Jehova Wakagwasya Jehosafati

Mwaami waJuda Jehosafati wakanyonyoona zipayililo zyaBbaala azikozyano zyabaleza bakubeja muchisi chaJuda. Wakali kuyanda kuti bantu bazibe milawu yaJehova. Wakatuma baalumi bapati abaLevi muchisi choonse chaJuda kuti bakayiisye bantu milawu yaJehova.

Zisi zyakali afwiifwi achisi chaJuda zyakali kuyoowa kubalwana, nkaambo zyakaziba kuti Jehova wakali kulwanina bantu bakwe. Bakali kweeta zipo kuMwaami Jehosafati. Pesi banaMowabbu, banaAmoni abantu bakkala kuSeyiri, bakayanda kulwana achisi chaJuda. Jehosafati wakalizi kuti wakali kuyandikana kugwasigwa aJehova. Wakabungania bantu boonse kuJerusalemu baswaanizya baalumi, bamakayintu abana. Wakaya kunembo lyambungano yoonse akukomba kati: ‘Jehova, tatukonzyi kuzunda kuti teewatugwasya. Tatuzi naa tulachita biyeni.’

Jehova wakasandula nkombyo yaJehosafati akwaamba kuti: ‘Mutayoowi pe. Ndiyoomugwasya. Amwiimikile buyo mukabone mbundiyoomufutula.’ Jehova wakabavuna biyeni?

Nibwakacha, Jehosafati wakasala bayimbi akubabuzya kuti bazulwide basilumamba. Bakazwa muJerusalemu mpawo bakaya kubusena bwakulwanina butegwa Tekkowa.

Jehova wakalwanina bantu bakwe chiindi bayimbi nibakali kwiimbila ajulu chakubotelwa. Wakachita kuti banaAmoni abanaMowabbu banyongane mumizeezo alimwi bakatalika kujayana chabo-chabo, zyakuti taakwe wakafutuka. Jehova wakakwabilila maJuda, basilumamba abapayizi. Bantu bakali kukkala muzisi zyakali afwiifwi bakamvwa zyakachitwa aJehova alimwi bakaziba kuti Jehova wakachili kulwanina bantu bakwe. Jehova ubavuna biyeni bantu bakwe? Ubelesya nzila zisiyene-siyene. Tayandi kugwasigwa abantu kuti achite oobu.