CHIIYO 8
Abrahamu aSara Bakaswiilila Leza
Muunzi waUri wakali afwiifwi amuunzi waBbabbelo. Bantu bankuko bakali kukomba bamwi baleza kutali Jehova pe. Pesi mumuunzi ooyo, kwakali muntu wakali kukomba Jehova luzutu. Zina lyakwe nguAbrahamu.
Jehova wakabuzya Abrahamu kuti: ‘Kozwa munyika yako akuchisi chanzubo zyako uyinke kuchisi nchindiyookutondeezya.’ Kuzwa waawo, Leza wakamusyomezya kuti: ‘Uyooba chisi chipati alimwi bantu bali munyika yoonse ndiyoobachitila zintu zibotu akaambo kanduwe.’
Abrahamu taakazi pe kuti Jehova uyanda kuti aye kuli, pesi wakamusyoma. Kuzwa waawo, Abrahamu wakalongela zintu zyakwe kalaamwi amukayintu wakwe Sara, awisi Tera amujwa wakwe Loti, mpawo bakasaanguna lweendo lwabo lulamfu.
Abrahamu wakali aminyaka iili 75 chiindi nibakasika kunyika Leza njaakali kuyanda kubatondeezya. Nyika eeyo yakali kutegwa Kkenani. Jehova wakasyomezya Abrahamu kuti: ‘Nyika eeyi njubwene, ndiyooyipa bana bako.’ Pesi Abrahamu aSara bakali bachembaala kabatakwe bana pe. Jehova wakali kuyoochizuzikizya biyeni chisyomezyo chakwe?
“Akaambo kalusyomo, Abrahamu . . . wakaswiilila kwiinda mukuunka kubusena mbwaakali kuyootambula kabuli lukono; eelyo wakasiya cisi cakwe akuunka, nokuba kuti tanaakazyi nkwaakali kuunka.”—BaHebrayo 11:8, NW.