Nzila Zyakuyungizya Mulimu Wakukambawuka

CHIINDI Jesu naakatuma basikwiiya bakwe kuti bakakambawuke atala aBwaami, wakababuzya kuti: “Mulimo wakutebula mupati, pele babelesi mbasyoonto.” Akaambo kakuti kwakali mulimu mupati wakeelede kuchitwa, wakayungizya kuti: “Aboobo, amulombe Simalelo wabutebuzi kuti atume babelesi mumulimo wakwe wakutebula.” (Mt. 9:37, 38) Jesu wakabuzya basikwiiya mbubakeelede kuchita mulimu wakukambawuka. Majwi aakwe akatondeezya kuti bakeelede kufwambaana chiindi nibakali kuchita mulimu ooyu. Nkaambo wakati: “Tamukamanizyi kuzinguluka minzi ya Israyeli katanasika Mwanaamuntu.”—Mt. 10:23.

² Mazubaano, nzyiingi zyeelede kuchitwa mumulimu wakukambawuka makani mabotu aaBwaami. Makani aaya ayelede kukambawukwa mamanino kaatanasika nkaambo chiindi chamana. (Mk. 13:10) Akaambo kakuti tukambawuka munyika, bukkale bwesu bulikozyenie abwamuchiindi chaJesu abasikwiiya bakwe pesi iswe tukambawuka munyika yoonse. Kuti twalyeezyanisya abantu bali munyika, tuli bache loko, pesi tuli achoonzyo chakuti Jehova uyootugwasya. Makani mabotu aaBwaami azookambawukwa munyika yoonse alubo mamanino azoosika kuchiindi chaJehova cheelede. Tuyoobikka Bwaami bwaLeza mubusena bwakusaanguna na kuchitila kuti tukambawuke chabusungu? Nziizili zipeekezyo zyamubukombi nzitukonzya kulibikkila kuti tukonzye kuchita oobo?

³ Jesu wakapandulula nzyayanda Jehova kubabelesi bakwe balipedelede chiindi naakati: “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.” (Mk. 12:30) Tweelede kukomba Leza amoyo woonse. Eezi zyaamba kuti tweelede kubeleka changuzu mukubelekela Jehova katutondeezya kuti kulipeda nkutwakachita nchintu chiyandikana loko. (2 Tim. 2:15) Umwi awumwi wesu ulaazyiingi nzyakonzya kuchita kweendelana ambakonzya. Atulange-lange zimwi nzitukonzya kuchita mpawo tulibikkile zipeekezyo zitugwasya kuchita mulimu wakukambawuka.

KUBA SIKUPUPULULA MUMBUNGANO

⁴ Bantu boonse batambula kasimpe balaachilongezyo chakukambawuka makani mabotu. Jesu wakabuzya basikwiiya bakwe kuti kabawuchita mulimu ooyu. (Mt. 24:14; 28:19, 20) Sikwiiya waJesu Kristu ubuzya bamwi makani mabotu nasaanguna kwaamvwa. Nzizyo nzyaakachita Andreya, Filipo, Korneliyo abamwi. (Joh. 1:40, 41, 43-45; Mil. 10:1, 2, 24; 16:14, 15, 25-34) Muntu uutanabbabbatizigwa ulakonzya na kubuzya bamwi makani mabotu? Iiyi ulakonzya. Kuti muntu weelela kuba sikupupulula uutanabbabbatizigwa, ulakonzya kukambawuka kung’anda ang’anda. Alubo ulakonzya kukambawuka munzila zisiyene-siyene kweendelana abukkale bwakwe.

⁵ Kuti sikupupulula wabbabbatizigwa, ulakonzya kunoogwasya bamwi kuti bazibe makani mabotu. Baalumi abanakazi balachilongezyo chakukambawuka makani mabotu. Toonse tupedwe mulimu wakukambawuka makani mabotu aatala aBwaami bwaLeza. Kufumbwa muntu uukonzya kuchita zyiingi mukukomba Leza, uyoobotelwa loko.

KUBELEKELA KUBUSENA KUYANDA BASIKUGWASILIZYA

⁶ Chimwi chiindi, busena mbungano yanu mbuyikambawukila bulakonzya kuti bwakabelekwa loko. Ikuti kakuli boobo, ulakonzya kuyeeya kuyungizya mulimu wako wakukambawuka kwiinda mukuyoobelekela kubusena buyanda basikugwasilizya. (Mil. 16:9) Kuti kuli mwaalu naakuti mubelesi uubelekela, ulakonzya kuyoogwasilizya imwi mbungano iiyanda lugwasyo. Mulangizi wabbazu uyookupa malayilile aakonzya kukugwasya kuti ukagwasye imwi mbungano. Alubo kuti kuyanda kuyoobelekela kuli imwi nyika, wofesi yamutabi ilakonzya kukupa amwi malayilile.

⁷ Uyanda kuyoobelekela kuli chimwi chisi na? Kuti kakuli boobo, weelede kuyeeyesesya kutanayinka. Weelede kubuzya baalu bamumbungano atala amakani aaya. Kubelekela kuli chimwi chisi kulakonzya kukweetela buyumu-yumu kuswaanizya abantu mbutayinke aabo. (Lk. 14:28) Pesi kuti kutayandi kuyookkala chiindi chilamfu, ulakonzya kusala kubelekela muchisi chamulindinywe.

⁸ Kuli amwi masena, bakwesu bazulwida mumbungano bachili bapya mukasimpe. Bakwesu aaba balalichesya kwiinda mukuzumizya baalu bali aluzibo bazwa kuli zimwi zisi kuti bazulwide mumbungano mubabede. Ikuti kuli mwaalu alubo kuyanda kwiinka kuli chimwi chisi, toyelede kubatolela mikuli yamumbungano bakwesu bakkala muchisi eecho. Pesi, uyanda kuyoogwasyania ambabo. Basungwaazye kuti babeleke changuzu kuti bachite imwi milimu yamumbungano. (1 Tim. 3:1) Utafwambaani kunyema kuti zintu kazitachitwi mbuli mbuzichitwa muchisi muzwa. Belesya luzibo lwako lwakuba mwaalu kuchitila kuti ubagwasye. Eezi ziyoopa kuti bakwesu aaba bakonzye kulangania mbungano kuti wazoobweda kuchisi chakulindinywe.

⁹ Kkomiti Yamulimu Yambungano yakulindinywe yeelede kulemba lugwalo lukulumbayizya mpawo wofesi yamutabi iyookubuzya mbungano ziyanda kugwasigwa. Lugwalo oolu lulayandikana kufumbwa kuti uli mwaalu, mubelesi uubelekela, payona naakuti sikupupulula. Kkomiti yamulimu iyootumizya lugwalo lwakukulumbayizya achikumbizyo chako kuwofesi yamutabi yamuchisi nkuyanda kuyoobelekela.

KUKAMBAWUKILA KUBUSENA KWAAMBUULWA UMWI MULAKA

¹⁰ Chimwi chiindi ulakonzya kwiiya umwi mulaka kuswaanizya amulaka wamasayini kuti uchite zyiingi mumulimu wakukambawuka. Kuti kulaachiyandisyo chakukambawukila kubusena kwaambuulwa umwi mulaka, ulakonzya kubuzya baalu amulangizi wabbazu. Balakonzya kukugwasya akukusungwaazya. Wofesi yamutabi igwasya amwi mabazu kujula makkilasi akwiiya umwi mulaka kuchitila kuti bagwasye bamwi basikupupulula amapayona kuti bakakonzye kukambawuka kubusena kwaambuulwa umwi mulaka.

KUPAYONA

¹¹ Basikupupulula boonse beelede kuziba zyeelelo ziyandikana zyakuba payona wachiindi choonse, payona uugwasilizya, payona uuyandikana kuswaanizya ayimwi milimu yachiindi choonse. Payona weelede kuba muKristu ulaachikozyano chibotu, uubbabbatizidwe alubo zyiimo zyakwe zyeelede kumuzumizya kuti kakambawuka akusisya ma-awa ayandikana. Kkomiti Yamulimu Yambungano njiyo ibona kuti muntu uleelela na kuba payona uugwasilizya naakuti wachiindi choonse, pesi mapayona ayandikana asalwa awofesi yamutabi.

¹² Basikupupulula balakonzya kuba mapayona aakugwasilizya kwamweezi uumwi naakuti yiindaawo, naakuti kwachiindi chilamfu, kweendelana ambubakonzya. Basikupupulula biingi babweza bupayona bwakugwasilizya muchiindi chaChiyubulusyo naakuti mumweezi mulangizi wabbazu naswayide mbungano. Bamwi bapayona mumyeezi nibatayinki kumulimu. Alubo, basikupupulula bayiiya balakozya kuba mapayona aakugwasilizya chiindi nibajalide zikolo. Basikupupulula balakonzya kukambawuka kwama-awa mache kabali mapayona aakugwasilizya mumweezi waMarch aApril amumyeezi mulangizi wabbazu naswayide mbungano. Kuti kulijata kabotu, kubona kuti ulakonzya kukambawuka kwama-awa aayandikana, akuti kubona kuti ulakonzya kuba payona uugwasilizya kwamweezi uumwi naakuti iindawo, baalu balakonzya kulanga-langa foomu lyako ndwakazuzikizya.

¹³ Kuti ube payona wachiindi choonse, weelede kubona kuti ulakonzya kukambawuka akusisya ma-awa aayandikana mumunyaka. Kuba payona wachiindi choonse kuyoopa kuti ubelekelaamwi ambungano. Mapayona aasungweede nchilongezyo mumbungano, agwasya bamwi mumulimu wakukambawuka akubasungwaazya kuti ambabo bapayone. Kuti ukonzye kuba payona wachiindi choonse, weelede kuba sikupupulula ulaachikozyano chili kabotu alubo kuli amyeezi iili musanu awumwi kubbabbatizidwe.

¹⁴ Mapayona aayandikana asalwa kuzwa kumapayona aachiindi choonse aatondeezya kuti alisungweede mumulimu wakukambawuka. Beelede kuti kabalipedelede kukambawuka kufumbwa kubusena wofesi yamutabi nkuyababuzya kuti bakabelekele. Chiindi chiingi babelekela kubusena kuli bantu bali achiyandisyo alubo balakonzya kutalisya mbungano nkukooko. Chimwi chiindi, mapayona aayandikana atolwa kumbungano ziyanda kugwasigwa mumulimu wakukambawuka. Baalu babeleka kabali mapayona aayandikana, bakatolwa kuli bumwi busena kuchitila kuti bakagwasye mbungano ziniini nikuba kakutali akaambo kakuti kuyandikana basikupupulula biingi. Mapayona aayandikana apegwa kamali kabagwasya muzintu zyakumubili. Amwi mapayona ayandikana asalwa kuti abeleke kwachiindi chifwiifwi.

MAMISHINALI

¹⁵ Kkomiti Yamulimu Yakabunga Keendelezya isala mamishinali, mpawo Kkomiti Yamutabi ibapa busena kujanika bantu biingi. Basungwaazya mbungano mumulimu wakukambawuka. Chiindi chiingi, mamishinali mbantu bakanjila Chikolo chaBakambawusi baBwaami. Mamishinali bapegwa busena bwakukkala akamali kabagwasya muzintu zyakumubili.

MULIMU WABBAZU

¹⁶ Bakwesu basalwa aKabunga Keendelezya kuti babe balangizi bamabazu basanguna kujana luzibo kwiinda mukubeleka kabali balangizi bajatila. Bakwesu bali boobu mbasungu mumulimu wakukambawuka alubo balabayanda bakombima. Balangizi aaba, mapayona aasungweede, balalibala Bbayibbele alubo bayiisya kabotu. Batondeezya michelo yamuuya, bupampu alubo bazilanga kabotu zintu. Kuti mulangizi kakwete, mukayintu wakwe mupayona wachiindi choonse, weelede kuba muntu uulijata kabotu alubo Skabajata kabotu bamwi. Weelede kuba muntu uusungweede mukukambawuka. Alubo, ulizi kuti muKristu weelede kulibombya kumulumaakwe, kutali kumubuzya zyakuchita naakuti kuba mumvwa zyakwe. Balangizi bamabazu abakayintu babo mbantu babeleka changuzu, nkinkaako, muntu uuyanda kuba mulangizi wabbazu weelede kuti katachiswi-chiswi. Mapayona tabalembi mafoomu aakuti babe balangizi bamabazu pesi kuti kabali achiyandisyo chakuba balangizi bamabazu, babuzya mulangizi wabbazu alubo nguwe uukonzya kubabuzya nzibeelede kuchita.

ZIKOLO ZYAMBUNGA

¹⁷ Chikolo chaBakambawusi baBwaami: Kumasena atanakambawukwa, kuyandikana bakambawusi baBwaami bakonzya kugwasya mbungano muzintu zyabukombi. Nkinkaako, bakwesu abachizi bali mulukwatano naakuti batali mulukwatano balakonzya kulembela kuti bakanjile Chikolo chaBakambawusi baBwaami. Nibamaninsya, balapegwa busena bwakuyoobeleka kabali mapayona achiindi choonse kubusena buyanda basikugwasilizya muchisi mubazwa. Alubo bamwi balakonzya kupegwa imwi milimu yakubelekela muchisi mubazwa naakuti kuya kuli chimwi chisi. Chiindi chiingi bamwi babeleka kabali mapayona aayandikana naakuti mapayona abeleka kwachiindi chifwiifwi. Mapayona alaachiyandisyo chakunjila chikolo eechi alakonzya kunjila muswaangano uuchitwa chiindi nikuli muswaangano wabbooma kuti bamvwe ziyandikana.

¹⁸ Chikolo chitegwa Watchtower Bible School of Gilead: Bakwesu abachizi bali mulukwatano naakuti batali mulukwatano, basalwa kuti bakanjile chikolo eechi, kweelede kabachizi kabotu Chikuwa alubo kabali mumulimu wachiindi choonse. Balaachiyandisyo chakusimya akusungwaazya bamwi kubusena nkubakambawukila naakuti kumutabi nkubabelekela. Batondeezya kuti bayandisya kugwasya maKristunyina akugwasya bamwi chaluyando kuti bayiye akuti babelesye malayilile aazwa muMagwalo aazwa kumbunga. Kkomiti yaMutabi isungwaazya bayanda kunjila chikolo eechi kuti bazuzikizye mafoomu aabo. Basichikolo eechi babeleka kabali mamishinali bamwi nga babeleka kuwofesi yamutabi yakuli chimwi chisi naakuti yachisi nkubazwa.

KUBELEKELA KUBBETELI

¹⁹ Kubelekela kuBbeteli nchilongezyo chipati. Bbala lyakuti Bbeteli lyaamba kuti “Ng’anda yaLeza” alubo busena oobu bubelesegwa kukuchita milimu iibotezya Leza. Bakwesu abachizi babeleka kuBbeteli bachita milimu iisiyene-siyene mbuli kudinda, kusandulula akutumizya mabbuku aapandulula Bbayibbele. Mulimu ngubachita ugwasya bamuKabunga Keendelezya kuti balanganie akuzulwida mbungano zili munyika yoonse. Bamwi babeleka kuBbeteli, bachita mulimu wabusanduluzi kabakkala kubusena kwaambuulwa mulaka ngubasandulula. Eezi zibagwasya kuti bamvwisisisye mbuwambuulwa mulaka ooyo. Alubo, zibagwasya kubona kuti bantu balaamvwisisisya na mabbuku ngibasandulula.

²⁰ Milimu myiingi iichitwa kuBbeteli iyanda kubeleka changuzu. Nkinkaako, bantu batambwa kuzoobelekela kuBbeteli maKristu akalipeda, aabbabbatizidwe, bachili bakubusi alubo balaamibili iisimide. Ikuti kuyanda kubelekela kuBbeteli alubo kuchisi nkukkala kakuyandikana bantu bayanda kubelekela nkuko ulakonzya kubuzya zyiingi kubaalu bamumbungano yanu.

MULIMU WAKUYAKA

²¹ Kuyaka maanda asumpula zintu zyabukombi mulimu uyandikana loko mbuli mbuwakabede mulimu wakuyaka tempele lyakayakwa aSolomoni. (1 Bam. 8:13-18) Bakwesu abachizi biingi balalipeda kwiinda mukubelesya chiindi chabo azintu nzibalaazyo kuchitila kuti banjilile mumulimu wakuyaka.

²² Ulakonzya na kugwasilizya? Ikuti kuli sikupupulula wakabbabbatizigwa alubo kulaachiyandisyo chakunjilila mulimu ooyu, balangizi bamulimu wakuyaka bayookugwasya akukuyiisya nikuba kulaaluzibo luche atala amulimu ooyu. Ulakonzya kubuzya baalu kuti kuyanda kugwasilizya. Basikupupulula bamwi babbabbatizidwe beelela, balakonzya kulipeda kukuyaka maanda aasumpula zintu zyabukombi muli zimwi zisi.

²³ Tulakonzya kugwasilizya mumulimu wakuyaka munzila zisiyene-siyene. Basikupupulula bali zikozyano zili kabotu, bali aluzibo alubo kabakkala afwiifwi akulikuyakwa, balakonzya kubeleka kabali Basikulipeda Kupanga Mapulani Aakuyaka [Local Design/Construction volunteers]. Bamwi balakonzya kusalwa awofesi yamutabi kuti bakabelekele kumasena aali kule ankubakkala kabali basikulipeda mukuyaka kwamviki zibili kusikila kumyeezi iitatu. Basalwa kuti kababeleka kwachiindi chilamfu, bategwa mbabelesi bakuyaka. Sikuyaka uusalwa kuti akabelekele kuli chimwi chisi utegwa, ngusikuyaka uuzwa kuli chimwi chisi. Kabunga Kabasikuyaka, kapangwa ababelesi bakuyaka abasikulipeda kuyaka nkako keendelezya mulimu wakuyaka alubo kagwasigwa abasikulipeda Kupanga Mapulani Aakuyaka abasikupupulula bamumbungano. Chiindi Bamukabunga Kabasikuyaka nibamaninsya kuyaka, bayinka kuyooyaka kuli bumwi busena.

UPEEKEZYA KUCHITAANZI MUBUKOMBI?

²⁴ Chiindi nwakalipeda kuli Jehova, wakatondeezya kuti uyanda kumubelekela mubuumi bwako boonse. Pesi uyoopeekezya kuchitaanzi? Kulibikkila zipeekezyo mubukombi kuyookugwasya kuti waabelesye kabotu manguzu aako azintu nzulaazyo. (1 Kor. 9:26) Zipeekezyo zili boobu zikugwasya kuti usime mubukombi akuti ubikkile maanu kuzintu ziyandikana chiindi nupeekezya kuchita zyiingi mukubelekela Leza.—Flp. 1:10; 1 Tim. 4:15, 16.

²⁵ Mwaapostolo Pawulu wakatusiila chikozyano chili kabotu chikonzya kutugwasya mukukomba Leza. (1 Kor. 11:1) Pawulu wakali kubeleka changuzu mumulimu waJehova. Wakabona kuti wakali kugwasigwa aJehova kuti achite milimu myiingi. Mwaapostolo Pawulu wakalembela bakombinyina bakuKkorinto kuti: “Ndajaludwa mulyango mupati uutola kumulimo.” Teembukubede na akulinduwe? Mbubo loko, nkaambo kuli nzila zisiyene-siyene zyakukomba Jehova mumbungano, ziswaanizya kukambawuka makani mabotu aaBwaami. Pesi, mbuli mbakaamba mwaapostolo Pawulu kunjila ‘mumulyango mupati’ kuyanda kuti tulwane ‘abasikukazya biingi.’ (1 Kor. 16:9) Pawulu wakali kulijata mbuli muzike. Wakati: “Ndilaudinkaula mubili wangu akuweendelezya mbuli muzike.” (1 Kor. 9:24-27) Nzituyanda kuchita na andiswe?

²⁶ Muntu umwi awumwi usungwaazigwa kulibikkila zipeekezyo zyamubukombi kweendelana ambakonzya. Basikupupulula biingi bali mumulimu wachiindi choonse nkaambo bakalibikkila zipeekezyo zyamubukombi kabachili baniini. Bazyali babo abamwi bakabasungwaazya kuti bachite oobo kabachili baniini. Eezi zyapa kuti bajane zilongezyo zyiingi mukubelekela Jehova alubo tabalisoli pe. (Tus. 10:22) Tulakonzya kupeekezya kukambawuka mviki amviki, kuchitisya zyiiyo zyaBbayibbele akuba achiindi chiingi chakulibambila miswaangano yambungano. Chiyandikana, nkukkala katusimide akuchita zyoonse nzitukonzya mumulimu wakukambawuka. Kuchita oobo, kuyoopa kuti tutembawule Jehova akuti tuzuzikizye chipeekezyo chesu, chakumubelekela kukabe kutamani.—Lk. 13:24; 1 Tim. 4:7b, 8.