Kusunkwa Kwalusyomo

Abrahamu wakayiisya mwanaakwe Izaka kuti ayande Jehova akuti asyome zisyomezyo zyoonse zyaJehova. Pesi chiindi Izaka naakali aminyaka iili 25, Jehova wakabuzya Abrahamu kuti achite chimwi chintu chiyoosya. Niinzi nchakamubuzya?

Leza wakabuzya Abrahamu kuti: ‘Tola mwaanaako simuzyalwa alikke, ukamupe kali chituuzyo kuchilundu chili kuMoriya.’ Abrahamu taakazi pe kuti nkamboonzi Jehova naakamubuzya kuti achite oobo. Nikuba boobo, wakamuswiilila Jehova.

Buzuba bwakatobela, kuseeni, Abrahamu wakatola Izaka ababelesi bakwe babili akwiinka kuMoriya. Nikwakayinda mazuba aatatu, bakasaanguna kubona zilundu. Abrahamu wakabuzya babelesi bakwe kuti basyale, kuchitila kuti akape chituuzyo aIzaka. Abrahamu wakapa Izaka nkuni, mpawo we wakanyampula kafulo. Izaka wakabuzya wisi kuti: ‘Ani kabelele kakupayizya kali kuli?’ Abrahamu wakasandula kati: ‘Jehova ulatupa kabelele kakupayizya mwanaangu.’

Nibakasika kuchilundu, bakayaka chipayililo. Kuzwa waawo, Abrahamu wakaanga Izaka kumaboko akumawulu akumulazika ajulu achipayililo.

Mpawo Abrahamu wakatola kafulo. Naakachita oobo, mungelo waJehova wakayita aAbrahamu kuzwa kujulu wati: ‘Abrahamu! Utamujayi pe mwanaako! Lino ndaziba kuti ulamuyoowa Leza nkaambo wali kuyanda kutuula mwanaako.’ Mpawo Abrahamu wakabona mugutu kapatide meja muchiteyo. Chakufwambaana, wakaangununa Izaka alimwi wakatuula mugutu.

Kuzwa mubuzuba oobo, Jehova wakayita Abrahamu kuti mweenzinyina. Ulizi na kuti nkamboonzi? Nkaambo Abrahamu wakaswiilila Jehova nikuba kuti taakazi pe kuti nkamboonzi Jehova naakamubuzya kuti atuule mwanaakwe.

Jehova wakayindulula chisyomezyo chakwe kuli Abrahamu chakuti: ‘Ndiyookulongezya, akuvuzya bana bako.’ Alubo Jehova wakasyomezya Abrahamu kuti uyoolongezya bantu boonse bachita zintu zili kabotu kwiinda mumpuli yaAbrahamu.