Jehova Wakasala Joshuwa

Musa wakazulwida chisi chamaIsrayeli kwaminyaka myiingi. Kali waba afwiifwi kufwa Jehova wakamubuzya kuti: ‘Teenduwe pe utazulwide maIsrayeli Munyika Yachisyomezyo. Pesi ndilakutondeezya mbuyibede.’ Musa wakakumbila Jehova kuti asale muntu wakali kuyoozulwida bantu. Jehova wakabuzya Musa kuti: ‘Kuya kuli Joshuwa ukamubuzye kuti ndasala nguwe.’

Musa wakabuzya maIsrayeli kuti waba afwiifwi kufwa akuti Jehova wakasala Joshuwa kuti nguwe wakali kuyoobazulwida kuti bakanjile Munyika Yachisyomezyo. Musa wakabuzya Joshuwa kuti: ‘Utayoowi pe. Jehova uyookugwasya.’ Naakamana kwaambuula aJoshuwa, Musa wakatanta aChilundu chaNebbo aawo Jehova mpaakamutondeezya nyika njaakasyomezezye Abrahamu, Izaka aJakkobo. Musa wakafwa kali aminyaka iili 120.

Jehova wakabuzya Joshuwa kuti: ‘Zubuka Mulonga waJordano alimwi wiinke kunyika yaKkenani. Ndiyookugwasya mbuli mbundakali kuchita kuli Musa. Weelede kunoobala bbuku lyaMilawu yangu buzuba abuzuba. Utayoowi pe. Basichamba. Kuya ukachite nzindakubuzya.’

Joshuwa wakatuma basikulanga-langa nyika babili kuti bakaswaye muunzi waJerikko. Muchiiyo chitobela, tuyooyiya atala azyakachitika mumuunzi ooyo. Nibakaboola bakaamba kuti chakali chiindi chibotu chakuti bayinke kuKkenani. Buzuba bwakatobela, Joshuwa wakabuzya maIsrayeli kuti balibambile kweenda. Kuzwa waawo, wakabuzya bapayizi bakali kunyampula bbokesi lyachizuminano kuti bayinke kunembo kuMulonga waJordani. Mulonga wakazwide maanzi akali kweenda. Pesi chiindi bapayizi nibakanjila mumaanzi, mulonga wakaleka kweenda alimwi maanzi akamana! Bapayizi bakiimikila nibakasika aakati kamulonga, mpawo bakalinda kuti bantu boonse bazubuke. Ubonaanga chigambyo eechi teechakabayeezya atala azintu Jehova nzyakabachitila kuLwizi Lusalala na?

Kumamanino, maIsrayeli bakasika Kunyika Yachisyomezyo. Bakayaka maanda amyuunzi. Mpawo, bakalima myuunda yamasaansa aminsamu yamichelo. Yakali kutegwa ninyika ikunka malili abuchi nkaambo yakali azintu zyiingi ziligwa azinywigwa.