuti wachanakazi utali nzubo yakwe, beelede kukwatana zili mumulawu.—Mt. 19:9; 1 Kor. 6:9, 10; 1 Tim. 3:2, 12; Heb. 13:4.

5. (5) Uswiilila nchenjezyo ijanika muBbayibbele yakutakolwa akutabelesya misamu ikola yakulikondelezya.—2 Kor. 7:1; Ef. 5:18; 1 Pet. 4:3, 4.

6. (6) Ubona mbukugwasya kutantamuka kuliswaanizya abantu batali kabotu.—1 Kor. 15:33.

7. (7) Weelede kuti wakaleka kuliswaanizya achikombelo chakubeja nchaakali kuchinjila alubo tachiyinki kumiswaangano njibachita naakuti kuchita imwi milimu njibachita.—2 Kor. 6:14-18; Ciy. 18:4.

8. (8) Tatoli lubazu mutwaambo twapolitikisi.—Joh. 6:15; 15:19; Jak. 1:27.

9. (9) Upona kweendelana alugwalo lwa Isaya 2:4, lupandulula mbutweelede kubabona bantu bamisyobo isiyene-siyene.

10. (10) Uyanda kuba Kamboni waJehova.—Int. 110:3.

⁹ Ikuti baalu kabatazi kabotu kuti muntu uyiya Bbayibbele waabona biyeni makani aaya, balakonzya kwaambuuzyania anguwe kababelesya magwalo aali ajulu. Alubo, weelede kumvwisisisya kuti muntu uyanda kubelekaamwi aBakamboni baJehova mumulimu wakukambawuka weelede kupona kweendelana amalayilile ali muMagwalo aaya. Kusandula kwakwe kuyoogwasya baalu kubona kuti ulizizi na nzyayelede kuchita akuti uleelela na kuti atalisye kukambawuka.

¹⁰ Baalu beelede kuzibisya muntu uyiya Bbayibbele kuti uleelela na, naakuti pe. Chiindi chiingi balakonzya kumubuzya nibamana kwaambuuzyania anguwe. Kuti keelela baalu balakonzya kumubuzya kuti waba sikupupulula. (Rom. 15:7) Beelede kumusungwaazya kuti atalike kukambawuka akuti alembe lipoti yamulimu mweezi niwamana. Chiindi muntu uyiya Bbayibbele nazumizigwa kuba sikupupulula uutanabbabbatizigwa, baalu balakonzya kumupandulwida kuti nayoolemba lipoti yakusaanguna yamulimu wakukambawuka bayoomubambila Kkadi lyaMbungano lyaSikupupulula lilembedwe zina lyakwe alubo liyoobambwa mufayili lyambungano. Baalu babelesya malekkodi ngibajana aakkadi lyasikupupulula ooyo kuti babone mbubakonzya kulangania milimu yabukombi yaBakamboni baJehova bali munyika yoonse, eezi zipa kuti sikupupulula ooyo atole lubazu mukuchita milimu yabukombi. Baalu balakonzya kubuzya basikupupulula bapya kuti zintu zilembedwe mumalekkodi aabo zilabonwa abaalu bali munyika yoonse nkaambo nga zijanika aajw.org.

¹¹ Kumuziba kabotu sikupupulula mupya akulumba zintu nzyachita kulakonzya kumugwasya. Kulakonzya kumugwasya kuti apeekezye kuchita zyiingi mukubelekela Jehova akuti kalemba lipoti yamulimu chiindi choonse.—Flp. 2:4; Heb. 13:2.

¹² Kuti baalu babona kuti muntu uyiya Bbayibbele uleelela kuti kakambawuka, bayoomupa bbuku liti Bajisini Mukuchita Kuyanda kwaJehova. Nalemba lipoti yamulimu kwachiindi chakusaanguna baalu balakonzya kuzibisya mbungano kuti waba sikupupulula uutanabbabbatizigwa.

KUGWASYA BANA BANIINI

¹³ Bana baniini balakonzya kweelela kuba basikupupulula bamakani mabotu. Jesu wakabatambula bana baniini alubo wakabalongezya. (Mt. 19:13-15; 21:15, 16) Nikuba kuti bazyali mbabo balamulimu wakuyiisya bana babo, pesi bamwi mumbungano balakonzya kugwasya bana baniini balachiyandisyo chakukambawuka makani mabotu aaBwaami. Kuti kuli muzyali, kusungwaala kwako mumulimu wakukambawuka kuyoobikkila bana bako chikozyano chili kabotu chakuti kabasungwete mumulimu waLeza. Kujana wamugwasya biyeni mwana ulijata kabotu uyanda kubuzya bamwi atala anzyasyoma?

¹⁴ Muzyali weelede kubuzya mwaalu uli Mukkomiti Yamulimu Yambungano, kuti bazoowambuuzyanie akubona kuti mwanaakwe uleelela na kuba sikupupulula uutanabbabbatizigwa. Mulangizi wakabunga kabaalu uyoochita mabambe aakuti baalu babili, (umwi mwaalu weelede kuti kali wakkomiti yamulimu) bazoowambuuzyanie amwana kalaamwi amuzyali uukomba naakuti muntu ngwakkalaawe. Ikuti mwana katondeezya kuti ulaluzibo atala aBbayibbele alimwi kalachiyandisyo chakukambawuka, eezi zitondeezya kuti ulikuchita kabotu mumakani aabukombi. Nibamana kwaambuuzyania aanguwe atala makani aaya aamwi abeleka kubantu bapati, baalu babili balakonzya kubona kuti uleelela na kuba sikupupulula uutanabbabbatizigwa. (Lk. 6:45; Rom. 10:10) Chiindi nibaambuula amwana muniini, baalu tabeelede kwaambuula makani ngibabuzya bantu bapati ikuti kababona kuti tabeleki kumwana muniini.

¹⁵ Baalu beelede kumulumbayizya mwana akaambo kamilimu njachita alubo bamusungwaazye kuti apeekezye kubbabbatizigwa. Bazyali ambabo beelede kulumbayizigwa akaambo kamulimu ngubachita wakumuyiisya kasimpe mwanaabo. Baalu balakozya kugwasya muzyali kuti ayinkilile kunembo kagwasya mwanaakwe kwiinda mukumusungwaazya kuti abale chiti, “Mulumbe Kubazyali BachiKristu,” chili aapeji 179-181.

KULIPEDA AKUBBABBATIZIGWA

¹⁶ Nikuba kuti waba aluzibo atala aJehova, ulamuyanda, ulayiswiilila milawu yakwe akuchita mulimu wakukambawuka, pesi weelede kusimya bweenzinyokwe anguwe. Kujana wazichita biyeni eezi? Kwiinda mukulipeda kuli nguwe akubbabbatizigwa mumaanzi.—Mt. 28:19, 20.

¹⁷ Kulipeda kutondeezya kuti uyanda kuchita mulimu waLeza. Kulipeda nkuchita chikonke kuli Leza kwiinda munkombyo, kumusyomezya kuti uyoomubelekela mubuumi bwako boonse akweenda munzila zyakwe. Alubo zyaamba kuti uyookomba nguwe luzutu kukabe kutamani. (Dt. 5:9) Eeyi ninkani iilangene amuntu umwi awumwi. Taakwe uukonzya kukuchitila.

¹⁸ Pesi tazimanini mukubuzya Jehova luzutu kuti uyanda kumubelekela. Weelede kutondeezya bamwi kuti walipeda kuli Jehova. Uchita oobo kwiinda mukubbabbatizigwa mumaanzi mbuli mbaakachita Jesu. (1 Pet. 2:21; 3:21) Niinzi nchukonzya kuchita kuti walipeda kubelekela Jehova alubo kuyanda kubbabbatizigwa? Ulakonzya kuzibisya mulangizi wakabunga kabaalu. Uyoochita mabambe aakuti baalu baambuuzyanie anduwe kuchitila kuti babone kuti uleelela na kubbabbatizigwa. Ikuti ujane makani miingi ulakonzya kulanga-langa chiiyo chiti “Mulumbe Kuli Sikupupulula Uutanabbabbatizigwa,” chili apeji 182-184 achiti “Mibuzyo Ibambilidwe Bayanda Kubbabbatizigwa,” chili apeji 185-207 mubbuku eeli.

KULEMBA LIPOTI ILAATALA AKUZWIDILILA KWAMULIMU WAKUKAMBAWUKA

¹⁹ Kuzwa chiindi, bakombi baJehova balasungwaazigwa amalipoti atondeezya kuti bukombi bwakasimpe bulikuzwidilila. Kuzwa chiindi Jesu naakabuzya basikwiiya bakwe kuti makani mabotu ayelede kukambawukwa munyika yoonse, maKristu bakasimpe bakaba aachiyandisyo chakubona kuti majwi aJesu akali kuyoozuzikizigwa biyeni.—Mt. 28:19, 20; Mk. 13:10; Mil. 1:8.

²⁰ Batobeli baJesu bakusaanguna bakali kubotelwa kumvwa makani ali atala akuzwidilila kwamulimu wakukambawuka. (Mk. 6:30) Bbuku lya Milimo litubuzya kuti mupobwe lyaPentekoste 33 C.E., basikwiiya nibakabungene, bantu basika ku120 bakatambula muuya uusalala. Chakufwambaana basikwiiya bakavula kusika ku3 000 alubo mukuya kwachiindi basika ku5 000. Mukuya kwachiindi bakabona kuti ‘Jehova wakazumanana kubayungizyila baabo ibakali kufwutulwa abapayizi biingi bakasyoma.’ (Mil. 1:15; 2:5-11, 41, 47; 4:4; 6:7) Kweelede kuti makani aaya alaatala akuvula kwabo akabasungwaazya loko basikwiiya! Nisimpe kuti makani aaya abotezya akabasungwaazya kuti bayinkilile kunembo kabachita mulimu waLeza nikuba kuti bakali kupenzegwa abeendelezi bachikombelo chamaJuda.

²¹ Mumunyaka wa60 kusika ku61 C.E., Pawulu wakalembela mbungano yakuKkolose kuti makani mabotu akali ‘kuzyala michelo akuya buvula koonse koonse akuti akali kukambawukilwa bantu boonse bakkala ansi.’ (Kol. 1:5, 6, 23) MaKristu bakusaanguna bakali kuswiilila Jwi lyaLeza alubo muuya uusalala wakabagwasya kuti bakambawuke makani mabotu munzila iigambya loko, muunzi waJerusalemu kuutananyonyoonwa mu70 C.E. Kweelede kuti maKristu aaba bakasungwaazigwa akumvwa malipoti aali atala akuzwidilila kwamulimu wabo.

²² Mbukubede amazubaano, mbunga yaJehova ilabamba malekkodi aamulimu uuchitwa uulikuzuzikizya lugwalo lwa Matayo 24:14 lwaamba kuti: “Alimwi makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.” Mbutuli bakombi baLeza balipedelede, tuli amulimu uuyandikana loko ngutweelede kuchita. Tweelede kuchita zyoonse nzitukonzya mumulimu wakukambawuka mamanino kaatanasika. Jehova uyoobona kuti mulimu ooyu wamana kuchitwa alubo uyootutambula kuti twawubeleka changuzu.—Ezk. 3:18-21.

LIPOTI YAKO YAMULIMU WAKUKAMBAWUKA

²³ Niinzi nzitweelede kulemba mulipoti? Kapepa Kalipoti Yamulimu Wakukambawuka nkitupegwa ambunga katondeezya zintu nzitweelede kulemba mulipoti. Nikuba boobo, makani aatobela alakonzya kukugwasya kuziba zintu nzweelede kulemba.

²⁴ Aalembedwe kuti “Nzwaakapa Bantu (Mabbuku Akadindwa Naakuti Ngwaakatumizya Afooni),” ulakonzya kulemba namba yamabbuku akadindwa naakuti ngwaakatumizya afooni ngwaakapa bantu batali Bakamboni. Aalembedwe kuti “Mavidiyo Ngwaakatondeezya,” ulakonzya kulemba namba yamavidiyo ngwaakatondeezya bantu mukukambawuka.

²⁵ Aalembedwe kuti “Kubweeda,” ulakonzya kulemba namba yakubweedulula nkwaakachita kubantu batali Bakamboni bakatondeezya chiyandisyo. Kubweeda kulakonzya kuchitwa munzila zisiyene-siyene kutali kwiinda mukuswaya muntu luzutu. Kulakozya kuchitwa kwiinda mukumuswaya, mukulemba lugwalo, kufoona, kulemba kagwalo mufooni, mukkompiyuta naakuti kwiinda mukusiila muntu magazini. Alubo kufumbwa chiindi nuyiya amuntu Bbayibbele, weelede kulemba kubweedulula. Muzyali ulakonzya kulemba kuti wabweedela chiindi nalikuchitisya chiiyo chakukomba kwampuli kakuli mwana uutanabbabbatizigwa.

²⁶ Nikuba kuti ziindi zyiingi chiiyo chaBbayibbele chichitwa mviki amviki, pesi kulembwa kuti nchiiyo nwaamana mweezi. Basikupupulula balakonzya kulemba namba yazyiiyo zyaBbayibbele nzibakachita mumweezi. Pesi zyiiyo zyaBbayibbele zilembwa, beelede kuba bantu mbuyiyaabo batali Bakamboni. Nikuba boobo, ikuti kkomiti yamulimu yakukumbila kuti uyiye amukwesu naakuti muchizi uutachichiti kabotu mubukombi, ulakonzya kulemba kubweedulula. Alubo, ulakonzya kulemba kubweedulula kuti kwiiya asikupupulula mupya utanamaninsya kwiiya bbuku litegwa Mbukonzya Kubotelwa Mubuumi Kukabe Kutamani!

²⁷ Weelede kulemba “Ma-awa” achoonzyo mulipoti yako. Eechi nchiindi nchubeleka kukambawuka kung’anda ang’anda, kuchita kubweedulula, kuswaya zyiiyo zyaBbayibbele, kukambawuka kulibambilide naakuti kutalibambilide kubantu batali Bakamboni. Ikuti basikupupulula babili beendaamwi, boonse beelede kubala ma-awa pesi umwi awumwi weelede kulemba zyiiyo zyakwe akubweedulula nkwaachita. Bazyali bayiisya bana babo chiindi nibachitisya Kukomba Kwampuli kuchitwa mviki amviki, balakonzya kulemba awa yachiindi eecho. Bakwesu bapa nkani yabantu boonse kumiswaangano balakonzya kuchilemba chiindi eecho. Mukwesu utolekela nkani yabantu boonse alakwe ulakonzya kuchilemba chiindi eecho. Pesi, kuli milimu myiingi iyandikana njituchita njitutalembi chiindi, ili mbuli kulibambila kuya kukambawuka, kunjila muswaangano wamulimu wakukambawuka akweendela zimwi zintu ziteendelani akukambawuka chiindi nituli mumulimu ooyu.

²⁸ Sikupupulula umwi awumwi weelede kubelesya moyo wakwe uuyiisidwe kabotu chiindi nalemba ma-awa mulipoti. Bamwi basikupupulula bakambawukila kumasena kuli bantu biingi alubo bamwi babelekela kubusena kuli bantu bache kabeenda misinzo. Eezi zipa kuti nzila basikupupulula njibalembaayo malipoti isiyane. Kabunga Keendelezya takabikkilide mbungano zili munyika yoonse milawu iili atala mbubelede kubala chiindi nchibeelede kulemba mulipoti yamulimu nikuba kusala muntu ulanga-langa kuti bantu baalemba biyeni malipoti.—Mt. 6:1; 7:1; 1 Tim. 1:5.

²⁹ Chiindi nchimubeleka mumulimu wakukambawuka cheelede kulembwa muma-awa luzutu. Pesi, kwakachitwa mabambe abasikupupulula batakonzyi kuchita zyiingi akaambo kakuchembaala, kuchiswa, kulemana naakuti bakkala kubusena bubambilwa bantu bachiswa. Sikupupulula uli mubukkale buli boobu, ulakonzya kulemba maminiti ali 15 achiindi nchakambawuka mulipoti yakwe. Nikuba kuti mumweezi wakambawuka kwamaminiti ali 15, weelede kwaalemba maminiti aayo. Unowambwa kuti ngusikupupulula waBwaami ukambawuka chiindi choonse. Mabambe aaya alakonzya kugwasya nikuba basikupululula baba achiindi chilamfu kabatakonzyi kweenda akaambo kakuti balikuchiswa naakuti bakalichisa. Bubambe oobo bwakachitilwa aabo batakonzyi kuchita zyiingi luzutu. Bakkomiti yamulimu bayoolanga-langa sikupupulula akubona kuti uleelela na kuti kakambawuka kweendelana amabambe aaya.

KKADI LYAMBUNGANO LYASIKUPUPULULA

³⁰ Lipoti yamulimu wakukambawuka njulemba mweezi amweezi ilalembwa muKkadi lyaMbungano lyaSikupupulula. Tee nduwe pe ubamba kkadi eeli. Ikuti wayanda kulongela kuli imwi mbungano, weelede kuzibisya baalu bamumbungano mubede. Mulembi wambungano nkuwalongela uyookumbila kutumizigwa Kkadi lyaMbungano lyaSikupupulula. Mulembi wambungano mubede ulakonzya kutumizya kkadi lyako nkuwalongela. Eezi ziyoogwasya baalu kuti bakutambule kabotu akuti kabakugwasya muzintu zyabukombi. Ikuti waya kuli bumwi busena mpawo waakukkala kwamyeezi iitasiki kumyeezi itatu, weelede kunotumizya lipoti yako kumbungano nkuzwa.

NKAMBOONZI NITWEELEDE KULEMBA LIPOTI YAMULIMU WAKUKAMBAWUKA?

³¹ Ulaluba na zimwi ziindi kutola lipoti yamulimu? Chimwi chiindi toonse tuyanda kuyeezegwa. Pesi kuti twamvwisisisya mbokuyandikana kulemba lipoti, ziyootugwasya kuti katufwambaana kulemba lipoti yamulimu.

³² Bamwi balakonzya kulibuzya kuti: “Mbukunga Jehova ulizizi nzindichita mumulimu wakwe, nkamboonzi nindeelede kulemba lipoti yamulimu?” Nisimpe kuti Jehova ulizizi nzituchita alubo ulizi kuti nzituchita tuzichita amoyo woonse naakuti tuchita akaambo kakuti tatukwe milimu myiingi. Nikuba boobo, weelede kuyeeya kuti Jehova wakalemba mazuba Nowa ngakatola kali mubwaato alubo wakalemba minyaka maIsrayeli njibakeenda munkanda. Leza wakalemba namba yabantu bakasyomeka kulinguwe abaabo bakatasyomeka. Alubo wakalemba atala akuzundwa kwanyika yaKkenani ambobakeendelezya babetesi bachiIsrayeli bakali kusyomeka. Nisimpe kuti wakalemba makani miingi ali atala amilimu yakachitwa ababelesi bakwe. Wakapa kuti zintu zyakali kuchitika zilembwe muBbayibbele kuchitila kuti tuzibe mbakubona kulemba malipoti akasimpe.

³³ Makani azintu zyakachitika chiindi aalembedwe muBbayibbele atondeezya mbali achoonzyo malipoti akali kubambwa aabakombi baJehova. Chiindi chiingi, kwakali kuyandikana kuti kulembwe namba kuchitila kuti amwi makani ali muBbayibbele amvwisisike. Langa zikozyano zitobela: Matalikilo 46:27; Kulonga 12:37; Babetesi 7:7; 2 Bami 19:35; 2 Makani 14:9-13; Johane 6:10; 21:11; Milimo 2:41; 19:19.

³⁴ Nikuba kuti tatulembi zyoonse nzituchita mukubelekela Jehova, pesi kulemba lipoti kuyandikana loko mumbunga yesu. Mumwaanda wamunyaka wakusaanguna, chiindi baapostolo baJesu nibakazwa kukukambawuka, “bakamwaambila zintu zyoonse nzibakacita anzibakayiisya.” (Mk. 6:30) Chimwi chiindi malipoti eesu alakonzya kutondeezya lumwi lubazu luyanda kubikkilwa maanu mumulimu wesu. Malipoti alakonzya kututondeezya kuti nikuba katuchita kabotu muli zimwi mbazu, pesi kulakonzya kuba zimwi mbazu mumulimu wesu ziyanda kubambululwa mbuli kusungwaazya bamumbungano kuti babeleke changuzu kuchitila kuti basikupupulula bavule. Ikuti kakuli boobo, nga kwayandikana kuti mbungano igwasigwe kuchitila kuti kubambululwe penzi eelyo. Balangizi beelela bayoobikkila maanu kumalipoti akuyanda kugwasya abo batachiti kabotu naa kugwasya mbungano yoonse.

³⁵ Alubo malipoti alakonzya kugwasya mbunga kubona masena aayanda basikugwasilizya mumulimu wakukambawuka. Alubo mbunga ilakonzya kubona masena alikuzwidilila, aatali kuchita kabotu amabbuku aakonzya kubelesegwa kukuyiisya bantu kasimpe. Malipoti agwasya mbunga kuti ikonzye kwiinkililla kunembo kupupulula mabbuku aabelesegwa mumulimu wakukambawuka mumasena aasiyene siyene.

³⁶ Nisimpe kuti toonse kulatusungwaazya kumvwa malipoti. Tazitusungwaazyi na kumvwa mbubabeleka bakwesu abachizi mumulimu wakukambawuka munyika yoonse? Alubo kumvwa makani ali atala akuvula kwabantu kutugwasya kubona mboyilikuzwidilila mbunga yaJehova. Alubo zyakuluula nzitumvwa zitugwasya kuti tube basungu mumulimu wakukambawuka. (Mil. 15:3) Nkinkaako, kulemba lipoti kulayandikana alubo kutondeezya kuti tulababikkila maanu bakwesu abachizi bali munyika yoonse. Nikuba kuti malayilile aaya alakonzya kubonekaanga nchintu chiniini, pesi kwaswiilila kutondeezya kuti tulaalemeka mabambe aambunga yaJehova.—Lk. 16:10; Heb. 13:17.

NZUKONZYA KUPEEKEZYA

³⁷ Tatweelede kweezyanisya mbutubeleka ambubabeleka bamwi mumulimu wakukambawuka. (Gal. 5:26; 6:4) Nkaambo bukkale bwabantu bulasiyana. Nikuba boobo, tulakozya kubona mbotuzwidilila mumulimu wakukambawuka kwiinda mukupeekezya kuchita zyiingi. Kuzuzikizya zipeekezyo eezi kuyoopa kuti tukkutisikane anzituchita.

³⁸ Zilaantanganana kuti Jehova ulikupa kuti mulimu wakubungania bantu bayoofutuka “kumapenzi ayo mapati” uchitwe chakufwambaana. Mazubaano bupolofita bwaIsaya bulikuzuzikizigwa bwaamba kuti: “Muniini uyooba cuulu awalo musyoonto uyooba cisi cilaanguzu. Mebo lwangu, nde Jehova, ndiyoopa kuti eeci cifwambaane kucitika muciindi cancico ceelede.” (Ciy. 7:9, 14; Is. 60:22) Nchilongezyo kaka kuba bakambawusi bamakani mabotu kuchiindi eechi chamamanino!—Mt. 24:14.