Zimwi Zipenzyo Zili 6

Musa aAroni bakayinka kuli Faro akumubuzya mulumbe uuzwa kuli Leza uti: ‘Ikuti ukasye bantu bangu kwiinka, ndiyoopa kuti kube manzimbwa.’ Manzimbwa akanjila mumaanda abantu bakuEgepita boonse, bafwaba abanotede. Nyika yoonse yakazula manzimbwa. Pesi kubusena kwakali kukkala maIsrayeli kuGosheni, manzimbwa taakaliwo pe. Chipenzyo chachine azimwi zyakatobela, zyakali kupenzya bantu bakuEgepita luzutu. Faro wakakombelezya Musa kuti: ‘Kumbila Jehova agwisye manzimbwa aaya. Ndiyoobaleka bantu bako.’ Pesi chiindi Jehova naakagwisya manzimbwa aaya, Faro wakachincha muzeezo. Kuli nzyaakayiya na Faro aawa?

Jehova wakati: ‘Ikuti Faro akasye bantu bangu kuti bayinke, lubono lwabantu bakuEgepita luyoochiswa akufwa.’ Buzuba bwakatobela, lubono lwakasaanguna kufwa. Pesi lubono lwamaIsrayeli teelwakafwa pe. Nikuba boobo, Faro wakachili amoyo muyumu alimwi taakazumizya maIsrayeli kuti ayinke.

Kuzwa waawo, Jehova wakabuzya Musa kuti ayinke kuli Faro akawaale dyota mujulu. Dyota eeli lyakaba lusuko lwakazula mubusena mwakali kukkala bantu bakuEgepita. Lusuko lwadyota lwakapa kuti bantu bakuEgepita alubono lwabo bazwe zilonda zichisa loko. Nikuba boobo, Faro taakazumina pe kuti maIsrayeli ayinke.

Jehova wakamutuma lubo Musa kuli Faro kuti akamubuzye kuti: ‘Uchibakasya na ambuli sunu bantu bangu kuti bayinke? Junza kuyooba chivulamabwe.’ Buzuba bwakatobela, Jehova wakapa kuti kuwe mvula yachivulamabwe yakali atulabi amulilo. Chivulamabwe eechi chakali chipati loko zyakuti taakwe nichakawide pe muEgepita. Minsamu azilyo zyakanyonyooka, pesi zyakuGosheni zyakali kabotu. Kuzwa waawo Faro wakakombelezya Musa kati: ‘Kumbila Jehova ayimikizye chivulamabwe eechi! Mpawo mulakonzya kwiinka.’ Pesi Faro wakachincha muzeezo chivulamabwe mbuchakaleka buyo kuwa.

Mpawo Musa wakati: ‘Nsozi ziyoolya zilyo zyoonse zyakatanyonyoonwa achivulamabwe.’ Kwakaba nsozi zyiingi loko alimwi zyakalya zilyo zyakali mumyuunda aminsamu yoonse. Mpawo Faro wakabuzya Musa kuti: ‘Kumbila Jehova agwisye nsozi eezi.’ Jehova naakagwisya nsozi, Faro wakabakasya maIsrayeli kuti biinke.

Jehova wakabuzya Musa kuti: ‘Tandabika jaanza lyako kujulu.’ Kuzwa waawo, kwakaba mudima uusiya mbi. Kwamazuba atatu, bantu bakuEgepita taakwe nchibakali kukonzya kubona. Pesi kumaIsrayeli kwakali mumuni.

Faro wakabuzya Musa kuti: ‘Ulakonzya kwiinka abantu bako. Pesi lubono mulusiye.’ Mpawo Musa wakati: ‘Tweelede kwiinka alubono kuchitila kuti tukape zituuzyo kuli Leza wesu.’ Faro wakanyema loko. Wakabakalalila kati: ‘Amuzwe kunembo lyangu! Kuti ndizoomubone lubo, ndiyanda kuzoomujaya.’