Musa Wakasala Kukomba Jehova

Chiindi mpuli yaJakkobo niyakali kuEgepita yakali kwiitwa kuti maIsrayeli. Chiindi Jakkobo aJosefa nibakafwa, kwakasaanguna kweendelezya umwi Faro. Naakabona kuti maIsrayeli akali kuvula, wakayoowa kuti akali kuyooba anguzu kwiinda bantu bakuEgepita. Nkinkako, Faro wakachita kuti maIsrayeli abe bazike. Wakabasinikizya kuti bawume zitina akuti babeleke changuzu mumyuunda. Pesi chiindi bantu bakuEgepita nibakali kubabelesya maIsrayeli, maIsrayeli akali kuvula. Faro taakali kuyanda pe kuti maIsrayeli avule, nkinkaako, wakalayilila kuti kujayigwe bana balombe boonse bamaIsrayeli bakali kuzyalwa. Yeeya mbubakayoowa maIsrayeli nibakamvwa makani aaya!

Umwi mukayintu muIsrayeli wakali kutegwa Jokkebbedi, wakazyala mwana mulombe mubotu. Kuti akwabilile mwanaakwe, wakamubikka muchisewe akuchibikka mumateete kumbali amulonga waNayile. Muchizi wamwana ooyo, wakali kutegwa Miriyamu, wakakkala afwiifwi kuti abone zyakali kuyoochitika.

Mwana musimbi waFaro wakaza kumulonga kuti azosambe mpawo wakabona chisewe. Wakajana kana kakali kulila mukati, mpawo wakakeetelela. Miriyamu wakabuzya mwana waFaro kuti: ‘Ulayanda na kuti ndikuyandwide banyina kuti bamunyonsye?’ Mwana musimbi waFaro wakazumina alimwi Miriyamu wakayinka kuyooyita banyina Jokkebbedi. Mwana musimbi waFaro wakabuzya Jokkebbedi kuti: ‘Bweza mwana ooyu, umulele, mpawo ndiyookubbadala.’

Naakakomena mwana, Jokkebbedi wakamweeta kumwana musimbi waFaro alimwi wakamuuzika kuti Musa akumukomezya mbuli mwanaakwe. Musa wakakomezegwa mbuli mwana wamwaami alimwi wakali kukonzya kujana kufumbwa nzyayanda. Pesi Musa taakamuluba pe Jehova. Wakalizi kuti taakali munaEgepita pe, pesi wakali muIsrayeli. Mpawo wakasala kukomba Jehova.

Naakaba aminyaka iili 40, Musa wakayanda kugwasya bantu bakuli mbabo. Chiindi Musa naakabona umwi munaEgepita kawuma umwi muzike muIsrayeli, wakamujaya munaEgepita ooyo. Mpawo Musa wakasisa mutunta wamuntu ooyo museele. Chiindi Faro naakamvwa makani aayo, wakayanda kujaya Musa. Pesi Musa wakachijila kunyika yabaMidiyani. Nikuba boobo, Jehova wakamulangania kali nkukooko.