Basikulanga-langa Nyika Bali 12

BMaIsrayeli nibakazwa kuChilundu chaSinayi bakaakukkala kuKkedesi iili munkanda yaParana. Nibakali nkukooko, Jehova wakabuzya Musa kuti: ‘Tuma baalumi bali 12 bazwa kumisyobo yoonse kuti bakalange-lange nyika yaKkenani njindiyanda kupa maIsrayeli.’ Mpawo Musa wakasala baalumi bali 12 akubabuzya kuti: ‘Amwiinke kunyika yaKkenani mukalange kuti ilaasele bbotu na lyakulima zilyo. Mukalange kuti bantu bankuko bali simide na naa kuti tabakwe manguzu akuti bakkala mumyuunzi na naa kuti mumatente.’ Basikulanga-langa nyika bali 12 kuswaanizya Joshuwa aKkalebbu, bakayinka kunyika yaKkenani.

Nikwakiinda mazuba ali 40, basikulanga-langa nyika bakaboola kabali ankuyu, mapomegraneti amisaansa. Basikulanga-langa nyika bakaamba kuti: ‘Nyika twayibona nimbotu, pesi bantu bankuko balisimide alimwi myuunzi yabo ilamiduli yakukwabilila milamfu.’ Pesi Kkalebbu wakati: ‘Tulakonzya kubazunda. Atweende lino!’ Ulizi na kuti nkamboonzi Kkalebbu naakaamba oobu? Nkaambo Kkalebbu aJoshuwa bakali kusyoma Jehova. Pesi bamwi bakali 10 bakati: ‘Peepe. Bantu bankuko mbapati alimwi mabbabbani. Twalimbuli nsozi muunsi lyabo.’

MaIsrayeli bakayoowa. Bakasaanguna kusyoloka akwaamba kuti: ‘Atusale muzulwidi uumbi utatutole kuEgepita. Nkaambo kuti twayinka kunyika eeyi bayootujaya.’ Joshuwa aKkalebbu bakati: ‘Amuswiilile Jehova alimwi mutayoowi. Nkaambo Jehova uyootukwabilila.’ Pesi maIsrayeli taakaswiilila pe. Bakayeeya kujaya Joshuwa aKkalebbu.

Jehova wakachita biyeni? Wakabuzya Musa kuti: ‘MaIsrayeli ndakabachitila zintu zyiingi, pesi tabandiswiilili pe. Nkinkaako, bayookkala munkanda kwaminyaka iili 40 alimwi bayoofwida mumo. Pesi bana babo, Joshuwa aKkalebbu bayoosika kunyika njindakabasyomezya kubapa.’